Sara si ngoi ti Mémorial so aduti mbeni ngoi ti ngia!
1. Mbeni lege ti wara ngia mingi na ngoi ti Mémorial so ayeke so wa?
1 Mo ye ti wara ngia mingi na nze ti mars, avril nga na mai? Mbeni lege ti wara ni ayeke ti fa tënë mingi, nga tongana lege ayeke dä ti mû kua ti pionnier auxiliaire. Tongana nyen la sarango tongaso ayeke ga na mo ngia mingi?
2. Na lege wa e yeke wara ngia mingi tongana e fa tënë mingi?
2 Gi ti wara ngia mingi: Jéhovah asara e ti tene e voro lo, na tongana e voro lo, e yeke wara ngia na pekoni (Mat. 5:3). Lo leke nga e na mbeni lege so tongana e mû ye na azo e yeke wara ngia na pekoni (Kus. 20:35). Kusala ti e ti fango tënë ayeke mû lege na e ti sara aye use so: ti voro Nzapa nga ti mû maboko na azo. A yeke na lege ni so tongana e fa tënë mingi, e yeke wara nga ngia mingi na pekoni. Na ndo ni, tongana e fa tënë mingi, e yeke wara nga akpengba kode mingi. Na ngoi so e yeke wara akode mingi, a yeke mû lege na e ti fa tënë na bê ti e kue nga ti sara mbeto mingi pëpe. Lege ayeke zi na e mingi ti fa tënë nga ti to nda ti manda Bible na azo. Aye so kue ayeke sara si e yeke wara ngia mingi na fango tënë.
3. Ngbanga ti nyen nze ti mars na avril ayeke apendere ngoi ti mû kua ti pionnier auxiliaire?
3 Nze ti mars na avril ayeke duti ande apendere ngoi ti mû kua ti pionnier auxiliaire ngbanga ti so e lingbi ti soro ti fa tënë l’heure 30 wala 50. Nga, ti to nda ni na samedi lango 22 ti mars ti si na lango ti Mémorial so ayeke na lundi lango 14 ti avril, e yeke mû ande mbage na ngia na kapa ti tisango azo na Mémorial. Acongrégation mingi ayeke wara kota ngia na ngoi so ala yeke sara kua maboko na maboko ti sara aterritoire mingi na yâ ti ngoi so ahunda.—Soph. 3:9.
4. Nyen la a lingbi e sara tongana e ye ti mû kua ti pionnier auxiliaire?
4 Leke tere ti mo l’heure tongaso: Tongana ade mo sara ni ape, mû ngoi fadeso ti kiri ti bâ aye wa mo lingbi ti changé na yâ ti kapa ti mo ti wara lege ti fa ande tënë mingi teti nze oko wala ahon so. Sambela Jéhovah ndali ni (Jacq. 1:5). Sara tënë ni na azo ti sewa ti mo nga na ambeni ita ti congrégation ti mo (aProv. 15:22). Mo lingbi ti bâ so atâa mo yeke na kpale ti seni wala mo yeke na kua mingi, mo kue mo lingbi ti wara ngia so aga na lege ti mungo kua ti pionnier auxiliaire.
5. Tongana e fa tënë mingi na ngoi ti Mémorial so, ye ti pekoni ayeke so wa?
5 Jéhovah aye ti tene awakua ti lo aduti na ngia (Ps. 32:11). Tongana e sara kue ti fa tënë mingi na ngoi ti Mémorial so, e yeke wara gi ngia mingi ape me e yeke zia nga ngia na bê ti Babâ ti e ti yayu.—aProv. 23:24; 27:11