Fa so Jéhovah ayeke kota mingi na yâ ti fini ti mo

“Jéhovah, mo so mo yeke Nzapa ti e, mo lingbi ti tene a mû na mo gloire, na gonda na ngangu.”​—APOC. 4:11.

1, 2. Na ndo ti tënë ti songo fini ti e, ngbanga ti nyen gi hingango iri ti Jéhovah alingbi pëpe?

PEUT-ÊTRE kozo hingango ti mo iri ti Nzapa ayeke na ngoi so a fa ni na mo na yâ ti Bible ti mo wani. Peut-être bê ti mo adö na ngoi so mo ga ti hinga so Nzapa ayeke na iri. Kite ayeke pëpe so ngbene ye na ngoi ni so mo yeke sara kusala na Bible ti mû maboko na azo ti hinga Jéhovah Nzapa ti e so ayeke sara ye na ndoye.​—aRom. 10:12, 13.

² Atâa so a yeke kota ye ti tene azo ahinga iri ti Jéhovah, gi hingango iri ni alingbi pëpe. Biani, Jéhovah la ayeke kota ahon tanga ti aye kue na yâ ti dunia. Teti so lo la lo sara aye kue, lo yeke na droit ti ku ti tene acréature kue awoko tere na gbe ti lo. Mbeni zo ti sungo psaume afa nga so tënë so ayeke tâ tënë nga ni la alingbi ti sara si e wara fini. Lo tene: “Mo so Mo yeke Lo Ti Nduzu Ahon Kue na ndo sese kue.” (Ps. 83:19). Ni la, a yeke na lege ni ti tene e hunda tere ti e: ‘Mbi yeke fa so Jéhovah ayeke kota mingi na yâ ti fini ti mbi?’ A yeke kota ye ti tene e gi nzoni ti bâ kiringo tënë ti e na hundango tënë so.

Tënë so abâ gigi na yaka ti Éden

3, 4. Satan ahanda Ève tongana nyen? Ye ti pekoni ayeke so wa?

³ A yeke na yâ ti aye so asi lani na yaka ti Éden la a ga ti bâ polele so hundango tënë so ayeke mbeni kota tënë. Na yâ ti yaka ni, ange so ake yanga so na pekoni a iri lo Satan Zabolo ahanda kozo wali, Ève, ti zia na kozo ndo anzara ti bê ti lo ahon ti sara ye alingbi na ndia ti Nzapa so ahunda ti te lê ti mbeni keke pëpe (Gen. 2:17; 2 aCor. 11:3). Lo tï na yâ ti handa so na lo fa so lo ne droit ti Jéhovah ti komande dunia pëpe. Ève afa pëpe so Jéhovah ayeke kota mingi na yâ ti fini ti lo. Me Satan ahanda Ève lani tongana nyen?

⁴ Na yâ ti lisoro ti Satan na Ève, lo sara kusala na amayele mingi ti wara na lo. (Diko Genèse 3:1-5.) Kozoni, Satan asara kusala na iri ti Jéhovah pëpe. Lo tene gi “Nzapa.” Nde na lo, zo so asû mbeti ti Genèse asara kusala na iri ti Jéhovah na yâ ti kozo versê ti chapitre so.a Use ni, ahon ti tene lo tene “ndia” wa la Nzapa alu, Satan ahunda gi tënë na ndo ti tënë so Nzapa “atene”. (Gen. 2:16). Na mayele, Satan atara ti tene so ndia so ayeke senge ye. Ota ni, atâa so lo sara tënë gi na Ève lo oko, lo sara kusala na mbupa ti Hébreu so aye ti tene “ala” so Bible ti Sango akiri pekoni na “mo.” Na sarango tongaso, lo tara ti pusu Ève ti sara baba. Lo sara kue ti tene Ève abâ so lo yeke kota mingi. Ye so asara si Ève asara ye tongana zo so ayeke sara tënë na iri ti lo na koli ti lo. Ye ti pekoni ayeke so wa? Baba apusu Ève ti sara tënë mo bâ mo tene lo yeke sara tënë na iri ti lo nga na koli ti lo na tenengo na ngbo: ‘E lingbi te lê ti keke nde nde ti yaka.’

5. (a) Satan apusu Ève ti bi bê ti lo mingi na ndo ti ye wa? (b) So Ève ate lê ti keke so a kanga lege na ala ti te, lo fa nyen?

