Tambela na Nzapa ti mo na sarango terê ti mo kete nga na bango terê ti mo kete

1. David atene lani nyen na ndö ti sarango terê ti Jéhovah kete?

ESKÊ e lingbi ti tene biani so Jéhovah asara terê ti lo kete? En. David atene mbeni lâ, atene: “Mo sö mbi na vala ti mo, nga so mo sara terê ti mo kete, a sara si mbi ga kota.” (2 Sam. 22:36; Ps. 18:35). Peut-être David ayeke pensé lani na lango so prophète Samuel aga lani na da ti babâ ti David ti tuku mafuta na li ti zo so ayeke ga ande gbia ti Israël. David ayeke tanga ti amolenge ti koli miombe; me lo la Jéhovah asoro lo ti ga gbia na place ti Gbia Saül.—1 Sam. 16:1, 10-13.

2. Aye wa la e yeke bâ ande na yâ ti article so?

² David ayeke yeda biani na tënë so mbeni zo ti sungo psaume atene na ndö ti Jéhovah, lo tene: “Lo kuku ti bâ yayu na sese; lo yô na nduzu azo ti mawa so ayeke na yâ ti fuku ti sese. Lo yô na nduzu wayere . . . ti sara si lo duti na popo ti akota zo.” (Ps. 113:6-8). Na yâ ti article so, e yeke bâ kozoni ambeni kpengba ye ti manda na ndö ti sarango terê kete na lege so e yeke bâ tongana nyen la Jéhovah asara ni. Na pekoni, e yeke bâ aye so e lingbi ti manda na ndö ti bango terê ti e kete na lege ti tapande ti Gbia Saül, ti prophète Daniel nga na ti Jésus.

AYE WA LA E LINGBI TI MANDA NA LEGE TI TAPANDE TI JÉHOVAH?

3. Jéhovah asara ye na mbage ti e tongana nyen? Ye so afa nyen?

³ Fason so Jéhovah asara ye na mbage ti awakua ti lo so ayeke mbilimbili-kue ape afa so lo sara terê ti lo kete. Lo yeda na vorongo ti e nga lo bâ e tongana akamarade ti lo (Ps. 25:14). Ti tene e wara lege ti ga akamarade ti Jéhovah, lo mû li ni na lege so lo mû Molenge ti lo tongana sandaga ndali ti asiokpari ti e. Jéhovah asara ye na nzoni bê mingi nga lo bâ mawa ti zo mingi.

4. Nyen la Jéhovah amû na e? Ngbanga ti nyen?

⁴ Gbu li na ndö ti mbeni lege so Jéhovah asara terê ti lo kete. So Jéhovah la acréé e, lo lingbi fade ti sara e sân ngangu ti soro aye so e ye ti sara na yâ ti fini ti e. Me lo sara tongaso ape. Lo sara e na image ti lo nga lo mû na e liberté ti soro ye so e ye ti sara. Lo ye si e asenge zo e sara na lo na bê ti e wani ndali ti so e ye lo nga e hinga so ti mä yanga ti lo ayeke ndali ti nzoni ti e (Deut. 10:12; És. 48:17, 18). E kiri singila mingi so Jéhovah asara terê ti lo kete tongaso!

5. Tongana nyen la Jéhovah afa na e ti sara terê ti e kete? (Bâ foto ti couverture ni.)

⁵ Jéhovah afa na e ti sara terê ti e kete na lege ti fason so lo sara ye na mbage ti e. Jéhovah ayeke na ndara ahon azo kue. Atâa so kue, lo yeke nduru ti yeda ti sara ye so azo afa. Na tapande, Jéhovah amû lege na Molenge ti lo ti mû maboko na lo ti créé aye kue (aProv. 8:27-30; aCol. 1:15, 16). Nga, atâa so ngangu ti Jéhovah ahon angangu kue, lo mû komandema na ambeni zo. Na tapande, lo zia Jésus ti duti Gbia ti Royaume, nga lo yeke mû mbeni komandema na azo 144 000 so ayeke komande legeoko na Jésus (Luc 12:32). A yeke polele so Jéhovah afa na Jésus kua ti Gbia nga na ti Kota Prêtre (aHéb. 5:8, 9). Lo fa nga na azo so ayeke komande legeoko na Jésus tongana nyen ti sara kua ti ala, na lo gi pëpe ti bâ anzene nzene ye kue na ndö ti fason so ala yeke sara na kua ni. Me lo yeke na confiance so ala yeke sara ande ye so bê ti lo aye.—Apoc. 5:10.

