Lettre ti Wabatango Bungbi

Aita so e ndoye i mingi:

“GRÂCE na siriri ti Nzapa Babâ ti e na ti Seigneur Jésus Christ aduti na i.” (1 aCor. 1:3). E yeke ku kungo ngoi so fade ye kue so ahu pupu ayeke mû na Jéhovah gloire so lo lingbi na ni (Ps. 150:6). Na ngoi so e yeke ku kota lâ ni so, e ngbâ ti fa nzo tënë ti Royaume ti Nzapa na ti sala adisciple.

Fango nzo tënë ayeke laso kota kusala na popo ti akusala ti Jéhovah na sese ge (Marc 13:10). Teti so e hinga nzoni mingi tongana nyen Jéhovah ayeke bi bê ti lo na ndo kusala so, e yeke sambela lakue ndali ni, teti e hinga so zo oko oko alingbi ti wara nzoni na aye so a leke na lege ti kota ngele (Apoc. 14:6, 7, 14, 15). Biani, e yeke tingbi na akpale, me e yeke biani na bê ti kiri singila ti duti azo so a ‘yü ala na ngangu ti nduzu’ ti sala na kusala so.​—Luc 24:49.

A yeke ye ti ngia mingi ti kiri ti bi lê na ndo ngu ti kusala so ahon na ti gbu li na ndo ye so Jéhovah asala na lege ti awakua be-ta-zo ti lo. Na lege ti ngangu ti yingo vulu, azo ti Nzapa afa na gigi mara ti ndoye ti Christ, na hongo ndo ti kengo tele na ndo kue. A bâ lani polele ndoye so na ngoi ti akota bungbi ti e. Ti londo na juin ti si na décembre 2003, ambeni ita so alondo na akodoro so wungo ni ahon ngbangbo oko ague lani na a-assemblée internationale 32 so a sala ni na Afrika, Amerika ti Banga, Amerika ti Mbongo, Asie, Australie nga na Poto. Na akota bungbi so, a hunda tënë na amissionnaire, awakua ti lekengo ada teti kusala ti vorongo nga na aBéthelite so ayeke sala kusala na kodoro wande.

Na akota bungbi so, e wara lani ambeti ‘Voyez le bon pays’ na Mä Kota Wafango ye. Na ndo ni, a tene na e so a yeke kiri ti leke yâ ti atënë ti buku Ekole teti aPionnier, na a leke ti sigigi na ni na hunzingo ti ngu ti kusala 2004. Yeke yeke, a yeke bungbi ande angbele pionnier so asala ekole so awe na afini pionnier so ayeke sala ekole ni.

Na lege ti mungo maboko ti Nzapa nga na amatabisi so azo amû, a wara lege ti leke gbâ ti aDa ti Royaume, mbilimbili na yâ ti akodoro so ayeke na kpale ti nginza. Teti so na ndo sese kue bezoin ti kobe ti yingo ayeke mingi, apialo ti konongo yâ ti ada ti filiale ague na li ni na yâ ti akodoro mingi. Brochure Ouarango Ngia na ndo Sesse teti La Koue! asigigi fadeso na ayanga 299, na wungo ni kue asi kutu 139; wungo ti buku Hingango Ye So Ague na Fini ti Lakue Lakue ahon kutu 93, na ayanga 161; na brochure Ye Wa Nzapa Ahunda na E?, kutu 200 nga na ayanga 267.

Na wâ, e tene nzoni gango na azo 258 845 so, na yâ ti ngu ti kusala so ahon, afa na gigi mungo tele ti ala na Nzapa na lege ti batême! Atâa so mungo mbage ti Royaume ti Nzapa asala si i ga mbilimbili azo so Satan ake ala, a sala nga si i ga mbilimbili azo so awara deba nzoni nga na batango ndo ti Jéhovah na lege ti yingo, na ngoi so i yeke kpe loro so a zia na gbele i (aHéb. 12:1, 2; Apoc. 12:17). Biani, i duti na beku so “Lo so abata [i], Lo lango pëpe.”​—Ps. 121:3.

