Na ndo wa la mo peut ti wara nzoni fango lege ndali ti kekereke?

Tongana ti so a-article so ahon afa, azo agi ti wara mbeni nzoni gigi ti kekereke na lege so ala sara confiance na tënë ti destin, mandango mbeti ayo, mosoro nga ti duti mbeni nzoni zo. Me, ti sara confiance na aye ni so, a yeke mo bâ mo tene mo ye ti gue na mbeni ndo so lâ oko ade mo si dä ape. Eskê aye ti tene so e peut ti sara ye oko ape ndali ti gigi ti e ti kekereke? Ên-ën!

FANGO LEGE SO ALONDO NA MBENI ZO SO AYEKE KOTA AHON E

Tongana e ye ti mû adesizion, mingi ni, e yeke bâ mbeni zo so ayeke kota zo na e nga so lo yeke na ndara. Legeoko nga, e peut ti wara nzoni fango lege ndali ti kekereke ti e na mbage ti mbeni zo so ayeke kota nga so ayeke na ndara ahon e. E peut ti wara wango ti lo na yâ ti mbeni buku so a iri ni Bible so a sû ni asara angu 3 500 tongaso awe.

Ngbanga ti nyen la mo lingbi ti sara confiance na Bible? A yeke ndali ti so Bible alondo na mbeni Zo so ayeke kota nga lo yeke na ndara ahon azo kue na yâ ti dunia. A fa lo tongana “Lo so ayeke dä ngbene ye giriri” so Lo yeke dä “ngbene ye lakue lakue nga lakue lakue”. (Daniel 7:9; Psaume 90:2). Lo yeke “Nzapa so asara yayu, lo yeke tâ Nzapa. Lo la lo leke sese.” (Ésaïe 45:18). Lo fa na e so iri ti lo ayeke Jéhovah.—Psaume 83:18.

Ndali ti so Bible alondo na Wasarango azo kue, Lo bâ mbeni mara na nzoni lê ahon ambeni ape. Azo na ndo kue ayeke wara lakue ye ti nzoni na lege ti awango ti lo. A yeke wara Bible na ayanga ti kodro mingi nga a kangbi ni mingi ahon ambeni buku.a Tongaso azo na ndo kue apeut ti diko ni ti tene afa lege na ala. Aye so ague oko na atënë so Bible atene:

“Nzapa ayeke sara kangbi na popo ti azo pëpe, me na yâ ti amara kue, zo so akpe mbeto ti lo na asara ye so ayeke mbilimbili, lo yeke nzere na lê ti Nzapa.”—KUSALA 10:34, 35.

Gï tongana ti so mbeni babâ so aye amolenge ti lo na lo yeke aidé ala, Jéhovah Nzapa ayeke mbeni Babâ ti ndoye so ayeke aidé e na lege ti Tënë ti lo, Bible (2 Timothée 3:16). Mo peut ti sara confiance na Tënë ti lo ndali ti so lo la lo sara e nga lo hinga ye so ayeke sara si e duti na ngia.

E LINGBI TI SARA CONFIANCE NA BIBLE

E lingbi ti sara confiance na Bible ti fa ye na e na ndö ti kekereke ndali ti so aye so lo sara tënë ni kozo asara angu 2 000 tongaso awe na ndö ti aye so ayeke si na yâ ti dunia nga na sarango ye ti azo, a yeke ni la e bâ ni laso.

AYE SO AYEKE SI

“Mara ayeke londo na bira na terê ti mbeni mara, na royaume ayeke londo na bira na terê ti mbeni royaume. Sese ayeke yengi ngangu, nga na ando nde nde na peko ti terê, kota nzara ayeke tï nga asioni kobela so amû ndo.”—LUC 21:10, 11.

SARANGO YE TI AZO

“Na lâ ti nda ni, angoi ti akpale so ayeke ngangu na zo ti kanga bê na yâ ni ayeke duti dä, ngbanga ti so azo ayeke duti ande azo so andoye gï terê ti ala wani, azo so andoye nginza, azo so abâ terê ti ala kota na ndö ti amba ti ala, azo ti baba, azo ti zongango Nzapa nga na azo, azo so ake yanga ti ababâ na amama ti ala, azo so ahinga ti kiri singila pëpe, azo so ayeke abe-ta-zo pëpe, azo so aye amba ti ala zo pëpe, azo so aye ti mä terê na amba ti ala pëpe, azo ti pango amba ti ala, azo so akanga nzara ti bê ti ala pëpe, azo so ayeke asioni zo, azo so andoye nzoni ye pëpe, azo ti kango amba ti ala, azo so li ti ala akpengba, azo so wuma ti ala ahon ndö ni, azo so andoye ngia ahon ti ndoye Nzapa.”—2 TIMOTHÉE 3:1-4.

