Tirengo azo na ngombe na ekole: Bible atene nyen na ndö ni?

Na lango 24 ti mai 2022, mbeni ye ti ngangu apassé na Uvalde mbeni kete gbata ti Texas, na États-Unis. Mbeni mbeti (The New York Times) atene “mbeni koli afâ amolenge 19 nga na amaîtresse use na ngombe . . . na ekole primaire Robb.”

Ye ti mawa ni ayeke so, mara ti aye ti ngangu ni so ayeke si ka. Mbeni mbeti (USA Today) atene, gï na États-Unis, “na ngu so ahon, tirengo azo na ngombe na ekole asi fani 249, wungo ni so ahon ati so kue ayeke na yâ ti ngu 1970.”

Ngbanga ti nyen la aye ti ngangu tongaso ayeke si? Tongana nyen la e peut ti gbu ngangu na mara ti asioni ye tongaso? Eskê mbeni espoir ayeke dä so sarango ye ti ngangu ayeke hunzi ande? Bible akiri tënë na ahunda so.

Ngbanga ti nyen la sarango ye ti ngangu ayeke ga gï sioni sioni na yâ ti dunia?

•  Bible afa so e yeke na ngoi so a iri ni ‘lâ ti nda ni’; so mingi ti azo ayeke ‘ye amba ti ala zo pëpe’ na ala yeke ‘asioni zo,’ a yeke gue na ala ti sara ye ti ngangu nga na asioni ye. Azo tongaso ayeke ‘ngbâ gï ti sara sioni ahon ti kozo ti gue na ni.’ (2 Timothée 3:1-5, 13). Ti hinga ye mingi na ndö ni, diko article “La Bible a-t-elle prédit la mentalité et la conduite des gens de notre époque ?”

Mingi ti azo ayeke hunda terê ti ala: ‘Ngbanga ti nyen la Nzapa azia lege na aye ti ngangu tongana tirengo azo na ngombe na ekole ti si?’ Ti wara kiringo tënë ti Bible, diko article “Asioni ye ayeke si ka na anzoni zo: Ngbanga ti nyen?”

Tongana nyen la e peut ti gbu ngangu na mara ti asioni ye tongaso?

•  “Aye kue so a sû ândö giriri na yâ ti Mbeti ti Nzapa, a sû ni ti tene a fa ye na e, si . . . na lege ti dengo bê so alondo na yâ ti Mbeti ti Nzapa e duti na beku.”—aRomain 15:4.

Amama-ndia ti Bible apeut ti aidé mo ti gbu ngangu na yâ ti sarango ye ti ngangu ti dunia so. Ti hinga ye mingi na ndö ni, bâ article ti Zingo na lango! so li ni ayeke “La violence cessera-t-elle un jour ?”

Ti hinga tongana nyen la ababâ na amama apeut ti aidé amolenge ti ala ti hon ndö ti mbeto ti aye so ala bâ wala ala mä na asango, diko article “Enfants et actualités troublantes.”

Eskê sarango ye ti ngangu ayeke hunzi ande?

•  “Lo yeke zi ala na yâ ti pasi nga na yâ ti ye ti ngangu so a yeke sara na ala.”—Psaume 72:14.

•  “Ala yeke pika a-épée ti ala si aga alê ti kpoka ti charrue nga ala yeke pika alikongo ti ala si aga azembe ti fango na amaboko ti keke. Mara ayeke mû épée na terê ti mbeni mara pëpe, nga ala yeke manda sarango bira encore ape.”—Michée 4:3.

Nzapa ayeke sara ande ye so azo ayeke na ngangu ti sara ni ape. Na lege ti Royaume ti lo so ayeke mbeni gouvernement so ayeke na yayu, lo yeke futi ande aye ti bira kue nga lo yeke hunzi na sarango ye ti ngangu kue. Ti hinga ye mingi na ndö ti ye so Royaume ti Nzapa ayeke sara ande, diko article “Na gbe ti Royaume ti Nzapa, ‘siriri ayeke duti dä mingi.’”