Lettre ti Bebungbi

Aita so e ye ala mingi:

So tâ pendere ngoi! Nga so tâ ngia si e yeke na ni! Biani, aita ti e ti koli na ti wali so e ye ala mingi, a nzere na e ti sara kua na ala “beoko wala [maboko na maboko, FD]” na yâ ti fango tënë ti témoin ti Babâ ti e ti yayu, Jéhovah, tënë ti témoin so mbeni ti lingbi na ni ayeke pëpe.​—Soph. 3:9; Jean 14:12.

So e yeke sara na Jéhovah na ngia aye pëpe ti tene so e yeke na angangu kpale pëpe. Na yâ ti ngu ti kusala so ahon, ambeni ita abâ pasi ndali ti yengingo ti sese, sukungo ti ngu, akota pupu nga na ambeni kpale tongaso, so alingbi ti sara sioni na zo (Mat. 24:7). Aita mingi ayeke tirika lâ na lâ na kpale ti kobela nga na ti mbakoro. E kue e yeke tirika na “aye ti vundu so akpa songo yâ so agbu wali so aye ti dü” na so ayeke gue gi guengo na li ni (Mat. 24:8). Na yâ ti akodoro mingi so na popo ni mo yeke wara Arménie, Érythrée nga na Corée ti Mbongo, a bi aita mingi na da ti kanga ndali ti tënë ti mabe ti ala.​—Mat. 24:9.

Atâa so e wara akpale so, nyen la amû maboko na e ti duti lakue na nzoni bango ndo? Versê ti ngu 2010 adabe ti e na mbeni kpengba ye ni oko: ‘Ndoye agbu ngangu na yâ ti aye kue. Ndoye ayeke hon lâ oko pëpe.’ (1 aCor. 13:7, 8). Biani, ndoye so e yeke na ni na popo ti e nga ndoye so e yeke na ni na mbage ti Jéhovah la amû ngangu na e ti gbu ngangu na yâ ti aye so kue.

Ti azo mingi so atene ala yeke aChrétien, bê ti ala adö ti bâ so fango tënë ti e amû ndo nga so e ngbâ lakue ti fa tënë. Atâa so ala yeda pëpe na atënë ti mabe ti e nga na afango ye ti e, ye so apusu ambeni ti tene so: “Kusala so e lingbi fade ti sara la si ala yeke sara so!” Mbeni ye wa amû maboko na aTémoin ti Jéhovah ti ngbâ ti fa tënë lâ na lâ? Kiringo tënë ni ayeke gi ndoye. Legeoko tongana Babâ ti e ti yayu, e ye si zo oko na popo ti ala akui pëpe (2 Pi. 3:9). So e ye si azo kue achangé bê ti ala asigigi polele na yâ ti fini guengo na li ni ti wungo ti awafango tënë so ayeke 7 508 050 so e wara na ngu ti kusala so ahon. Mbeni bungbi ti vorongo Nzapa wa ayeke na azo mingi, so na ndoye nga na bê ti ala wani ala yeke bi tere ti ala na yâ ti kua ti fango tënë?

A wa e ti bâ tongana nyen so prophétie so Ésaïe afa ni kozo awe angbâ ti ga tâ tënë, lo tene: “Na lâ ti nda ni, fade tënë asi tongaso, fade A sara si hoto ti da ti L’Éternel aga li ti ahoto, na fade A yä hoto so na nduzu ahon ambeni hoto kue; na fade amara kue ague kâ tongana ngu so asua.” (És. 2:2-4). Na popo ti azo mingi mingi so ayeke gue na da ti Jéhovah tongana ngu so ayeke sua, a yeke wara azo 294 368 so awara batême na yâ ti ngu ti kusala so ahon. E ye ala mingi, e tene na ala gango nzoni na popo ti e. Zia si ndoye ti e aChrétien apusu e ti ngbâ ti mû maboko na ala ti tene ala sara ngangu ti hon ndo ti akpale so wato ti e Satan Zabolo ayeke ga na ni.​—1 Pi. 5:8, 9.

Wungo ti azo kue so aga na Mémorial so asara na mardi lango 30 ti mars 2010 ayeke 18 706 895. Ye so afa so azo kutu mingi alingbi nga ti ga na popo ti e ti voro Jéhovah. So tâ ngia si e yeke na ni ti bâ so Jéhovah ade ti futi asioni ye ti ngoi so pëpe! Ti ku na ngoi ni so, ndoye ti e teti Jéhovah ayeke mû maboko na e ti ngbâ lakue ti gbu ngangu.​—2 aThes. 3:5.

Kota Bungbi ti District so mama-tene ni ayeke, “Bata nzoni songo na Jéhovah!” so a sara ambeni mingi na yâ ti ngu 2010 na ndo ti sese kue akpengba songo ti e na Babâ ti e ti yayu, Jéhovah. Biani tënë ti wasungo psaume so ayeke tâ tënë, so lo tene: “Ngia ayeke na azo so L’Éternel ayeke Nzapa ti ala.” (Ps. 144:15). Atâa ye wa la alingbi ti si kekereke, e hinga na bê ti e kue so tongana Jéhovah ayeke na tere ti e, mbeni ye oko ti mungo mbeto na e ayeke dä pëpe (Ps. 23:4). Na yâ ti kete ngoi fade Jéhovah, na lege ti Molenge ti lo, ayeke “futi akusala ti Zabolo.” (1 Jean 3:8). Biani, e yeke ku kungo ti tene lango ni so aga! Ti ku na lango ni so, e yeke na akua mingi ti sarango ni.​—1 aCor. 15:58.

Zia ala hinga na bê ti ala kue so e yeke “zia lâ oko pëpe” ti sambela ngbanga ti ala (aRom. 1:9). Zia si ala “ngbâ na yâ ti ndoye ti Nzapa na ngoi so ala yeke ku ti tene Seigneur ti e Jésus Christ asara nzoni bê na ala si ala wara fini ti lakue lakue.”​—Jude 21.

E ye ala kue!

Aita ti ala,

Bebungbi ti aTémoin ti Jéhovah