Maï akode ti fango tënë ti mo: Sû iri ti azo so tënë ni agbu bê ti ala na mbeti

Bazengele Paul amû lani wango na Timothée na gbe ti yingo, lo tene: “Mo sara hange lakue na aye so abâ mo nga na fango ye ti mo.” (1 Tim. 4:16). Wango so afa so, atâa e yeke afini zo wala azo so aninga na yâ ti kusala ni awe, a lingbi e sara ngangu ti maï akode ti fango tënë ti e. Ti mû maboko na e ti sara ni, a yeke sigigi na mbeni fini molongo ti a-article na yâ ti Kusala ti Royaume so li ni ayeke “Maï akode ti fango tënë ti mo.” Article oko oko ayeke sara tënë na ndo ti mbeni kode so a yeke kota ye ti sara kusala na ni; a yeke mû nga na e ambeni wango ti sara kusala na kode ni. A wa aita kue ti sara kusala mingi na kode ni so na yâ ti nze ni. Tongana nze ni ahunzi awe, na ngoi ti mbeni Bungbi ti Kusala a yeke hunda na e ti fa aye ti nzoni so e wara na sarango kusala na kode ni so. Na nze so, ye so a wa e kue ti sara ayeke ti sû iri ti azo so asara nzara ti tënë ni na mbeti.

Ndani so a yeke kota ye: Ti sara kusala so a mû na e na lege ni, a lingbi e sara ye mingi ahon gi ti fa tënë. Ti tuku ngu na ndo ti angongoa ti tâ tënë so e lu ni, a lingbi e kiri e bâ azo so tënë ni agbu bê ti ala nga ti fa ye na ala (Mat. 28:19, 20; 1 aCor. 3:6-9). Ye so ahunda ti tene e kiri ti bâ zo ni, ti sara lisoro na ndo ti aye so agbu bê ti lo, nga ti dabe ti lo na ndo ti lisoro so e sara kozo. Ni la, tongana e wara mbeni zo so ayeda na tënë ni, a yeke nzoni e sû iri ti lo na mbeti.