⁵ Satan aba nga yâ ti atënë ni. Lo tene so Nzapa asara ye na lege ni pëpe so lo hunda na Adam na Ève ti ‘te le-keke kue ti yaka pëpe.’ Na pekoni, Satan apusu Ève ti pensé na ndo ti lo wani nga ti bâ tongana nyen lo lingbi ti sara si gigi ti lo akiri aga nzoni mingi tongana lo ga “tongana Nzapa”. Na nda ni, Satan apusu lo ti bi bê ti lo na ndo ti keke ni nga na alengo ni ahon ti bi bê ti lo na ndo ti songo ti lo na Lo so amû na lo aye kue. (Diko Genèse 3:6.) Mawa ni ayeke so, na tengo lê ti keke so, Ève afa so Nzapa ayeke kota mingi na yâ ti fini ti lo pëpe.

Tënë so abâ gigi na ngoi ti Job

6. Satan atene nyen na ndo ti dutingo be-ta-zo ti Job? Lege wa azi na Job?

⁶ Angu mingi mingi na pekoni, Job so ayeke be-ta-zo awara lege ti fa Zo so ayeke kota mingi na yâ ti fini ti lo. Na ngoi so Jéhovah atene na Satan tënë ti Job so ayeke be-ta-zo, Satan atene: “Job akpe mbeto ti Nzapa senge senge?” (Diko Job 1:7-10.) Satan ade kite pëpe so Job ayeke mä yanga ti Nzapa. Me lo dë kite na bibe so apusu Job ti sara ye. Na mayele lo tene so a yeke pëpe ndoye la apusu Job ti sara na Jéhovah me a yeke ndali ti aye so lo wara na pekoni. Gi Job la alingbi ti fa so tënë so ayeke mvene, nga a mû lege na lo ti fa ni.

7, 8. Atara wa la a lingbi Job aluti na lê ni? So lo gbu ngangu nga lo gbâ be-ta-zo, lo fa nyen?

⁷ Jéhovah amû lege na Satan ti ga na aye ti ngangu ndenge na ndenge na peko ti tere na ndo ti Job (Job 1:12-19). Job asara ye tongana nyen na yâ ti angoi ti ngangu so? Bible atene so “Job asara siokpari pëpe, na lo sara buba tënë ti ke Nzapa nga pëpe.” (Job 1:22). Me Satan angbâ gi ge pëpe. Lo kiri lo tene: “Poro teti poro, biani, fade zo amû ye ti lo kue ti bata fini ti lo.”b (Job 2:4). Satan atene so tongana Job lo wani abâ pasi, lo yeke bâ so Jéhovah ayeke kota mingi na yâ ti fini ti lo pëpe.

⁸ Sioni kobela so abuba poro ti tere ti Job nga wali ti lo atene na lo ti tene lo zonga Nzapa lo kui. Na pekoni, azo ota so atene ala ga ti dë bê ti Job abi tënë na li ti lo atene so tambela ti lo ayeke na lege ni pëpe (Job 2:11-13; 8:2-6; 22:2, 3). Me, na yâ ti apasi so kue, Job angbâ lakue be-ta-zo. (Diko Job 2:9, 10.) So Job agbu ngangu na lo ngbâ be-ta-zo, lo fa so Jéhovah ayeke kota mingi na yâ ti fini ti lo. Job afa nga so zo so ayeke wasiokpari alingbi ti mû ngangu ti lo kue ti fa so tënë so Zabolo atene ayeke mvene.​—Bâ aProverbe 27:11.

Jésus afa polele so tënë so ayeke mvene

9. (a) Tongana nyen la Satan amû nzara ti mitele so Jésus ayeke na ni ti tara na lo? (b) Jésus asara ye tongana nyen na gbele tara so?

⁹ Ngoi kete na peko ti batême ti Jésus, Satan atara ti pusu lo ti gi ti kaï anzara ti lo ti mitele ahon ti bâ lakue Jéhovah tongana zo so ayeke kota mingi na yâ ti fini ti lo. Zabolo atara Jésus fani ota. Kozoni, lo sara kusala na nzara so asara Jésus ti handa lo ti sara si atênë aga mapa (Mat. 4:2, 3). Jésus alondo ti mû jeûne teti lango 40 na nzara agbu lo lani ngangu. Zabolo awa Jésus ti mû ngangu ti lo ti sarango na amiracle ti sara na kusala na mbeni lege so ayeke nzoni pëpe ti kaï nzara ti lo. Jésus asara ye tongana nyen? Nde na Ève, Jésus abi bê ti lo gi na ndo ti tënë ti Jéhovah na lo ke tara so gi na lê ni lê ni.​—Diko Matthieu 4:4.