6-7. Tongana nyen la amokonzi ti sewa, a-ancien nga na ababâ na amama alingbi ti mû tapande ti Jéhovah?

⁶ Tongana Babâ ti e ti yayu, so abezoin ape ti tene mbeni zo amû maboko na lo, amû komandema na azo, a yeke kota ye mingi ti tene e nga e sara tongaso. Na tapande, eskê mo yeke mokonzi ti sewa wala ancien ti congrégation? Mû tapande ti Jéhovah na lege so mo mû akua na ambeni zo na gi pëpe ti bâ anzene nzene ye kue na ndö ti fason so ala yeke sara na kua ni. Tongana mo sara ye tongana Jéhovah, azo so mo mû kua na ala ayeke sara ni, mo yeke fa ye na ala nga ala yeke bâ so ala lingbi ti sara mbeni nzoni ye (És. 41:10). Mbeni ye nde wa la azo so ayeke na mbeni komandema alingbi ti manda na mbage ti Jéhovah?

⁷ Bible afa so Jéhovah abâ na nene ni bango ndo ti amolenge ti lo so ayeke a-ange (1 aGbia 22:19-22). Ababâ na amama, tongana nyen la ala lingbi ti mû tapande ti Jéhovah? Na yâ ti ambeni ye, ala lingbi ti hunda na amolenge ti ala ti fa bango ndo ti ala na ndö ti fason ti sarango mbeni kua. Nga, tongana a yeke na lege ni, ala sara ni tongana ti so amolenge ni afa.

8. Tongana nyen la Jéhovah akanga bê na yâ ti sarango ye ti lo na mbage ti Abraham na Sara?

⁸ Jéhovah afa nga so lo sara terê ti lo kete na lege so lo kanga bê. Na tapande, Jéhovah ayeke kanga bê na ngoi so, na nengo zo, awakua ti lo abâ so adesizion so lo mû ayeke na lege ni kue ape. Lo mä lani Abraham na ngoi so lo yeke fa agingo bê ti lo na ndö ti desizion ti futingo Sodome na Gomorrhe (Gen. 18:22-33). Nga, dabe ti mo na fason so Jéhovah asara ye lani na mbage ti Sara, wali ti Abraham. Na ngoi so Jéhovah amû zendo na Sara lo tene lo yeke mû ngo na lâ ti mbakoro ti lo, tënë ni asara lo ngia me bê ti Jéhovah ason lani ape (Gen. 18:10-14). Me lo sara ye na Sara na nengo zo.

9. Nyen la ababâ na amama nga na a-ancien alingbi ti manda na lege ti tapande ti Jéhovah?

⁹ Ababâ na amama nga na a-ancien, nyen la ala lingbi ti manda na lege ti tapande ti Jéhovah? Gbu li na ndö ti ye so mo yeke sara tongana azo so mo yeke na komandema na ndö ti ala ayeda ape na adesizion ti mo. Eskê kozo ye so mo yeke sara ayeke ti fa na ala so ala yeke na raison ape? Wala mo yeke gi ti comprendre ala? Biani asewa nga na acongrégation ayeke wara ye ti nzoni tongana ala so ayeke na komandema amû tapande ti Jéhovah. Juska ge, e sara tënë na ndö ti aye so e lingbi ti manda na lege ti tapande ti Jéhovah so asara terê ti lo kete. Fadeso, zia e bâ aye so e lingbi ti manda na ndö ti bango terê ti e kete na lege ti atapande so ayeke na yâ ti Bible.

AYE WA LA E LINGBI TI MANDA NA LEGE TI TAPANDE TI AZO?

10. Tongana nyen la Jéhovah asara kua na tapande ti azo ti fa ye na e?

¹⁰ Jéhovah, so ayeke “Kota maître” ti e, azia na yâ ti Bible atapande ti tene afa ye na e (És. 30:20, 21). Tongana e gbu li na ndö ti ambaï ti Bible so asara tënë ti azo so asarango ye ti ala anzere na Nzapa, so na popo ni mo yeke wara bango terê ti e kete, e yeke manda ye dä. Nga tongana e gbu li na ndö ti ye so asi na azo so ayeke na anzoni sarango ye ape, e yeke manda nga ye dä.—Ps. 37:37; 1 aCor. 10:11.

