“Ala duti na siriri na azo kue”

1 Awakua ti Jéhovah ayeke azo so aye siriri, na e yeke fa tënë ti siriri (És. 52:7). Atâa so, ngoi na ngoi, e yeke tingbi na ambeni zo so asara ngonzo ngbanga ti so e ga na yanga-da ti ala. Nyen la ayeke mû ande maboko na e ti duti na siriri na yâ ti mara ti aye tongaso?​—aRom. 12:18.

² Sara ye na ndara: Atâa so ambeni zo asara ngonzo ngbanga ti so ala ke tâ tënë, me ti ambeni ala lingbi ti sara ngonzo ndali ti ambeni raison nde na fango tënë ti e. Peut-être e si pëpe na mbeni nzoni ngoi. Zo ni alingbi ti sara ngonzo ndali ti akpale ti lo wani. Même tongana ayeke ndali ti nzoni tënë la lo sara ngonzo, e lingbi ti dabe ti e so sarango ye ti tere ti lo afa so peut-être mbeni zo ahanda lo (2 aCor. 4:4). Ti sara ye na ndara ayeke mû maboko na e ti duti kpô nga ti hinga so lo sara ngonzo na tere ti e pëpe.​—aProv. 19:11.

³ Fa so mo ne zo: Azo mingi na yâ ti territoire amä na bê na aye so agbu bê ti ala ngangu (2 aCor. 10:4). E ye lâ oko pëpe ti bi nengo ti ye so azo amä na bê na ni wala ti bâ so e la e hinga Bible mingi ahon ala. Tongana a hunda na e ti hon, a lingbi e sara ni na mbeni lege so ane zo.

⁴ Sara tënë na nzoni bê: Même tongana ala sara sioni tënë na e, a lingbi e kiri tënë yeke nga na nzoni bê (aCol. 4:6; 1 Pi. 2:23). Ahon ti tene e papa na zo ni, a yeke nzoni e gi ti wara mbeni ye so e lingbi ti mä tere na ndo ni. E lingbi peut-être ti hunda zo ni na nzoni bê ti fa ndani so lo ye pëpe ti sara lisoro na e. Ti kpe ti tene lo sara ngonzo mingi, ni la, ngoi na ngoi ayeke nzoni pëpe ti ngbâ ti sara lisoro ni.​—aProv. 9:7; 17:14.

⁵ Tongana e yeke gi ti duti na siriri, zo ni alingbi ti dabe ti lo na nzoni sarango ye ti e na mbeni lâ lo lingbi ti mä mbeni ita so aga ti fa tënë na lo (aRom. 12:20, 21). Même tongana lo kpa zo so ayeke sara ye ti ngangu mingi, mbeni lâ lo lingbi ti ga ita ti e (aGal. 1:13, 14). Tongana lo sara nzara ti tâ tënë pëpe, e yeke ngbâ lakue ti sara hange na sarango ye ti e na ti fa so e ye siriri na sarango tongaso ayeke mû gonda na Jéhovah nga asara pendere ti ye so e fa.​—2 aCor. 6:3.

[Ahundango tënë ti manda na ye]

1. Wango ti Bible wa a lingbi e sara ye alingbi na ni tongana e tingbi na azo so asara ngonzo?

2. Ngbanga ti nyen ayeke kota ye ti tene e sara ye na ndara?

3. Tongana nyen la e lingbi ti fa so e ne zo?

4. Ti sara tënë na nzoni bê aye ti tene nyen?

5. Aye ti nzoni wa e yeke wara tongana e gi ti duti na siriri?