Mbeni fini membre ti Bebungbi

NA MERCREDI na ndapre, na lango 24 ti janvier, ngu 2018, a nzere lani na sewa ti Béthel ti États-Unis nga na ti Canada ti mä kpengba tokua so: Ita Kenneth Cook aga mbeni membre ti Bebungbi ti aTémoin ti Jéhovah.

A dü Ita Cook na Pennsylvanie, na États-Unis nga lo kono kâ. Lo manda tâ tënë na lege ti mbeni mba ti lo ti ekole kozo ti tene lo hunzi ekole ti lo na lycée nga lo wara batême na lango 7 ti juin, ngu 1980. Lo komanse kua ti pionnier permanent na lango 1 ti septembre, ngu 1982. Na peko ti so lo sara kua ti pionnier ngu use, a iri lo ti sara kua na Béthel, lo komanse kua ti lo na Béthel na Wallkill, na New York, na lango 12 ti octobre, ngu 1984.

Na yâ ti angu 25 so aga na pekoni, Ita Cook asara akua nde nde na imprimérie nga na bureau ti Béthel. Lo sara mariage na Jamie, na ngu 1996, na lo na wali ni asara kua na Béthel na Wallkill. Na décembre ngu 2009, a tokua ala na ndo ti mandango ye ti Société Watchtower na gbata ti Patterson, na New York, kâ a zia Ita-koli Cook ti sara kua na ndokua ti tokuango ambeti. Na avril 2016, na peko ti so ala kiri na Wallkill aninga ape, a tokua Ita Cook na wali ti lo na Brooklyn, na New York. Nze oku na pekoni, a tokua ala na kota ndokua ti e na Warwick, na New York. Na janvier 2017, a mû Ita Cook ti mû maboko na Komite ti Bebungbi so ayeke bâ ndo na ndö ti sungo ambeti.