Tuku ngu na ndo ti ngongoa ni si a sigigi
1. Nyen la a lingbi e tuku ngu dä ti tene a sigigi?
1 Tongana a lu mbeni ngongoa, a lingbi a tuku ngu dä si a sigigi. A yeke nga tongaso na angongoa ti tâ tënë so e lu na yâ ti bê ti azo ti territoire ti e (1 aCor. 3:6). A lingbi e kiri e bâ azo so e fa tënë na ala nga e tuku ngu na ndo ti angongoa ni so ayeke na lege ti fä na sarango kua na Bible tongana e ye si gere ti angongoa ni so agbu sese, a sigigi na a lë lengo.
2. E lingbi ti zia gere ti vizite tongana nyen?
2 Bi mbeni tënë na sese: Na ngoi so mo yeke leke ambeni tënë ndali ti fango tënë, a yeke nzoni mo leke nga mbeni hundango tënë so alingbi ti ndu bê ti zo ni na so mo lingbi ti ga ti peko ti kiri tënë na ni. Na hunzingo ti kozo lisoro ni, bi hundango tënë ni na sese na mä tere na zo ni ti kiri encore. Mingi ti awafango tënë abâ so a yeke nzoni mingi ti soro mbeni tënë na yâ ti buku Bible afa so ayeke mû lege na ala ti fa tongana nyen ti sara mbeni étude.
3. Atënë wa e lingbi ti zia na yâ ti note so e yeke mû?
3 Mû note: Gi na peko ti so mo zia zo ni, mû ngoi ti mû note. Sû iri ti zo ni nga na ndo so lo lango dä. A yeke nga nzoni ti sû lango so ala sara na lisoro ni, ngoi ni, ye so ala sara lisoro na ndo ni, nga tongana mo mû mbeti na lo sû ni nga. Lo tene so lo yeke na eglize ti lo awe? Lo yeke na sewa? Lo fa aye so agbu bê ti lo? Asango tongaso ayeke mû maboko na mo ti hinga tënë so ala yeke sara lisoro na ndo ni ande. Nga sû na mbeti lango so mo yeke kiri ande ti bâ lo nga na hundango tënë so mo yeke kiri tënë na ni.
4. Ngbanga ti nyen a yeke nzoni e zia pëpe ti kiri ti bâ azo so asara nzara ti tënë ni?
4 Zia lege ni pëpe: Satan ayeke gi lakue ti ‘zi tënë’ so a lu na yâ ti bê ti mbeni zo (Marc 4:14, 15). Tongaso, tongana a yeke ngangu na mo ti wara azo so asara nzara ti tënë ni na yanga-da ti ala, zia lege ni pëpe. Mo lingbi ti sû mbeti ti tokua na lo wala ti zia ni na yanga-da ti lo? Mbeni ita-wali pionnier ato nda ti étude na mbeni wali na yanga-da ti lo. Na pekoni ti wara wali ni na yanga-da aga ngangu, tongaso ita ni asû mbeti lo tokua na wali ni. Na ngoi so ita ni akiri awara lo na yanga-da, wali ni atene so bingo bê so ita ni abi na ndo ti lo andu bê ti lo ngangu. Tongana e tuku ngu na ndo ti angongoa ti tâ tënë, e lingbi ti duti na ngia ti bâ so ala yeke sigigi, ala kono, ala kpengba na “ala lë fani bale-ota, fani bale-omene nga fani ngbangbo oko.”—Marc 4:20.