Gi ti fa tënë ti Royaume na alege kue so azi na MO
1. Nyen la e lingbi ti manda na lege ti tapande ti David?
1 Gbia David ayeke lani mbeni zo so ayeke zia pëpe si aye so asi na lo akanga lege na lo. Na tapande, David aye lani ti leke mbeni da ndali ti Jéhovah. Me tongana a tene na lo so lo la lo yeke sara ni pëpe, David achangé bango ndo ti lo na lo leke aye ti mû maboko na Salomon ti leke temple ni (1 aGbia 8:17-19; 1 Chron. 29:3-9). Ahon ti zia lê ti lo na ndo ti ye so lo lingbi pëpe ti sara, David azia lê ti lo na ndo ti ye so lo lingbi ti sara ni. Tongana nyen la e lingbi ti mû tapande ti David na lekengo akapa ti e nzoni tongaso si e fa tënë mingi?
2. Nyen la a lingbi e wani e gi ti sara?
2 Ye so e lingbi ti sara: Mingi ti ambeni ita achangé aye na yâ ti fini ti ala ti mû kua ti pionnier auxiliaire wala ti pionnier permanent (Mat. 6:22). Mo kue mo ye ti sara tongaso? Tongana mo yeke sambela ti bâ dutingo ti mo nzoni, mo lingbi ti bâ so “mbeni kota yanga-da azi” na mo “ti sara kusala”. Tongaso, gbu lege so azi na mo so.—1 aCor. 16:8, 9.
3. Alege wa so azi na e a lingbi e gbu ni ti fa na tënë atâa so ambeni ye akanga lege na e ti mû kua ti pionnier?
3 Me, ka tongana ambeni ye akanga lege na mo ti mû kua ti pionnier? Kanga lê pëpe na ndo ti ambeni lege nde so azi na mo. Na tapande, tongana mo yeke sara kua na ambeni zo so ayeke aTémoin pëpe, gbu lege so azi na mo ti fa tënë na ala. Wala tongana mo yeke na kpale ti seni, mo lingbi ti wara ye ti nzoni tongana mo yeke fa tënë na azo so ayeke bâ lege ti mo. Dabe ti mo so a leke mbeni ye ndali ti aita so ayeke na ngangu encore ape ngbanga ti so ngu ti ala ague na li ni mingi wala ala yeke na kpale ti seni, ti tene ala fa tënë teti penze-ngbonga 15 na yâ ti nze oko oko. Tongana mo yeke bi rapport ti fango tënë ti nze oko oko, a yeke nzoni mo zia na yâ ni l’heure ti fango tënë na alege kue so azi nga na ambeti so mo mû na azo, ye so andu nga atract, ambeti ti tisango ndo na Mémorial na ti akota bungbi. Peut-être bê ti mo alingbi ti dö ti bâ hio tongaso akete penze-ngbonga so mo yeke fa na tënë na alege kue so azi aga gbani.
4. Nyen la mo leke na bê ti mo ti sara?
4 Atâa ambeni ye akanga lege na e, zia e gi ti fa nzoni tënë na alege kue so azi. Na sarango tongaso, e yeke duti ande na ngia ti hinga so e yeke sara ye kue so e lingbi ti sara ndali ti Royaume ti Nzapa.—Marc 14:8; Luc 21:2-4.