Mo gbanzi ni pëpe!
1. Tongana nyen e lingbi ti “gbanzi nzoye pëpe”?
1 Na mungo mbage mingi na fango nzo tënë ti Royaume ti Nzapa, e yeke “gbanzi nzoye pëpe” na azo so ayeke na yâ ti territoire ti e (aProv. 3:27). Pendere sango ti fa na azo ayeke tënë ti nzoni ngoi so ayeke duti ande na gbe ti komandema ti Nzapa so ayeke ga. Mbeni pendere sango ti hon so ayeke dä pëpe. Atâa so mo yeke mû mbage na bê kue ti fa tënë ti beku ti Royaume na alege kue so azi, wala na lege ti ambeti so mo zia na azo, ngbanga ti nyen mo gi pëpe ti to nda ti étude na mbeni zo tongana ade mo sara ni pëpe?
2. Ye wa alingbi ti kanga lege na e ti manda Bible na azo?
2 Ngoi na ngoi, mbeni ti akota ye so akanga lege na e ti manda Bible na azo ayeke lege so e yeke bâ na aye. Ambeni ake ti manda Bible na azo ngbanga ti so ala bâ so ala lingbi pëpe wala ala yeke na kusala mingi ti sara. Awango so ayeke ga na peko alingbi ti mû maboko na mo ti gbanzi tere ti mo pëpe ti manda Bible na azo.—Mat. 28:19; Kus. 20:20.
3. Ngbanga ti nyen e lingbi ti fa tënë ti Nzapa na azo?
3 Ti bâ tere ti e so e lingbi pëpe: Peut-être mo hinga mbeti mingi pëpe wala ndali ti ambeni tënë mo bâ so mo lingbi pëpe ti manda Bible na zo. Akozo Chrétien so kusala ti ala alë lengo ayeke azo so “amanda mbeti pëpe”. Ye wa amû maboko na ala ti fa tâ tënë na azo? “Ala yeke na tere ti Jésus giriri.” (Kus. 4:13). Ala manda ye na tere ti Jésus, Kota Wafango ye, Lo so a bata afango ye nga na akode ti Lo na yâ ti Mbeti ti Nzapa teti e. Atâa mo hinga mbeti mingi pëpe, mbeni ye ti lingbi na mbeti so mo yeke manda na lege ti yingo ayeke dä pëpe.—Es. 50:4; 2 aCor. 3:5.
4. E lingbi ti manda nyen na lege ti tapande ti Amos?
4 Ngoi na ngoi Jéhovah asara kusala ândö na aprophète ti zingo na agbia so agirisa lege wala ambeni kota zo. Ambeni, tongana Amos, ayeke asenge zo. Amos ayeda na tënë so: “Mbi yeke prophète pëpe, wala molenge ti prophète pëpe; me mbi yeke berger, na zo ti bata keke ti sycomore.” (Amos 7:14). Tongaso, Amos agbanzi tere ti lo pëpe ti fa tënë ti ngbanga ti Jéhovah na Amasia, prêtre so avoro molenge ti bagara (Amos 7:16, 17). Zia e girisa lâ oko pëpe so e yeke sara kusala so Nzapa amû na e, na lo yeke sara si e lingbi na kusala ni.—2 Tim. 3:17.
5. Ngbanga ti nyen a lingbi e sara ngangu ti manda Bible na azo atâa e yeke na kusala mingi?
5 Akusala mingi: Atâa so mo yeke na aye mingi ti sara, peut-être mo bata mbeni ngoi awe ti fa tënë lakue. Ti manda Bible na zo alingbi ti duti mbeni mbage ti kusala ti e so amû ngia mingi. A yeke mbeni pasa ti bâ ngangu so tënë ti Nzapa ayeke sara na ndo ti fini ti zo (aHéb. 4:12). A nzere na Jéhovah ti bâ so e gbanzi ambeni ye na tere ti e ti mû maboko na mbeni zo ti “hinga tene-biani mbilimbili.” (1 Tim. 2:4). Même a-ange ayeke na ngia tongana mbeni zo azia ngbene sarango ye ti lo na lo gue na li ni na lege ti yingo.—Luc 15:10.
6. Pendere kusala wa e yeke na ni na ngoi so e yeke sara ye so Nzapa aye?
6 Nzapa “aye azo kue awara salut, na ahinga tene-biani mbilimbili.” (1 Tim. 2:4). So tâ pendere kusala si e yeke na ni ti sara kua alingbi na ye so Nzapa aye, ti gbanzi tere ti e pëpe ti manda Bible na azo!