Sara kusala na akasete vidéo ti fa ye
1. Tongana nyen Jéhovah asara kusala na aye so a lingbi ti bâ ni ti fa ye na awakua ti lo ti giriri? Aye so asara nyen na ndo ti ala?
1 Jéhovah asara lani kusala na asuma na abango li ti fa ambeni kpengba sango na awakua ti lo ti giriri. Dabe ti mo na suma so Ezéchiel abâ na ndo char ti Jéhovah so ayeke na yayu (Ezéch. 1:1-28). Tara ti bâ tënë ti bê ti Daniel na peko ti so lo bâ suma ti prophétie so afa ayanga-ti-komande so aga na peko ti tere (Dan. 7:1-15, 28). Ka ti akpengba suma ti prophétie so a fa lani na bazengele Jean tongana afä ti aye so ayeke si na “lâ ti Seigneur” a yeke tongana nyen? (Apoc. 1:1, 10). Jéhovah afa ye na ala na lege ti apendere nzoroko nga, na yâ asuma so ala bâ, ala bâ tongana nyen aye nde nde asara ye na ngangu, na ye so angbâ ti sara ngangu na ndo ti ala angu mingi na pekoni.
2. Aye wa e lingbi ti sara kusala na ni ti fa ye so Bible afa biani na azo?
2 E lingbi legeoko nga ti sara kusala na akasete vidéo so bungbi asigigi na ni tongana e ye ti fa ye so Bible afa biani na amba ti e na mbeni lege so ala lingbi ti girisa ni hio pëpe. Akasete so asara tënë na ndo ti aye nde nde na apusu zo ti zia bê kue na Bible, na bungbi ti Jéhovah nga na akpengba-ndia so ayeke leke nzoni mingi dutingo ti e ti Chrétien. Zia e bâ ambeni lege so e lingbi ti fa ye na lege ti akasete vidéo ti e. A zia ge atapande ti ambeni kasete vidéo so e lingbi ti sara kusala na ni.
3. Nyen la mo lingbi ti sara kua na ni ti ga na mbeni wamandango Bible na yâ bungbi?
3 Na fango tënë: Mo yeke sara tënë na mbeni wamandango Bible na ndo sewa ti aita ti e ti sese kue? Fa ni na lo na lege ti kasete vidéo Toute la communauté de nos frères. Mo lingbi ti mû na lo kasete ni ti tene lo bâ ni kozo ti étude ti peko wala mo na lo abâ ni oko na ngoi ti mbeni étude so ala yeke sara ande. Na pekoni, sara lisoro ti dango bê na ndo ti ahundango tënë so ayeke na yâ ti Kusala ti Royaume ti juin 2002.
4. Ye wa amaseka Témoin alingbi ti sara na kua na ekole?
4 Amaseka, ala lingbi ti hunda wafango ye na ala ti bâ wala lo lingbi ti mû lege na ala ti fa kasete vidéo La fermeté des Témoins de Jéhovah face à la persécution nazie wala Fidèles dans les épreuves—Les Témoins de Jéhovah en Union soviétique. Ala hunda na wafango ye na ala wala ala lingbi ti leke ambeni hundango tënë si ala na klase ni asara lisoro na ndo ni. Ala mû ahundango tënë so ayeke na yâ ti Kusala ti Royaume ti juin 2001 na ti février 2003.
5. Nyen la ababâ na mama alingbi ti mû ti sara na kusala na ngoi ti mandango ye na sewa?
5 Na popo ti sewa na aita: Ababâ na mama, ala tara awe ti bâ lege so amolenge ti ala akono ngbene ye so a sigigi na kasete vidéo Les jeunes s’interrogent. . . Comment se faire de vrais amis? Leke ti kiri ti bâ kasete so na ngoi ti mandango ye na sewa ti peko.
6. Nyen la mo lingbi ti leke ti sara si mo na aita akpengba tere?
6 Peut-être mo ye fade ti tisa ambeni ita ti kongregation na yanga-da ti mo. Ti tene ala bâ na ndo oko kasete vidéo Respectons l’autorité de Jéhovah alingbi ti sara si azo kue akpengba, mbilimbili tongana, na pekoni, ala kiri abâ aye so ala lingbi ti manda dä. Sara kusala na ahundango tënë so ayeke na yâ ti Kusala ti Royaume ti septembre 2004.
7. Ambeni lege wa mo lingbi ti bi bê na ni ti sara kusala na akasete vidéo ti e?
7 Na ambeni lege nde: Na ambeni lege wa e lingbi ti sara kusala na akasete ti e nde nde so ayeke 20? Tongana mo fa mbeni oko wala use ti akasete vidéo so na mbeni zo so mo yeke sara ka vizite na lo lakue, a yeke mû maboko na lo ti maï na lege ti yingo? Mo lingbi ti hunda ti fa akasete so na ando so a yeke bata ambakoro dä? Akasete vidéo so alingbi ti sara si mo ne na lê ti afami ti mo so ayeke aTémoin pëpe, azo ti tere ti da ti mo wala amba ti mo ti place ti kua? Akasete vidéo ti e ayeke pika bê ti zo, ayeke fa ye na zo nga aye so zo abâ na yâ ni alingbi ti mû maboko na lo. Sara kusala na ni ti fa ye na azo.