10. Ngbanga ti nyen Satan ahunda na Jésus ti huru na li ti gbagba ti temple ti tï na sese?

¹⁰ Satan agi nga ti sara ngangu na ndo ti Jésus ti tene lo sara ye na bingo bê gi na ndo ti lo wani. Lo hunda na Jésus ti huru na li ti gbagba ti temple ti tï na sese (Mat. 4:5, 6). Satan aye lani ti sara nyen? Lo tene so tongana Jésus atï si ye ti sioni asi na lo pëpe, ye so ayeke fa so lo yeke biani “molenge ti Nzapa.” A yeke polele so Zabolo aye ti tene Jésus abi bê ti lo ahon ndo ni gi na ndo ti lo wani, même tongana a hunda ti tene lo sara baba na lê ti azo. Satan ahinga so mbeni zo ayeke yeda ti sara mbeni ye so a hunda na lo ti sara même tongana a yeke sioni ndali ti baba nga ti fa na lê ti azo so ni la. Satan aba yâ ti versê, me Jésus afa so lo gbu nda ti tënë ti Jéhovah nzoni mingi. (Diko Matthieu 4:7.) So Jésus ake ti sara ye so Satan ahunda na lo ti sara, lo kiri lo fa so Jéhovah ayeke kota mingi na yâ ti fini ti lo.

11. Ngbanga ti nyen Jésus ake aroyaume kue ti dunia so Zabolo afa na lo?

¹¹ Na ngoi ti ndangba tara ni so lo zia ngangu ti lo kue dä, Satan afa na Jésus aroyaume kue ti dunia so ti mû ni na lo (Mat. 4:8, 9). Jésus ake ni gi na lê ni lê ni. Lo hinga so tongana lo yeda na ni a yeke mo bâ mo tene lo ke droit ti Jéhovah ti komande dunia, droit ti Nzapa ti duti Lo Ti Nduzu Ahon Kue. (Diko Matthieu 4:10.) Na yâ ti atara ni kue, Jésus akiri tënë na Satan na fango aversê so iri ti Jéhovah ayeke dä.

12. Ngangu desizion wa Jésus atingbi na ni na ngoi so lo ga nduru ti kui? Sarango ye ti lo na gbele desizion so afa na e nyen?

¹² Na ngoi so Jésus aga nduru ti kui, lo yeke lani na mbeni ngangu desizion ti mungo ni. Na lege ti kusala ti lo, lo fa so lo yeke nduru ti mû fini ti lo na sandaga (Mat. 20:17-19, 28; Luc 12:50; Jean 16:28). Ye oko, Jésus ahinga nga so a yeke bi tënë ti mvene na li ti lo ti fâ ngbanga na ndo ti lo na lege ti ndia ti aJuif nga so a yeke fâ lo tongana mbeni zo so azonga Nzapa. Ye so la asara si lo gi bê ti lo mingi. Lo sambela lo tene: “Babâ ti mbi, tongana lege ayeke dä, zia si kopo so ahon yongoro na mbi.” Me lo kiri lo tene: “Zia a duti tongana ti so bê ti mbi aye pëpe, me tongana ti so bê ti mo aye.” (Mat. 26:39). Biani, so Jésus angbâ be-ta-zo juska na kuâ afa polele zo wa la ayeke kota mingi na yâ ti fini ti lo!

Ye so e yeke sara ti fa so tënë so ayeke mvene

13. Nyen la e manda na lege ti tapande ti Ève, ti Job nga ti Jésus Christ?

¹³ Aye so e bâ juska ge afa nyen na e? Ye so asi na Ève afa na e so azo so atï na yâ ti anzara ti mitele wala ala so abâ tere ti ala kota mingi, ala fa so Jéhovah ayeke kota mingi na yâ ti fini ti ala pëpe. Nde na Ève, Job angbâ be-ta-zo. So Job angbâ be-ta-zo afa na e so même azo so ayeke awasiokpari alingbi ti fa so ala zia Jéhovah na kozo ndo na yâ ti fini ti ala na ngbango be-ta-zo na yâ ti aye ti ngangu, atâa ala hinga nda ti ye so asi na ala so pëpe (Jacq. 5:11). Ti hunzi na ni, tapande ti Jésus afa na e ti duti nduru ti yeda ti tene a zia kamene na lê ti e nga ti bi bê ti e na ndo ti e wani ahon ndo ni pëpe (aHéb. 12:2). Me tongana nyen la e lingbi ti sara ye alingbi na aye so?

