Lettre ti Bebungbi

Aita so e ye ala mingi,

E yeke biani na kota ngia ti sû mbeti so na ala! Bibe ti e ague oko na ti bazengele Jean so atene lani na amba ti lo Chrétien atene ni “ndoye ala mingi,” na ni yeke na ngia so ala yeke “tambela na yâ ti tâ tënë”. (2 Jean 1, 4). Biani, tâ tënë ayeke mbeni ye ti ngere ngangu mingi na lê ti e kue. Tâ tënë ni azi e na gbe ti Babylone, Ngangu gbata, na gbe ti afango ye ti lo nga na ti angobo ti lo so asara si iri ti Nzapa abuba. Sarango ye alingbi na tâ tënë ni amû lege na e ti ga azo so ayeke na ndoye, so ayeke na bê so aye gi ti sara nzoni na zo nga so ayeke sara nzoni bê na amba ti ala. Nga, tâ tënë ni azi lege na e ti ga nzoni-kue na lê ti Nzapa na ti wara beku ti fini ti lakue lakue.

E kiri nga singila mingi na Jéhovah ndali ti yingo ti lo so ayeke fa lege na e lâ na lâ nga ayeke kpengba e. E hinga biani so na Kota Bungbi ti District “Yingo ti Nzapa afa lege na e” so ahon a ninga pëpe, a nzere lani na ala mingi ti bâ oko na oko alege nde nde so Jéhovah ayeke fa lege na e nga lo yeke kpengba e na lege ti yingo ti lo. So aye ti dunia so ayeke ga gi sioni ahon ti kozo, a yeke kota ye ti zia bê ti e kue na yingo ti Jéhovah so ayeke ngangu mingi ti fa lege na e na yâ ti angoi ti ngangu so ayeke ku e.

E hinga so bê ti ala adö mingi na dikongo na yâ ti Annuaire nga na ambeni mbeti ti e atondo ti aye so asi na aita so agbu ngangu na yâ ti apasi so a sara na ala ndali ti mabe ti ala. A yeke tâ ye ti dongo bê ti bâ so mingi ti aita be-ta-zo so awara lani akpale ni gi kete na peko ti so ala wara batême, ti ambeni lani ade ala wara batême pëpe. E ndoye aita so mingi ndali ti so ala duti be-ta-zo nga so ala luti nganganga ngbanga ti sarango ye ti mbilimbili. Biani, apendere tapande so akiri amû ngangu na e ti leke na bê ti e ti duti be-ta-zo na Royaume ti Jéhovah atâa nyen si alingbi ti si na e.​—1 aThes. 1:6-8.

Aita, e hinga so akpale ayeke mingi, akpale ti konomi nga na ambeni nde, so ala yeke luti na gbele ni na ngoi so ala yeke sara kue ti tene sewa ti ala aduti beoko na yâ ti ndoye. Ti ambeni na popo ti ala, mungo mbage na kusala ti fango tënë ti Royaume na ambeni kpengba kua ti congrégation nga ti sara ni lakue ayeke kete ye pëpe. Ndani la si, na peko ti so e pika patara mingi nga e sambela mingi na ndo ni, e gbian ambeni ye na yâ ti kapa ti abungbi ti congrégation ngbene ye na lango 1 janvier 2009. E hinga biani so ala yeke sara kue ti bâ nzoni na lege ti agbiango ye so si ala mû ngoi mingi ti manda Bible ala wani wala na sewa.

Na ngu so ahon so, e yeke na ngia mingi ti bâ azo mingi so awara batême na akota bungbi nde nde. Na popo ti azo so, ambeni angbâ maseka mingi. Ala, ababâ na amama, ala lingbi biani na gonda ndali ti so ala fa na amolenge so ti bâ tâ tënë na nene ni na ala mû maboko na ala ti mû tere ti ala na Jéhovah na ti sara na lo na ngoi so ala ngbâ kete. Amolenge ni so awara atara mingi na ekole; me so ala gue juska na batême afa polele so a fa lege nzoni na ala na yâ ti sewa.​—Ps. 128:1-6.

E ye ti girisa nga pëpe wungo ti awamandango Bible so ayeke gue gi na li ni, so mingi ni ayeke ndali ti ngangu kua ti amissionnaire na apionnier spécial. E oko oko kue na Bebungbi ge, e bâ na nene ni mingi ngangu kua so aita na ndo ti sese mobimba ayeke sara ti hunda na azo ti nzoni bê ti “Ga!”, na iringo ala kue so nzara ti ngu asara ala ti “nyon ngu so amû fini na zo,” ti “nyon ni senge senge.” (Apoc. 22:17). E yamba na ngia na bê azo 289 678 so awara batême na ngu so ahon si ala lï na yâ ti sewa ti e ti aita ti ndo ti sese kue!

A lingbi e dabe ti e lakue na atënë ti bazengele Jean so: “Dunia so angbâ ti hon nga na nzara ti lo kue. Me zo so asara ye so bê ti Nzapa aye, lo ngbâ lakue lakue.” (1 Jean 2:17). Nga, a lingbi e dabe ti e so e si tâ nduru mingi awe na ngoi so fade ‘dunia so ahon’. A yeke biani lege ti ndara ti zia si fini ti e aluti gi na ndo ti ye so bê ti Nzapa aye nga ti “lango pëpe”. (Mat. 24:42). Tongana e sara tongaso, e yeke wara ande vundu même kete tongaso pëpe, na e yeke wara aye ti nzoni so ayeke ga ndali ti nzoni bê ti Jéhovah.​—És. 63:7.

E hinga biani so apendere tondo so alondo na akodoro mingi si ayeke na yâ ti Annuaire ti ngu so ayeke kpengba ala kue ti zia aye ti Royaume na kozo ndo na yâ ti gigi ti ala. E ye ti tene na ala so e ye ala mingi, na lakue e yeke bi bê ti e na ala nga e yeke sara tënë ti ala na yâ ti asambela ti e. Zia Jéhovah airi tënë nzoni mingi mingi na ndo ti ala.

Aita ti ala,

Bebungbi ti aTémoin ti Jéhovah