11. Nyen la e lingbi ti manda na lege ti sioni tapande ti Saül?

¹¹ Gbu li na ndö ti ye so asi na Gbia Saül. Na ngoi so lo yeke lani maseka, lo bâ terê ti lo kete. Lo hinga awokongo ti lo nga mbeto asara lo ti sara ambeni kua (1 Sam. 9:21; 10:20-22). Me kete na peko ti so lo ga gbia, lo ga zo ti baba nga lo sara aye so lo yeke na droit ti sara ni ape. Mbeni lâ, lo kanga bê gbä na ngoi so lo yeke ku prophète Samuel. Ahon ti tene Saül asara confiance na Jéhovah ti sara ye ndali ti azo ti lo, lo yâa sandaga so a zö ni agbi kue atâa so lo yeke na droit ti sara ni ape. Ye so asara si lo nzere na lê ti Jéhovah encore ape nga Jéhovah ake ti tene lo ngbâ gbia (1 Sam. 13:8-14). Tongana e manda ye na lege ti tapande ti gbotongo mê so nga e sara pëpe aye so e yeke na droit ape ti sara ni, andâ e sara ye na ndara.

12. Tongana nyen la Daniel afa so lo bâ terê ti lo kete?

¹² Nde na sioni tapande ti Saül, gbu li na ndö ti nzoni tapande ti prophète Daniel. Na yâ ti fini ti Daniel kue, lo yeke mbeni wakua ti Nzapa so asara terê ti lo kete nga lo bâ ndo lakue na mbage ti Jéhovah ti wara fango lege. Na tapande, na ngoi so Jéhovah asara kua na Daniel ti fa nda ti bango li ti Nébucadnezzar, lo tene lani ape so lo la lo fa ndani gï lo wani. Me lo bâ terê ti lo kete lo mû gloire ni kue nga na gonda ni kue na Jéhovah (Dan. 2:26-28). Nyen la e manda dä? Tongana aita aye mingi ti mä adiskur ti e wala fango tënë ti e alë lengo, a lingbi e girisa ape ti mû gloire ni kue na Jéhovah. A lingbi e hinga so sân mungo maboko ti Jéhovah e lingbi pëpe ti sara aye so (aPhil. 4:13). Tongana e sara tongaso, e yeke mû peko ti nzoni tapande ti Jésus. Na lege wa?

13. Nyen la e manda na ndö ti bango terê ti e kete na lege ti atënë ti Jésus so ayeke na Jean 5:19, 30?

¹³ Atâa so Jésus ayeke Molenge ti Nzapa so ayeke mbilimbili-kue, lo zia bê ti lo na ndö ti Jéhovah. (Diko Jean 5:19, 30.) Lo gi lâ oko ape ti gbugburu komandema na Babâ ti lo ti yayu. A-Philippien 2:6 atene na e so Jésus ‘abi bê ti lo ti gbugburu ndo pëpe, so ti tene ti lingbi terê na Nzapa.’ So Jésus ayeke Molenge so awoko terê ti lo na gbe ti Babâ ti lo, lo hinga so Nzapa amû lege na lo ti sara aye kue ape nga lo ne komandema ti Babâ ti lo.

14. Na ngoi so a hunda na Jésus ti sara ye so lo yeke na droit ti sara ni ape, lo tene nyen?

¹⁴ Gbu li na ndö ti ye so Jésus asara na ngoi so Jacques na Jean nga na mama ti ala ahunda Jésus ti mû na ala mbeni ye so lo yeke na droit ti mû na ala ape. Na lê ni lê ni Jésus atene so gï Babâ ti lo ti yayu la alingbi ti mû desizion na ndö ti zo so ayeke duti ande na maboko ti lo ti koli nga na ti wali na yâ ti Royaume (Mat. 20:20-23). Jésus asara ye lani pëpe ahon ti so Nzapa amû lege na lo ti sara. Lo bâ lani terê ti lo kete. Lo sara lâ oko ape ye so Jéhovah amû yanga na lo ape ti sara ni (Jean 12:49). Tongana nyen la e lingbi ti mû peko ti nzoni tapande ti Jésus?

15-16. Tongana nyen la e lingbi ti sara ye alingbi na wango ti Bible so ayeke na 1 aCorinthien 4:6?

¹⁵ E yeke mû tapande ti Jésus tongana e sara ye alingbi na wango so ayeke na 1 aCorinthien 4:6. Versê ni atene: “Ala sara ye ahon ti so a sû na mbeti pëpe.” Tongaso tongana mbeni zo ahunda wango na e, e doit lâ oko ape ti luti nganganga na ndö ti bango ndo ti e wala ti sara tënë sân ti gbu li. Me a lingbi e fa na zo ni awango so ayeke na yâ ti Bible nga na ambeti ti e. Tongana e sara tongaso, andâ e fa so e comprendre so e hinga ye kue ape. So e bâ terê ti e kete e hinga so ‘ambela ti Nzapa’ so ngangu ti lo ahon angangu kue ayeke lakue nzoni mingi.—Apoc. 15:3, 4.

