Sara kua na avidéo ti fa na ye na azo so mo yeke sara étude na ala

Aye so zo ayeke bâ ayeke gboto lê ti lo nga ayeke mû maboko na lo ti mä yâ ti aye so lo manda nga ti dabe ti lo na ni. Jéhovah, Kota maître ti e, asara kua na aye so lê ti zo abâ ti fa akota ye ti manda (Ge 15:5; Jér 18:1-6). Jésus, Kota Wafango ye, asara nga kua na aye so lê ti zo abâ ti fa na ye (Mt 18:2-6; 22:19-21). Mbeni oko ti aye so lê ti zo abâ so aga na aye ti nzoni mingi na yâ ti angu so ahon ayeke vidéo. Mo yeke sara kua nzoni na avidéo na ngoi so mo yeke fa ye na azo so mo yeke sara étude na ala?

A sigi na avidéo 10 ti mû maboko na e ti fa na aye ti manda ti brochure Nzoni tënë so alondo na Nzapa! Mingi ni, titre ti vidéo oko oko ague oko na mbeni hundango tënë so a sû ni vuko vuko so ayeke na yâ ti brochure ni. Ti dabe ti e na ngoi so e lingbi ti fa avidéo ni oko na oko, a zia alien ti avidéo ni na ndö ti brochure ti so ayeke na ndö ti jw.org. Na ndö ni, ambeni vidéo ni ague oko na atënë so ayeke na yâ ti ambeti so e yeke sara na étude na azo.

Eskê a yeke ngangu na mbeni zo so mo sara lisoro na lo na ndö ti Bible ti mä yâ ti tënë ni? Wala zo so mo sara étude na lo ayeke na mbeni kpale? Gi avidéo so ayeke na ndö ti jw.org® nga na JW Télédiffusion ti wara mbeni so alingbi ti mû maboko na lo. Peut-être mo na lo apeut ti bâ mbeni vidéo ni legeoko nga ala sara lisoro na ndö ni.

Nze oko oko, a yeke sigi na afini vidéo. Tongana mo yeke bâ ni, gi ti bâ tongana nyen la mo peut ti sara kua na ni na ngoi so mo yeke fa ye na azo.