Versê ti ngu 2004, “I lango pëpe . . . I fa so i yeke duti ndulu,” alingbi biani na ngoi ni (Mat. 24:42, 44, NW ). Tënë ti Nzapa afa aChrétien tongana awande na azo ti lege na yâ sese so ayeke gue ti futi (1 Pi. 2:11; 4:7). Tongaso, a yeke kota ye teti e ti bata lê ti e gi na ndo aye ti yingo, ti bata si fini ti e asi na aye mingi pëpe na ti gi nda ti bê ti e. “Kota ngbo” aye mingi ti te e, na gango na e na yâ bungbi ti aye ti lo.​—Apoc. 12:9.

Dikongo Bible lâ oko oko ayeke kota ye ti tene e bata dutingo na donzi ti e. Salango tongaso alingbi ti mû maboko na e ti sala si “tongana i tene, Oui, a lingbi i tene gi oui,” ti sala ye alingbi na mungo tele ti e na Nzapa na ti “bata ngangu juska na nda ni ziango bê kue so e yeke na ni na tongo nda ni”. (Jacq. 5:12; aHéb. 3:14, NW ). Dikongo Bible lâ oko oko alingbi ti mû maboko na e ti bâ tongana nyen sese so ague yongoro mingi na asalango ye so Nzapa ahunda, so alingbi ti gbian pëpe (Mal. 3:6; 2 Tim. 3:1, 13). Hingango ye na ndo Bible ayeke mû maboko na e ti kpe ‘atënë ti pande so a leke na mayele’ na ti ngbâ be-ta-zo na Jéhovah.​—2 Pi. 1:16; 3:11.

Ababâ na mama, na ngoi so i yeke bata amolenge ti i na yâ wango-tene nga na fango lege ti Jéhovah, i yeke mû maboko na ala ti zia aye ti yingo na gbele ala na ti “lango pëpe”? (aEph. 6:4). I yeke mû maboko na ala ti bâ kekereke ti ala tongana ti so Jésus, lo so lo yeke na ndara ahon tanga ti azo kue ti sese, abâ lani na ti lo? Jésus alingbi fade ti ga kota zo ti kpakango keke, kota wasigingo na aye wala kota docteur so ahon tanga ti azo kue. Nde na so, lo bi tele ti lo na yâ kusala ti ngoi kue. Zia tapande ti lo apusu i ti mû maboko na amolenge ti i ti zia aye ti Royaume na kozo ndo na yâ fini ti ala.

Bungbi ti ngbâ be-ta-zo, so Wabatango Bungbi ayeke sala kusala na iri ti lo, akiri singila mingi na “azo mingi so asi singo” so ayeke mû maboko na e ti yô kungba ti e so ayeke ti sala si “a fa Tene-nzoni so ti royaume na sese so kue teti tënë ti témoin na amara kue”. (Apoc. 7:9; Mat. 24:14, 45). I yeke azo so Jéhovah amû na i beku so lo yeke dabe ti lo na “kusala ti i, ndoye so i fa giriri teti iri ti Lo, teti i sala kusala teti azo ti be-vulu, na i [ngbâ] ti sala tongaso.” (aHéb. 6:10). Tongana i yeke diko aye so asi so amû wâ na bê na i yeke bâ lengo ti angangu so i bungbi oko na yâ ti alembeti so aga na peko, i yeke hinga so i sala mbeni kota kusala na yâ fango tënë ti témoin so na ndo sese kue.

Zia i bâ gigi ti kekereke na mbito pëpe na ngoi so i ngbâ ti “zia bê ti [i] na futa so ayeke ga”, na i zia lege pëpe na zo wala na yingo sioni ti gbanzi i na ni (aHéb. 11:26; aCol. 2:18). Ni la, i zia bê ti i na Jéhovah, na hingango na bê kue so lo yeke mû ande maboko na ala kue so andoye lo ti wara fini so alingbi kue.​—Jean 6:48-54.

Zia i hinga biani so e yeke na ngia ti sala kusala legeoko na i teti gloire ti Jéhovah.

Aita ti i,

Wabatango Bungbi ti aTémoin ti Jéhovah