Awakua ti mungo maboko ayeke sara nzoni kua mingi

NA YÂ ti mbeti ti bazengele Paul na congrégation ti Philippes, lo tene: “Paul na Timothée, angbâa ti Christ Jésus, atokua mbeti so na azo ti be-vulu kue so ayeke beoko na Christ Jésus, so ayeke na kodro ti Philippes. E tokua nga mbeti so na azo ti bango ndo na ndö ti congrégation nga na awakua ti mungo maboko.” (aPhil. 1:1). Bâ so lo sara nga tënë ti awakua ti mungo maboko. A yeke polele so akoli so ayeke mû lani maboko mingi na a-ancien ti congrégation na ngoi ni kâ. A yeke tongaso nga na ngoi ti e. Awakua ti mungo maboko ayeke sara akua so amû maboko na a-ancien nga amû lege ti tene aye atambela nzoni na yâ ti congrégation.

² Mo hinga awakua ti mungo maboko ti yâ ti congrégation ti mo? Mo hinga akua so ala yeke sara ndali ti nzoni ti mo nga na ti congrégation ni kue? Kite ayeke dä ape so Jéhovah abâ ngangu kua ti akoli so na nene ni. Paul atene: “Akoli so ayeke sara kua pendere mingi, ala yeke wara nzoni iri nga ala lingbi ti sara tënë ti mabe na Christ Jésus na kamene oko pëpe.”—1 Tim. 3:13.

AYE SO BIBLE AHUNDA TI SARA TI GA WAKUA TI MUNGO MABOKO

³ A yeke ku na mbage ti awakua ti mungo maboko ti tene dutingo ti ala alingbi na ti aChrétien. A lingbi ala duti akoli so azo ane ala, nga ala sara akua so a mû na ala na lege ni. Aye so asigi polele na yâ ti lettre ti Paul na Timothée na ndö ti aye so a hunda ti tene azo so aye ti ga wakua ti mungo maboko asara. Lo tene: “A yeke nzoni awakua ti mungo maboko aduti azo so ane terê ti ala, yanga ti ala ayeke use use pëpe, ala yeke azo so abi terê ti ala na yâ ti nyongo vin pëpe, ala sara bê ti warango ye na lege ti likisi pëpe, nga tënë ti mabe so Nzapa ahonde ndani, ala bata ni na nzoni conscience. Nga, zia a tara ala kozoni ti bâ wala ala lingbi na kua ni, zia ala sara kua tongana awakua tongana tënë ayeke na li ti ala pëpe. Zia awakua ti mungo maboko aduti akoli so ayeke gï na wali oko, ala fa lege nzoni na amolenge ti ala nga na azo ti da ti ala.” (1 Tim. 3:8-10, 12). Tongana aita-koli so aye ti ga awakua ti mungo maboko asara ye alingbi na afango ye so, a yeke bi tënë na li ti congrégation ni pëpe ndali ti sarango ye ti azo so a mû na ala mara ti akua ni so.

⁴ Atâa awakua ti mungo maboko ayeke amaseka wala ambakoro, a yeke nzoni ala fa tënë nze na nze. Ti mû tapande ti Jésus, a lingbi ala yapu na fango tënë. Na sarango tongaso, ala yeke fa so, legeoko tongana ti Jéhovah, ala nga kue tënë ti salut ti azo agbu bê ti ala.—És. 9:7.

⁵ Akoli so ayeke awakua ti mungo maboko ayeke zia nga nzoni tapande na lege ti yungo bongo ti ala, lekengo terê ti ala, tënë ti yanga ti ala, bango ndo ti ala nga na sarango ye ti ala. Ala yeke bata bibe ti ala nzoni, na a yeke sara si azo ane ala. Na ndö ni, ala bâ na nene ni mingi songo ti ala na Jéhovah nga na akua so ala yeke na pasa ti sara na yâ ti congrégation.—Tite 2:2, 6-8.

⁶ Awakua ti mungo maboko ayeke akoli so “a tara ala kozoni ti bâ wala ala lingbi na kua ni”. Même kozo ti tene a soro ala na kua ti ala ni so, ala fa na yâ ti gigi ti ala awe so ala yeke azo so amû terê ti ala biani na Nzapa. Ala fa awe so ala zia aye ti Royaume na kozo ndo na yâ ti fini ti ala, na ala yeke na nzara ti sara akua kue so lege azi na ala ti sara ni. Biani, ala yeke anzoni tapande so aita ti yâ ti congrégation alingbi ti mû peko ni.—1 Tim. 3:10.

