Lettre ti Wabatango Bungbi
TETI so e yeke ndulu ti lï na yâ fini sese, a yeke biani kota ye mingi ti ku Jéhovah (Soph. 3:8). Prophète Daniel atene lani so “Nzapa . . . afa tënë ti lingo na gigi, na Lo fa . . . ye so ayeke ga na lâ ti nda ni.” (Dan. 2:28). So kota matabisi ti duti na fini na hunzingo ti ngoi so a fa tënë ni giriri na ti gbu nda ti atënë ti lingo ti Nzapa, so Jéhovah ayeke zi nda ni na e!
Na lege ti “ngbâa be-ta-zo na ti ndara” Jéhovah afa yeke yeke na e ye so lo leke ti sala: bungbingo na “lâ ti nda ni” so mbeni bungbi ti “azo mingi so asi singo” so alondo na popo ti amara kue (Mat. 24:45, NW; Apoc. 7:9; 2 Tim. 3:1). Esaïe 2:2, 3 afa so bungbingo azo ni so ayeke si na “lâ ti nda ni”. Ngu oko oko bungbingo azo so ayeke ngbâ lakue ti gue na li ni na popo ti awusuwusu nga na salango ngangu so amû yâ ti sese kue.
Na yâ ti ngu 2004 a fa na e mbilimbili nene ti yengo dä na atënë ti Jésus so: “I lango pëpe . . . i fa so i yeke duti ndulu.” (Mat. 24:42, 44, NW ). Biani, ye so ayeke si fadeso na yâ sese so, nda ni ayeke kota mingi teti aChrétien so ahinga nda ti “fä ti fadeso” wala afä ti ngoi ti e, na ti sala ye alingbi na ni (Mat. 16:1-3). Tongana ti so lo fa ni na yâ Tënë ti lo, Jéhovah ayeke ngbâ lakue ti mû maboko na azo ti lo so lo leke ala awe teti kusala atâa akangango lege kue so ala lingbi ti wara ni.
Atâa angangu so azo ayeke sala ti kanga lege na fango tënë ti Royaume, aita ti e angbâ ti fa tâ tënë na ti sala abungbi (Kus 5:19, 20; aHéb. 10:24, 25). Na juin 2004, na Russie mbeni kota da-ngbanga ti kodoro ti Moscou ayeda na peko ti ngbanga so mbeni kete da-ngbanga ti kodoro ni adë lani na ndo ti aTémoin ti Jéhovah ti kanga lege na kusala ti ala ti fango tënë nga ti zi iri ti ala na popo ti abungbi so ndia ti kodoro ni ayeda na ni. Ye oko, aita ni anze pëpe; ala hinga ye so Jéhovah ayeke ku na mbage ti ala na ala mä yanga ti lo tongana mokonzi ahon ti mä azo (Kus. 5:29). E hinga biani so tongana awato ti ala ague na ala na gbele ngbanga, Jéhovah ayeke fa ande lege na awakua ti lo.
Na yâ ti angu so ahon, na kodoro ti Géorgie aita ti e agirisa akungba ti ala, azo asala ye ti ngangu na ala nga agbi abuku ti ala na gbe ti lê ti ala. Ye oko, aye ti bira kue so azo aga na ni na ndo ti ala asala ye oko pëpe (Es. 54:17). Na yâ ti ngu ti kusala 2004, ndia ti kodoro ti Géorgie azi lege na aTémoin ti Jéhovah. Ala sala akota bungbi ti district sân ti tene azo abuba yâ ni, na ambeti ti e awara lege ti lï yamba na yâ ti kodoro ni. A wara fini guengo na li ni ti wungo ti awafango tënë nga ti azo so aga na Mémorial.
Na Arménie, Érythrée, République ti Corée, Rwanda nga na Turkmenistan, a bi aita ti e na da ti kanga ndali ti mabe ti ala. Atâa so a sala sioni na ala, na lege ti Mbeti ti Nzapa ala hinga ndali ti nyen ala yeke wara atara so, na a mû lege na ala ti bata dutingo be-biani ti ala teti so ala yeke bâ ndo na mbage ti Jéhovah ti zi ala.—1 Pi. 1:6; 2 Pi. 2:9.
Tongana mo bâ tondo teti ngu ti kusala 2004 na yâ Tour ti Ba Ndo ti 1 février 2005, mo yeke wara ngia na yâ nzobe ti Jéhovah (Ps. 31:20; 65:12). E yeke na beku so tondo so ayeke mû wâ na mo ti ngbâ ti tambela na lege so anzere na Nzapa.—1 aThes. 4:1.
A ngbâ lakue ti sala ngangu ti fa tâ tënë na azo nde nde kue. Na tapande, a leke akasete vidéo, alimon so a pete ni na ndo DVD, ambeni gbakuru teti yanga ti awambongi nga na abuku so a sû ni na mbeni kode so awaziba si ayeke diko ni ti mû maboko na lege ti yingo na azo ti kangango mê nga na azo so lê ti ala abuba. Mingi ti awafango tënë ti Royaume amanda ayanga ti kodoro ti awande so alango na yâ ti territoire ti ala.
Nga, na yâ ti aterritoire so a yeke ngangu ti gue dä, a zia na sese agroupe mingi mingi. A yeke wara na yâ ti territoire ti mbeni filiale agroupe ahon 300 so ayeke na yongoro ndo na so abungbi awafango tënë ahon 7 000. So beku teti afini kongregation ti bâ gigi! Na ndo ni, wungo ti azo kue so ague na Mémorial ti ngu ti kusala so ahon ayeke 16 760 607. Azo ahon kutu 10 na popo ti ala ayeke aTémoin ti Jéhovah pëpe. Ye so afa polele so yaka ni abe awe na a hunda ti fâ lê ni.
E yeke mû singila na Jéhovah teti deba nzoni nga na bingo bê ti ndoye so lo yeke fa na mbage ti e lâ na lâ (aProv. 10:22; Mal. 3:10; 1 Pi. 5:7). Tongana na beoko e ngbâ ti gue na li ni na lâ ti nda ni so, e yeke zia beku ti e kue na Jéhovah. Atâa kpale ti e ni ayeke so wa, zia e bata na li ti e versê ti ngu 2005 so: ‘Ye ti bata mbi alondo na Jéhovah.’ (Ps. 121:2). E yeke ngbâ lakue ti fa ndoye ti e na mbage ti i nga ti sambela teti i.
Aita ti i,
Wabatango Bungbi ti aTémoin ti Jéhovah