Afini membre use ti Bebungbi
NA MERCREDI, lango 18 ti janvier 2023, mbeni tokua so ayeke nde asigi na ndö ti jw.org, a tene Aita Gage Fleegle nga na Jeffrey Winder aga amembre ti Bebungbi ti aTémoin ti Jéhovah. Aita so use kue asara na Jéhovah be-ta-zo aninga awe.
Gage Fleegle na wali ti lo Nadia
Ita Fleegle akono na ouest ti Pennsylvanie, na États-Unis, babâ na mama ti lo ayeke azo so akpe mbeto ti Nzapa. Na ngoi so lo ngbâ maseka, sewa ti lo ague na mbeni kete gbata so a bezoin awafango tënë mingi dä. Ngoi kete na pekoni, lo wara batême na lango 20 ti novembre, ngu 1988.
Babâ na mama ti Ita Fleegle awa lo lakue ti sara kua ti ngoi kue. Fani mingi, ala tisa asurveillant ti circonscription nga na aBéthelite na ndo ti ala, na Ita Fleegle abâ so aita so ayeke na ngia mingi. Kete na peko ti batême ti lo, lo ga pionnier permanent na lango 1 ti septembre 1989. Ngu use na pekoni, lo si na ye so lo leke lani ti sara na ngoi so lo yeke na ngu 12, so ayeke ti sara kua na Béthel. Lo komanse lani kua ti lo na Béthel ti Brooklyn na octobre, ngu 1991.
Na Béthel, Ita Fleegle asara kua na ndo so a yeke tingbi ambeti dä ti fü ni ngu miombe, na pekoni a tokua lo na Ndokua ti kusala. Na ngoi ni so, lo sara kua na congrégation so ayeke tene yanga ti Russe teti ambeni ngu. Na ngu 2006, lo sara mariage na wali ti lo Nadia, so aga na peko ti lo na Béthel. Ala sara lani kua na congrégation ti Portugais, nga ala sara kua na congrégation so ayeke tene Espagnol ahon ngu bale-oko. Na peko ti so Ita Fleegle asara kua angu mingi na Ndokua ti kusala, a tokua lo na Bureau ti Komite ti fango ye nga na pekoni na Bureau ti Komite ti kusala. Na mars ngu 2022, a soro lo ti ga wamungo maboko na Komite ti kusala ti Bebungbi.
Jeffrey Winder na wali ti lo Angela
Ita Winder akono na Murrieta, na Californie, na États-Unis. Lo kono na yâ ti tâ tënë, na lo wara batême na lango 29 ti mars, ngu 1986. Nze oko na peko ti batême ti lo, lo ga pionnier auxiliaire. So lo ye ni mingi, lo ye ti ngbâ ti sara ni. Na peko ti so lo sara kua ti pionnier auxiliaire anze mingi, lo komanse kua ti pionnier permanent na lango 1 ti octobre, ngu 1986.
Na ngoi so Ita Winder ade lani maseka, lo gue lo sara vizite na ayaya ti lo ti koli use so ayeke sara kua na Béthel. Vizite so adü na yâ ti lo nzara ti sû demande ti sara kua na Béthel na ngoi so lo kono. Na mai ngu 1990, a tisa lo ti sara kua na Béthel ti Wallkill.
Na Béthel, Ita Winder asara kua na andokua nde nde, na tapande, ndokua so abâ tënë ti nettoyage, ti ferme nga na Bureau ti Béthel. Lo sara mariage na wali ti lo Angela na ngu 1997, na ngbene ye na ngoi ni so ala yeke sara kua na Béthel. Na ngu 2014, a tokua ala na Warwick, kâ Ita Winder amû maboko na yâ ti kua ti lekengo kota ndokua ti e. Na ngu 2016, a tokua ala na kota ndo ti fango ye ti aTémoin ti Jéhovah na Patterson, kâ Ita Winder asara kua na ndokua ti Audio/Vidéo. Ngu osio na pekoni, ala kiri na Warwick, na Ita Winder asara kua na Bureau ti Komite so abâ tënë ti awakua. Na mars 2022, lo ga wamungo maboko na Komite ti Bebungbi so abâ tënë ti awakua.
E sambela ti tene Jéhovah asara tufa mingi na ndö ti ‘akoli so a mû ala tongana amatabisi’ so na ngoi so ala ngbâ ti sara kua mingi ndali ti Royaume.—aÉph. 4:8.