AKUA TI NYEN LA ALA YEKE SARA?

⁷ Awakua ti mungo maboko ayeke sara akua nde nde teti nzoni ti aita ti ala. Na sarango tongaso, ala yeke mû lege na a-ancien ti wara ngoi mingi ndali ti kua ti ala ti fango ye na aita nga na ti bango ndo na ndö ti aita. Tongana bungbi ti a-ancien ayeke mû kua na awakua ti mungo maboko, ala yeke mû ni alingbi na ngangu ti zo ni nga na abezoin ti congrégation ni.

⁸ Zia e bâ ambeni kua so ala yeke sara. A lingbi ti hunda na mbeni wakua ti mungo maboko ti bâ lege ti ambeti, tongaso si e lingbi ti wara ati so e yeke na bezoin ni ndali ti e wani nga ndali ti kua ti fango tënë. A lingbi nga ti hunda na ambeni ti bâ lege ti acompte wala ti acarte ti territoire. A lingbi nga ti tene na ambeni ti bâ lege ti micro, ti sonorisation, ti yamba azo so ayeke ga na bungbi wala peut-être ti mû maboko na a-ancien na yâ ti ambeni ye nde. Akua ayeke mingi so a lingbi a sara ti tene Da ti Royaume angbâ pendere nga aduti saleté pëpe. Ni la, a yeke hunda ka mingi ni na awakua ti mungo maboko ti bâ lege ni.

⁹ Na yâ ti ambeni congrégation, a peut ti mû gï kua oko na mbeni wakua ti mungo maboko oko. Me na yâ ti ambeni congrégation nde, a peut ti mû na mbeni wakua ti mungo maboko akua mingi. Nga na ambeni ngoi, awakua ti mungo maboko use wala ahon so alingbi ti sara mbeni kua oko. Tongana awakua ti mungo maboko ni ayeke mingi pëpe ti sara ambeni kua ni, bungbi ti a-ancien ti congrégation ni alingbi ti soro ambeni ita-koli, so awara batême awe na so ayeke na nzoni sarango ye, ti sara ambeni kua ni. Ye so ayeke mû ande maboko na aita-koli so ti maï akode so alingbi ti mû maboko mingi na ala mbeni lâ, tongana ala sara aye so a hunda na mbeni zo ti sara ti ga awakua ti mungo maboko. Tongana aita-koli ayeke dä ape, a peut ti hunda na mbeni ita-wali, so a bâ so lo yeke mbeni nzoni tapande, ti sara ambeni kua ni atâa so a yeke soro ka ala pëpe ti ga wakua ti mungo maboko. Zo so ayeke na nzoni tapande ayeke zo so asarango ye ti lo nga na lege so lo yeke voro na Nzapa ayeke nzoni ti tene aita amû peko ni. Lo yeke gue na abungbi, lo yeke fa tënë, dutingo ti sewa ti lo, angia so lo yeke soro, yungo bongo ti lo, lekengo terê ti lo nga na ambeni ye nde so lo sara ayeke nzoni tapande ndali ti aita.

¹⁰ Na yâ ti acongrégation so a-ancien ayeke dä mingi ape, a peut ti hunda na awakua ti mungo maboko, so akpengba na lege ti yingo, ti sara lisoro na azo so aye ti wara batême na ndö ti akota tënë so e mä na bê na ni. A yeke wara atënë ti lisoro ni na mbage so atene “Ambeni tënë ti bâ na ndö ni”, na li ti tënë “Mbage 1: Aye so aChrétien amä na bê na ni.” Teti so atënë so ayeke na “Mbage 2: Aye so a hunda na aChrétien ti sara” ayeke atënë so andu zo ni wani, a yeke nzoni ti tene mbeni ancien la asara mbage ni so.

¹¹ Ngoi na ngoi, tongana bungbi ti a-ancien abâ so bezoin ni ayeke dä na so a lingbi ti duti nzoni ti sara ni, ala lingbi ti changé yâ ti akua ti awakua ti mungo maboko ni na popo ti ala. Me a yeke nzoni mingi tongana awakua ti mungo maboko oko oko asara oko kua so a mû na ala aninga teti mbeni ngoi, tongaso si ala wara kode dä mingi.

