Sara mbeto pëpe—Tongana mo yeke na aye mingi ti sara
1 Ambeni zo agi bê ti ala ti hunda ti manda Bible na azo ngbanga ti so ala yeke na aye mingi ti sara. Ti bâ lege ti mbeni wamandango Bible ahunda ngoi. Ti leke étude ni, ti sara ni, nga ti mû maboko na wamandango ye ni ti hon ndo ti akpale ti lo, aye so kue ahunda ngoi. Bazengele Paul atene so lo mû âme ti lo ti mû maboko na azo ti Thessalonique ti tene ala hinga Jéhovah (1 aThes. 2:7, 8). E lingbi ti sara nyen ti tene e manda Bible na mbeni zo atâa e yeke na ye mingi ti sara?
2 Ti sara na Jéhovah ahunda ngoi: A yeke tâ tënë so ti sara na Jéhovah ahunda ngoi. Na tapande, lakue e yeke mû ngoi ti gue na abungbi, ti fa tënë, ti diko Bible, nga ti sambela. Mbeni koli wala wali so ayeke na ye mingi ti sara ayeke na ngia ti mû ngoi ti duti na tere ti koli wala wali ti lo. A yeke nzoni e duti na ngia ti vo ngoi ti voro Jéhovah ndali ti so e ndoye lo (aÉph. 5:15-17; 1 Jean 5:3). Ti lingbi na tënë ti Jésus, mbeni kota ye so e yeke sara ti voro na Jéhovah ayeke kusala ti sarango si azo aga disciple (Mat. 28:19, 20). Tongana e gbu li na ndo ti ye so ayeke mû maboko na e ti yeda ti sara kua ti e so ayeke ti manda Bible na azo.
3 Me ka tongana e yeke na kua, wala e yeke na kpale ti seni, wala e yeke na mbeni kua na yâ ti bungbi? Ambeni wafango tënë so ngoi na ngoi awara lege pëpe ti gue na fango tënë asara étude na lege ti téléphone wala na lege ti Internet. Ala so mbeni ngangu kobela akanga lege na ala amä tere na wamandango ye ni ti ga na ndo ti ala ndali ti étude ni. Ambeni ita so awara lege pëpe ti gue ti sara étude amä tere na mbeni wafango tënë ti gue ti sara ni na place ti ala.
4 Paul awara ngia mingi ndali ti so lo mû ngoi nga na ngangu ti lo ti mû maboko na ambeni zo ti hinga tâ tënë (Kus. 20:35). Na ngoi so lo gbu li ti lo na ndo ti azo kue so lo mû maboko na ala na Thessalonique, bê ti lo apusu lo ti kiri singila na Jéhovah (1 aThes. 1:2). E lingbi ti kiri ti wara ngia mingi na yâ ti fango tënë tongana e zia si agbâ ti aye so e yeke na ni ti sara akanga lege na e pëpe ti mû mbage na kua ti mandango Bible na azo.
[Ahundango tënë ti manda na ye]
1. Ngbanga ti nyen ambeni zo agi bê ti ala ti hunda ti manda Bible na azo?
2. Ndoye ti e na mbage ti Jéhovah asara nyen na ndo ti lege so e yeke sara kusala na ngoi ti e?
3. Tongana nyen la e lingbi ti bâ lege ti mbeni étude même tongana ambeni ye akanga lege na e ti gue na fango tënë?
4. Aye ti nzoni wa e yeke wara tongana e mû mbage na kua ti mandango Bible na azo?