¹⁶ Na ndö ti so bango terê ti e kete amû gloire na Jéhovah, ambeni nzoni raison ayeke dä ti bâ terê ti e kete. Fadeso, e yeke bâ tongana nyen la sarango terê kete nga bango terê ti e kete alingbi ti sara si e duti na ngia nga ti mû maboko na e ti duti na nzoni songo na amba ti e.

ANZONI YE TI PEKO TI SARANGO TERÊ KETE NGA NA BANGO TERÊ TI E KETE

17. Ngbanga ti nyen la azo so asara terê ti ala kete nga abâ terê ti ala kete ayeke na ngia?

¹⁷ Tongana e sara terê ti e kete nga e bâ terê ti e kete, a yeke duti ngangu na e ape ti duti na ngia. Ngbanga ti nyen? Tongana e yeda so ambeni ye ayeke dä so e peut ti sara ni ape, e yeke kiri singila ndali ti mungo maboko kue so azo amû na e. Na tapande, gbu li na ndö ti ngoi so Jésus asava lani azo ti buruma bale-oko. Gï oko na popo ti ala la aga na terê ti Jésus akiri singila na lo ndali ti so lo sava sioni kobela ti lo, mbeni ye so lo wani lo lingbi lâ oko ape ti sara ni. Koli so, so asara terê ti lo kete nga abâ terê ti lo kete, akiri singila ndali ti mungo maboko so lo wara, nga lo mû gloire na Nzapa ndali ni.—Luc 17:11-19.

18. Tongana nyen la ti sara terê ti e kete nga ti bâ terê ti e kete amû maboko na e ti duti na nzoni songo na azo? (aRomain 12:10).

¹⁸ Azo so asara terê ti ala kete nga abâ terê ti ala kete ayeke na nzoni songo na azo, nga a yeke ngangu na ala ape ti wara akota kamarade. Ngbanga ti nyen? Ala yeda na bê ti ala wani so amba ti ala ayeke na anzoni sarango ye nga ala yeke na confiance na ala. Azo so asara terê ti ala kete nga abâ terê ti ala kete ayeke na ngia tongana amba ti ala asara akua so a mû na ala nzoni, nga ala yeke nduru ti gonda ala nga ti ne ala.—Diko aRomain 12:10.

19. Ambeni raison wa la ndali ni a lingbi e kpe ti sara baba?

¹⁹ Me azo ti baba abâ so a yeke ngangu na ala ti gonda azo, ala ye ti tene gï ala la azo agonda ala. A yeke ngangu na ala ape ti haka terê ti ala na amba ti ala nga ti maï bibe ti sarango mandako. Fani mingi, zo ti baba apensé so lo wani la lo doit ti sara mbeni kua ndali ti so, na lo, amba ti lo alingbi ti sara ni nzoni ape. Nga fani mingi, zo ti baba aye ti tene a bâ lo kota ahon amba ti lo nga lo yeke sara kota bê na terê ti amba ti lo (aGal. 5:26). A yeke ngangu na azo tongaso ti bata songo ti kamarade aninga. Tongana e bâ so baba asara e, a lingbi e sambela Jéhovah na bê ti e kue ti mû maboko na e ti “sara si bibe ti [e] akiri fini ni,” tongaso si sioni sarango ye so alï ngangu na yâ ti asarango ye ti e ape.—aRom. 12:2.

20. Ngbanga ti nyen la a lingbi e sara terê ti e kete nga e bâ terê ti e kete?

²⁰ E kiri singila mingi na Jéhovah ndali ti tapande ti lo. Fason so lo sara ye na awakua ti lo afa na e so lo sara terê ti lo kete, na e ye ti mû peko ti tapande ti lo. Na ndö ni, e ye ti mû peko ti nzoni tapande ti azo so Bible asara tënë ti ala so abâ lani terê ti ala kete na so ayeke lani na pasa ti tambela na Nzapa. Zia e mû lakue na Jéhovah nengo nga na gloire so lo lingbi na ni (Apoc. 4:11). Tongaso, e nga kue e lingbi ti tambela na Babâ ti e ti yayu so aye azo so asara terê ti ala kete nga abâ terê ti ala kete.