“Ala ndoye sewa ti e ti aita kue”

A sû atënë ti li ti tënë so na gbe ti yingo a sara nduru na angu saki use tongaso awe (1 Pi. 2:17). Me a yeke nzoni e sara ye alingbi na ni fadeso mingi ahon ti kozo! Na lege wa e lingbi ti ndoye aita na yâ ti dunia kue? Atâa so e yeke na yâ ti dunia so ague kirikiri, e hinga tongana nyen so ndoye ti e ayeke dë lâ oko pëpe? (Mat. 24:12). So mo bâ vidéo Toute la communauté des frères, bâ wala mo lingbi ti kiri tënë na ahundango ndo so ge.

(1) Lawa si e ga mbeni oko ti sewa ti aita so? (2) Akusala ota wa e na aita ti e na ndo ti sese kue e yeke sara legeoko? (3) Tongana nyen aita ti e afa na gigi so ala leke awe na bê ti ala kue ti fa tënë (a) na yando ti Alaska, (b) na akota yanga ti ngu ti Poto so amangboko ayeke luti dä, nga (c) na yâ ti akota gbako ti Pérou? (4) Ngbanga ti nyen a lingbi e bâ fango tënë lâ oko pëpe tongana mbeni senge kusala? (5) Mû atapande ti fa tongana nyen aTémoin ti Jéhovah adë bê nga amû maboko na amba ti ala (a) na peko ti yengingo ti sese, (b) na peko ti kota pupu, (c) na ngoi ti bira na popo ti azo ti kodoro oko? (6) Na alege wa e kue e lingbi ti fa na gigi kota ye so amû lege ti hinga na songo so ayeke na popo e? (Jean 13:35). (7) Aye ti nzoni wa aga na lege ti sarango kua maboko na maboko ti leke aDa ti Royaume ti e? (8) Tongana nyen aita ti e na Poto ti Tö nga na Russie akui pëpe na lege ti yingo atâa so a kanga lani lege na kusala ni kâ? (9) Ngangu wa la aTémoin mingi ayeke sara ti gue na akota bungbi, na ngbanga ti nyen? (10) Na lege wa vidéo so amû ngangu na mo (a) ti voro Jéhovah na ti bungbi beoko na aita ti e, (b) ti mû maboko na ambeni zo na ngoi so ala yeke na bezoin ni, na (c) ti ngbâ lakue ti fa tënë na ngoi kue nga na alege kue? (11) Tongana nyen nga na ngoi wa e lingbi ti sara kusala na vidéo so na fango tënë?

Kota ye so apusu e ti duti mbage ti sewa ti aita so ayeke ndali ti so e ndoye Jéhovah. Tongaso e ye ti manda ti hinga ye na ndo ti lo nga ti fa ni na ambeni zo. Na e ndoye azo so Jéhovah andoye ala. Tongana e mû maboko na ala na ngoi so ala yeke na bezoin ni, e yeke ku pëpe ti tene Nzapa akiri singila na e. Nde na so, e kiri singila na Nzapa ngbanga ti so e bâ aita ti e tongana mbeni kota matabisi so alondo na lo. Na alango ti nda ni so ndoye ayeke dä pëpe na yâ ti dunia so, a lingbi e ngbâ lakue ti fa ndoye ndali ti sewa ti aita kue!