Eskê a yeke possible so aye so Bible afa ti tene asi kekereke ayeke ga tâ tënë? Kite ayeke dä ape so mo kue mo yeke yeda na tënë ti Leung, mbeni koli na Hong Kong, so lo tene: “A sû aprophétie ti Bible asara angu mingi awe. A yeke impossible na zo ti fa aye so ayeke si kekereke ti tene aga tâ tënë tongaso. A sû Bible na gbe ti yingo ti Nzapa, mbeni zo so ayeke kota mingi ahon e.”

Na yâ ti Bible, a yeke wara gbâ ti aprophétie so aga tâ tënë awe.b Ye so afa so Bible ayeke biani Tënë ti Nzapa. Jéhovah atene: “Mbi yeke Nzapa, mbeni Nzapa tongana mbi ayeke dä pëpe. Na tongo nda ni, mbi fa tongana nyen ye ni ayeke hunzi”. (Ésaïe 46:9, 10). Tongaso, a yeke ndani la mo peut ti sara confiance na aye so Bible atene na ndö ti gigi ti kekereke.

FANGO LEGE SO AYEKE GA NA MO AYE TI NZONI LASO NGA LAKUE LAKUE

Tongana mo mû peko ti afango lege ti Bible ayeke ga na mo aye ti nzoni. Bâ ambeni tapande ni.

NZONI BANGO NDO NA NDÖ TI NGINZA NGA NA KUA

“Ti wu terê kete ayeke nzoni ahon sarango kua ahon ndö ni nga na tombango peko ti pupu.”—ZO-TI-FA-TENE 4:6.

LEGE TI SARA SI SEWA ADUTI NA NGIA

“A lingbi koli oko oko na popo ti ala andoye wali ti lo legeoko tongana ti so lo ndoye terê ti lo wani. Na mbage, a lingbi wali ane koli ti lo mingi.”—A-ÉPHÉSIEN 5:33.

LEGE TI DUTI NA NZONI SONGO NA AZO

“Zia lege ti ngonzo nga zia si ngonzo ahon ndö ti mo pëpe; zia bê ti mo ason pëpe si mo komanse ti sara ye ti sioni.”—PSAUME 37:8.

Ti sara ye alingbi na afango lege ti Bible ayeke ga na mo aye ti nzoni laso nga gigi ti mo ti kekereke ayeke duti ande nzoni. Na yâ ti Bible, e yeke wara azendo so Nzapa amû na ndö ti nzoni gigi ti kekereke so andu

SIRIRI NGA NA SÉCURITÉ

“Ala yeke duti na ngia mingi na yâ ti siriri so amû ndo.”—PSAUME 37:11.

AZO KUE AYEKE WARA DA NGA NA KOBE

“Azo ayeke leke ada, na ala yeke lango na yâ ni, nga ala yeke fâ ayaka ti vigne, na ala yeke te lengo ni.”—ÉSAÏE 65:21.

KOBELA WALA KUÂ AYEKE DUTI DÄ MBENI PËPE

“Kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe.”—APOCALYPSE 21:4.

Nyen la a lingbi mo sara ti tene gigi ti mo ti kekereke aga nzoni? Article ti peko ayeke fa ni.

a Ti hinga ye mingi na ndö ti traduction ti Bible nga na kangbingo ni, gue na ndö ti www.pr2711.com na gbe ti AYE SO BIBLE AFA > MBAÏ & BIBLE.

b Ti hinga ye mingi na ndö ni, bâ chapitre 9 ti buku La Bible: Parole de Dieu ou des hommes ? so aTémoin ti Jéhovah asigi na ni.A yeke nga na ndö ti www.pr2711.com na gbe ti BIBLIOTHÈQUE > ABUKU & ABROCHURE.