14, 15. Na lege wa sarango ye ti Jésus na gbele tara ayeke nde na ti Ève? Tongana nyen la e lingbi ti mû tapande ti Jésus? (Sara tënë na ndo ti foto so ayeke na lembeti 18.)

¹⁴ A lingbi mo zia lege lâ oko pëpe na atara ti sara si mo girisa Jéhovah. Ève azia lê ti lo gi na ndo ti ye so ayeke na gbele lo, so a tara lo na lege ni. Lo bâ so lê ti keke ni “ayeke nzoni teti kobe, a nzere na lê”. (Gen. 3:6). Sarango ye ti Ève ayeke tâ nde mingi na sarango ye ti Jésus na ngoi so a tara lo fani ota! Na yâ ti atara ni kue, lo zia lege pëpe na tara ni ti sara si lo girisa na ndo ti aye so ayeke ga na peko ti ye so lo yeke sara. Lo zia bê ti lo kue na ndo ti Mbeti ti Nzapa nga lo sara kusala na iri ti Jéhovah.

¹⁵ Tongana e tingbi na atara so apusu e ti sara aye so anzere pëpe na Jéhovah, ye wa a lingbi pensé ti e aluti na ndo ni? Tongana e pensé mingi na ndo ti tara ni, nzara ti sarango ye ti sioni ni ayeke sara e ngangu (Jacq. 1:14, 15). A lingbi e zi nzara ni so hio na yâ ti bê ti e, même tongana sarango ni ayeke ngangu mo bâ mo tene zingo mbeni mbage ti tere ti e (Mat. 5:29, 30). Legeoko tongana ti Jésus, a lingbi e bi bê ti e na ndo ti aye so ayeke ga na peko ti ye so e yeke sara: ye so sarango ye tongaso ayeke sara na ndo ti songo ti e na Jéhovah. A lingbi e dabe ti e na ye so Bible atene. Gi na sarango tongaso la e yeke fa so Jéhovah ayeke kota mingi na yâ ti fini ti e.

16-18. (a) Nyen la alingbi ti sara si vundu ahon ndo ti e? (b) Nyen la ayeke mû maboko na e ti gbu ngangu na yâ ti aye ti ngangu?

¹⁶ Tongana aye ti ngangu asi na mo, a lingbi mo sara ngonzo na tere ti Jéhovah lâ oko pëpe. (aProv. 19:3). Na ngoi so futingo ti aye ti dunia so ayeke pusu nduru, awakua ti Jéhovah mingi ayeke bâ pasi ndali ti aye ti ngangu so ayeke si. Aye tongana angu so asuku amû ndo wala asese so ayengi. E yeke ku pëpe ti tene a bata e na lege ti ye ti kpene. Atâa so kue, tongana ti Job, bê ti e alingbi ti nze tongana mbeni zo so e ye lo mingi akui wala e wani e tingbi na ambeni kpale.

¹⁷ Job ahinga pëpe ndani so Jéhovah azia lege na ambeni ye ti si. E nga kue na ambeni ngoi e lingbi ti hinga pëpe ngbanga ti nyen ambeni ye ti sioni ayeke si. Peut-être e mä tënë ti aita ti e so ayeke be-ta-zo so akui na ngoi so sese ayengi, na tapande ala ti kodoro ti Haïti, wala ala so akui na yâ ti aye tongana ngu so asuku amû ndo. Wala peut-être e hinga mbeni ita so ayeke be-ta-zo so azo asara ye ti ngangu na lo wala so akui na yâ ti mbeni sioni ndao. E lingbi même ti bâ so vundu ahon ndo ti e ndali ti aye ti ngangu so asi na e wala ndali ti ambeni ye so a sara na e so ayeke na lege ni pëpe. Vundu ti bê ti e alingbi ti pusu e ti tene: ‘Aï Jéhovah, ngbanga ti nyen ye tongaso asi na mbi? Sioni ti nyen la mbi sara?’ (Hab. 1:2, 3). Nyen la ayeke mû maboko na e ti gbu ngangu na yâ ti angoi tongaso?