¹² A lingbi na ye so a leke na yâ ti congrégation oko oko, ambeni kua nde ayeke dä so a lingbi ti mû ni na ambeni wakua ti mungo maboko so “azo kue abâ polele maïngo ti [ala].” (1 Tim. 4:15). Tongana a-ancien ayeke mingi ape, a lingbi ti soro mbeni wakua ti mungo maboko ti sara kua tongana zo ti mungo maboko na surveillant ti mbeni groupe. A peut ti si so lo sara kua tongana wakua ti groupe ti fango tënë, me lo yeke sara kua na gbe ti fango lege ti a-ancien. A lingbi nga ti soro awakua ti mungo maboko ti mû li ni na ambeni mbage ti bungbi Kusala ti e nga na gigi ti e, ti mû li ni na Mandango Bible ti Congrégation nga ti mû adiskur, tongana bezoin ni ayeke dä. Ambeni kua nde ayeke nga dä so a lingbi ti mû na ambeni wakua ti mungo maboko, tongana bezoin ni ayeke dä nga tongana ala sara ye alingbi na ye so a hunda teti kua ni (1 Pi. 4:10). Na ngoi so awakua ti mungo maboko ayeke mû maboko na a-ancien, a lingbi ala sara kua ti ala ni na bê ti ala kue.

¹³ Atâa so kua ti ala ayeke nde na ti a-ancien, a yeke nga mbeni kua so a sara ni ndali ti Nzapa, na a lingbi a sara ni ti tene aye atambela nzoni na yâ ti congrégation. Tongana ngoi ahon, si awakua ti mungo maboko asara akua ti ala nzoni nga si ala lingbi ti sara kua ti berger nga na ti wafango ye, a lingbi ti soro ala ti ga ancien.

¹⁴ Tongana mo yeke mbeni ita-koli so angbâ maseka wala so awara batême ade ti ninga ape, eskê mo yeke gi ti ga wakua ti mungo maboko? (1 Tim. 3:1). Teti so ngu oko oko azo ayeke ga na yâ ti tâ tënë mingi, bungbi ti Jéhovah ayeke na bezoin ti aita-koli so akpengba na lege ti yingo ti sara akua na yâ ti congrégation. Tongana mo yeke na nzara ti sara akua ni so, gi ti mû maboko na aita. Mbeni lege ti sara ni ayeke ti gbu li na ndö ti nzoni tapande ti Jésus (Mat. 20:28; Jean 4:6, 7; 13:4, 5). Nzara ni so ayeke kono na ngoi so mo yeke bâ tongana nyen la mungo ye na zo ayeke ga na mo ngia (Kus. 20:35). Ni la, duti nduru ti mû maboko na azo, ti mû maboko na kua ti batango Da ti Royaume si aduti saleté ape, wala ti sara devoir na place ti ambeni zo na bungbi Kusala ti e nga na gigi ti e. Ti gi ti ga wakua ti mungo maboko ahunda nga ti tene mo duti na nzoni kapa ti mandango ye mo wani, tongaso si mo lingbi ti duti na anzoni sarango ye na lege ti yingo (Ps. 1:1, 2; aGal. 5:22, 23). Na ndö ni, tongana a mû ambeni kua ti congrégation na mbeni ita so ayeke gi ti ga wakua ti mungo maboko, a yeke nzoni lo fa na yâ ti sarango ye ti lo so zo apeut ti sara confiance na lo nga lo yeke be-ta-zo.—1 aCor. 4:2.

¹⁵ Yingo vulu la ayeke soro awakua ti mungo maboko ndali ti nzoni ti congrégation. Aita kue ti congrégation alingbi ti fa so ala bâ na nene ni ngangu kua so awakua ti mungo maboko ayeke sara, tongana ala sara kua maboko na maboko na ala na ngoi so ala yeke sara akua ti ala. Tongana azo ti congrégation asara tongaso, ala yeke fa so ala bâ na nene ni aye so Jéhovah aleke ti sara si ye kue atambela nzoni na yâ ti bungbi ti lo.—aGal. 6:10.