Na ngoi ti Mémorial ti ngu so, mo yeke mû ande tapande ti Jéhovah na ti Jésus so ayapu na kua?
1. Nyen la aTémoin ti Jéhovah ayeke sara ngangu ti sara ni na ngoi ti Mémorial?
1 Jéhovah ayapu ti sara ye so lo leke na bê ti lo ti sara. Ti sara tënë ti ambeni ye ti nzoni so Royaume ti Nzapa ayeke sara ande, Ésaïe 9:6 atene: “Fade L’Éternel Ti Sabaoth asara ye so na lege ti nzara ti bê ti Lo.” Legeoko nga, na ngoi ti kusala ti lo na ndo ti sese, Molenge ti Nzapa afa so lo yapu mingi ndali ti tënë ti vorongo Jéhovah (Jean 2:13-17; 4:34). Ngu oko oko, na ngoi ti Mémorial, awafango tënë kutu mingi na yâ ti dunia kue ayeke sara ngangu ti yapu tongana Jéhovah nga na Jésus na lege so ala yeke fa tënë mingi. Mo kue mo yeke sara ande tongaso?
2. Na lango 7 ti nze ti mars, ti yapu ayeke pusu ande e ti sara nyen?
2 Kapa ti fango tënë na ngoi ti Mémorial: Na ngu so, kapa ti tisango azo na Mémorial ayeke to nda ni ande na samedi lango 7 ti nze ti mars. Leke tere ti mo fadeso ti tene mo yapu ande na kua ti fango tënë. Tere ti aita ayeke nzere ande mingi na ngoi so ala yeke sara ngangu ti kangbi ambeti ti tisango ndo so na yâ ti territoire ti congrégation ti ala kue. Sara kue ti tisa azo so mo yeke manda Bible na ala, avizite ti mo, azo so mo na ala ayeke sara kua place oko, afami ti mo nga na akamarade ti mo ti ekole na mungo na ala mbeti ti tisango ndo ni wala na sarango kua na site jw.org.
3. Na lege wa e lingbi ti fa tënë mingi na nze ti mars nga na avril?
3 Kua ti pionnier auxiliaire: Ti yapu ayeke pusu nga e ti kiri ti fa tënë mingi. Kite ayeke dä ape so aita mingi ayeke mû ande kua ti pionnier auxiliaire na nze ti mars nga na avril, ndali ti so ala lingbi ande ti soro ti sara l’heure 30. Na ngoi ti vorongo Nzapa na yâ ti sewa, wala na ngoi ti mandango ye ti mo wani, sambela nga gbu li ti bâ tongana nyen la mo lingbi ti mû kua ti pionnier (aProv. 15:22). Tongana mo yapu na fango tënë na ngoi ti kapa so, a yeke pusu ambeni zo ti sara nga tongaso. Tongana mo changé ambeni ye ti mû lege na mo ti fa tënë mingi, mo yeke mû ande tapande ti Jésus so asara ye na yapungo tere.—Marc 6:31-34.
4. Nyen la e yeke wara tongana e mû tapande ti Jéhovah nga na ti Jésus so ayapu na sarango kua?
4 Tongana e yapu tongana ti Jéhovah nga na ti Jésus na ngoi ti Mémorial ti ngu so, e yeke wara ande aye ti nzoni mingi na pekoni. E yeke fa ande tënë na azo mingi ti yâ ti territoire ti e. E yeke wara ande ngia so zo ayeke wara ndali ti so lo sara na Jéhovah nga lo mû ye na azo (Kus. 20:35). Kota ye ni kue ayeke so e yeke zia ande ngia na bê ti Nzapa ti e nga na ti Molenge ti lo so ayapu na sarango kua.