Maï akode ti fango tënë ti mo: Sara kua na avidéo ti fa na ye na zo

NDANI SO A YEKE KOTA YE:

Aye so azo ayeke bâ na ayeke mä na lege ti avidéo alingbi ti ndu bê ti ala. A lingbi ti gboto lê ti ala nga ala lingbi ti girisa ni ape. Jéhovah azia mbeni nzoni tapande na sarango kua na aye so lê ti zo alingbi ti bâ ti fa na ye.—Kus 10:9-16; Apc 1:1.

Avidéo Nzapa ayeke na iri?, Bible alondo na zo wa? nga na vidéo E hinga tongana nyen so atënë ti Bible ayeke tâ tënë? ague oko na aye ti manda 2 na 3 ti brochure Nzoni tënë. Avidéo Ndani nyen ti manda Bible?, E yeke manda Bible na azo tongana nyen? nga na vidéo E yeke sara abungbi ti e tongana nyen? awa azo ti manda Bible wala ti ga na abungbi ti e. E lingbi ti sara kua na ambeni vidéo ti e ti fa na ye na azo so e yeke manda Bible na ala.​—km 5/13 l. 3.

LEGE TI SARA NI:

• Kozoni, téléchargé vidéo so mo ye ti fa na zo ni

• Leke mbeni hundango tënë oko wala use so kiringo tënë ni ayeke na yâ ti vidéo ni

• Mo na zo ni abâ vidéo ni legeoko

• Sara lisoro na ndo ti akota tënë ni

TARA TI SARA YE SO:

• Bâ peko ti mbeni tract ni, nga gboto lê ti lo na ndo ti code so a tokua zo na ndo ti vidéo Ndani nyen ti manda Bible?

• Fa vidéo E hinga tongana nyen so atënë ti Bible ayeke tâ tënë?, mû na lo brochure Nzoni tënë, na gboto lê ti lo na ndo ti ye ti manda 3