Chapitre 112

Pâque ti ndani ti Jésus aga ndulu

MARDI, lango 11 ti Nisan, ayeke ndulu ti hunzi tongana Jésus azia ti fa ye na abazengele na ndo hoto ti Oliviers. Jésus asala kusala mingi na lango ni so! Fadeso, peut-être na lege ti kiri ti lango na kodoro ti Béthanie, lo tene na abazengele ti lo: “I hinga na peko ti la use Pâque aga, na fade ala zia Molenge ti zo na ti ti azo ti fa lo na keke ti pasi.”

Ndade, so ayeke mercredi lango 12 ti Nisan, Jésus aduti gi na abazengele ti lo. Na lango so ahon awe, Jésus afa ngbanga polele na ndo amokonzi ti vorongo nzapa, na lo baa so ala gi lege ti fa lo. A yeke teti tene so si lo fa tele ti lo pepee na gbele azo kue na mercredi. Lo sala tongaso, teti lo ye mbeni ye akanga lege na lo pepee ti sala matanga ti Pâque na abazengele lango oko na pekoni.

Na ngoi so, akota prêtre na a-ancien ti azo abungbi na sedu ti kota prêtre, lo so ala di iri ti lo Caïphe. Ala duti na kota ngonzo teti so Jésus afa sioni kusala ti ala na gigi awe, tongaso ala wa tele ti ala na lege ti mayele ti gbu lo na ti fa lo. Me ala tene: “Na la ti matanga ni pepee, tongaso pepee fade azo ni kue alondo ti tomboka kirikiri.” Ala kpe mbito ti azo, teti Jésus anzere na le ti ala.

Tongana amokonzi ti vorongo nzapa ayeke wa tele ti ala na lege ti siobe ti fa Jésus, mbeni zo aga ti baa ala. Be ti ala ado ti baa mbeni oko ti abazengele ti Jésus, lo so ahiri lo Judas Iscariote, lo so Satan alu na ya bibe ti lo sioni pensé ti ka Maître ti lo! Ala duti na kota ngia tongana Judas ahunda na ala: “Fade i mu nyen na mbi tongana mbi zia lo na ti ti i?” Ala yeda fade fade ti mu na lo nginza ti argent bale ota, so ayeke ngere ti mbeni ngbaa na lege ti Ndia ti Moïse. A tondani na la ni so, Judas agi lege ti zia Jésus na ti ti ala tongana azo ayeke pepee.

Lango 13 ti Nisan atondani na mercredi na lakui. Teti so Jésus alondo na kodoro ti Jéricho na lo si na vendredi, a sala fadeso bi omene na bi ti ndani so lo yeke lango na kodoro ti Béthanie. Ndade, jeudi, a lingbi ti leke aye ti ndani teti Pâque, so ayeke tondani na lakui. Na la ni so alingbi ti fa molenge ti ngasangbaga ti Pâque na ti zo ni na ngbongboro ni. Fade ala sala matanga ni na ndo wa? Fade zo wa ayeke leke aye ni?

Jésus ade ti mu yanga na ndo tene so pepee. Lo sala tongaso ti kanga lege peut-être na Judas ti fa na akota prêtre ndo ti matanga ni na ala gbu lo na ngoi so. Me, fadeso, jeudi ngoi kete na peko ti midi, na kodoro ti Béthanie Jésus ato Pierre na Jean, lo tene: “I gue, i leke Pâque na e, si e lingbi ti te.”

“Mo ye e leke ni na ndo wa?” ala hunda.

Jésus atene: “Tongana i si na kodoro, fade mbeni zo so ayeke yo ta ti ngu ate i na lege. I gue na peko ti lo na ya da so lo yeke gue da. Fade i tene na mveni ti da ni: ‘Wafango ye atene na mo: “Da ti agene so mbi na adisciple ti mbi alingbi ti te Pâque na ya ni ayeke na ndo wa?” ’ Fade lo fa na i mbeni kota da-nduzu so ala leke awe, i leke ye ni ka.”

Mveni ti da so ayeke mbeni oko ti adisciple ti Jésus, na peut-être lo ku Jésus ti hunda na lo ti sala kota matanga so na da ti lo. Tongana Pierre na Jean ague na Jérusalem, ala wara ye lege-oko tongana Jésus atene na ala kozoni awe. Ala use aleke ye si azo molenge ti ngasangbaga na aleke ye kue si aduti ndulu, ye soalingbi ti mu lege na azo bale oko na ndoni ota, so ayeke Jésus na abazengele ti lo bale oko na ndoni use, ti sala matanga ti Pâque. Matthieu 26:1-5, 14-19; Marc 14:1, 2, 10-16; Luc 22:1-13; Exode 21:32.

▪ Jésus asala nyen peut-être na mercredi? Ngbanga ti nyen?

▪ A sala bungbi wa na da ti kota prêtre? Judas ague ti baa amokonzi ti vorongo nzapa ngbanga ti nyen?

▪ Na jeudi, Jésus ato azo wa na Jérusalem? Ala gue ka ngbanga ti nyen?

▪ Azo so Jésus ato ala awara nyen, ye so akiri afa na gigi so Jésus ayeke na ngangu ti sala ye ti kpene?