¹⁸ A lingbi e sara hange ti tene e tene pëpe so aye so asi na e so afa so Jéhovah ake e awe. Jésus agboto lê na ndo ti tënë so na ngoi so lo sara tënë ti aye ti ngangu use so asi na ngoi ti lo. (Diko Luc 13:1-5.) Aye ti ngangu mingi so asi ayeke ndali ti “lâ na pasa”. (Zo-ti. 9:11). Me, atâa ye wa la asara si e yeke na vundu, e lingbi ti luti na lê ni tongana e zia bê ti e na ndo ti “Nzapa ti dengo bê kue”. Lo yeke mû na e ngangu so e yeke na bezoin ni ti ngbâ ti sara na lo.​—2 aCor. 1:3-6.

19, 20. Nyen la amû maboko na Jésus ti gbu ngangu na yâ ti aye so amû kamene na zo? Ye wa alingbi ti mû maboko na e ti sara tongaso?

¹⁹ A lingbi mo zia lâ oko pëpe si baba wala mbeto ti tene a zia kamene na lê ti mo agbu bê ti mo mingi. So Jésus asara tere ti lo kete amû lege na lo ti ‘dö aye ti lo kue ti zia na ti mû tere ti ngbâa’. (aPhil. 2:5-8). Lo gbu ngangu lani na yâ ti aye mingi so azia kamene na lê ti zo ngbanga ti so lo zia bê ti lo kue na ndo ti Jéhovah (1 Pi. 2:23, 24). Na sarango tongaso, Jésus azia na kozo ndo ye so bê ti Jéhovah aye. Ye so asara si a yä lo na nduzu na mbeni kota ndo so ahon ti kozoni (aPhil. 2:9). Jésus ahunda na adisciple ti lo ti sara ye tongana ti lo so.​—Mat. 23:11, 12; Luc 9:26.

²⁰ Na ambeni ngoi, ambeni ye so atara mabe ti e alingbi ti duti mbeni ye so amû kamene na zo. Me, a lingbi e duti na mabe tongana ti bazengele Paul so atene: “A yeke ndali ti ye so si mbi yeke bâ apasi so, me kamene asara mbi pëpe. Teti mbi hinga lo so mbi mä na bê na lo nga mbi hinga mbi tene lo lingbi ti bata ye so mbi zia na maboko ti lo ti bata juska ti si na lango ni so.”​—2 Tim. 1:12.

21. Atâa so bibe ti azo ti dunia so ayeke ti ndoye gi tere ti ala wani, ye wa mo yeke ngbâ lakue ti sara?

²¹ Bible afa kozoni awe so na ngoi ti e azo ayeke duti ande azo so “andoye gi tere ti ala wani”. (2 Tim. 3:2). Ni la, a yeke ye ti dongo bê pëpe so azo so angoro e ayeke azo so Jéhovah ayeke kota mingi na yâ ti fini ti ala pëpe. A lingbi e zia lâ oko pëpe si mara ti sarango ye tongaso asara ngangu na ndo ti e! Nde na so, atâa e tingbi na atara, wala aye ti ngangu asara si vundu ahon ndo ti e, wala e tingbi na azo so ayeke sara kue ti zia kamene na lê ti e, zia e kue e leke na bê ti e ti ngbâ ti fa biani so Jéhovah ayeke kota mingi na yâ ti fini ti e!

[Akete tënë na gbe ni]

Nyen la e lingbi ti manda na ndo ti . . . 

• lege so Satan ahanda na Ève?

• sarango ye ti Job na gbele aye ti ngangu so asi na lo?

• ye so ayeke lani kota mingi na lê ti Jésus?

[Foto na lembeti 21]

Jésus ake atara ti Satan na lo bi bê ti lo gi na ndo ti ye so bê ti Jéhovah aye

[Foto na lembeti 22]

Fango tënë na yâ ti atente na peko ti so sese ayengi na Haïti

Na angoi ti ngangu, e lingbi ti bi bê ti e na ndo ti “Nzapa ti dengo bê kue”