Chapitre 55
Adisciple mingi azia ti tambela na Jésus
NA CAPERNAÜM, na ya mbeni synagogue, Jésus asala tene ti kusala so lo sala tongana taa mapa so alondo na yayu. Tene ti lo ayeke tanga ti lisoro so atondani na azo so awara lo tongana ala londo na mbage ti to ti ngu ti Galilée, na ndo so ala te mapa na susu so lo sala na lege ti ye ti kpene.
Jésus atene nga: “Mapa so fade mbi mu, ayeke mitele ti mbi so mbi mu teti fini ti sese so.” Gi ngu use kozoni, na ngoi ti zongo ti ngu 30, lo tene na Nicodème so Nzapa andoyee sese so mingi tongaso lo mu Molenge ti lo tongana Sauveur. Na lege ti ye so lo tene fadeso, Jésus afa so azo kue so ate mitele ti lo na lege ti fa, so aye ti tene ala sala ye na mabe na sadaka so lo yeke mu na ngoi so ayeke ga, alingbi wara fini ti lakue lakue.
Me tene so asala si ambeni wamango tene apika gere ti ala. Ala hunda: “Zo so alingbi ti mu na e mitele ti lo ti te tongana nyen?” Jésus aye ti fa na ala so fade ate mitele ti lo na lege ti fa. Ti sala si tene so asigigi mbilimbili, lo sala mbeni tene so azo alingbi ti yeda na ni oko pepee tongana ala baa ni tongana fa pepee.
Jésus atene na ala: “Tongana i te mitele ti Molenge ti zo pepee, na i nyon mene ti lo pepee, i yeke na fini na ya i pepee. Zo so ate mitele ti mbi na lo nyon mene ti mbi, lo yeke na fini ti lakue lakue, na fade mbi yaa lo na la ti ndani; teti mitele ti mbi ayeke taa kobe, na mene ti mbi ayeke taa ye ti nyon. Lo so ate mitele ti mbi na lo nyon mene ti mbi, lo duti na ya mbi, na mbi duti na ya lo.”
Biani, tongana Jésus asala tene ti tengo zo, a yeke na lege ni so tene ti lo aso be ti azo. Me, lo hiri azo so ama tene ti lo ti te pepee taa mitele ti lo wala ti nyon pepee taa mene ti lo. Lo ye ti fa na ala mbilimbili so azo kue so ayeke wara fini ti lakue lakue alingbi ti ma na be na sadaka so lo yeke mu ande tongana lo mu tele ti zo ti mbilimbili kue ti lo na lo tuku mene ti lo. Kamême na so, adisciple ti lo mingi agi lege pepee ti gbu nda ti tene so lo fa, ala ke, ala tene: “So ayeke kpengba tene! Zo nyen alingbi ti ma tene so?”
Jésus ahinga so adisciple ti lo mingi adema tele ti ala teti tene so. Tongaso, lo tene na ala: “Be ti e aso teti tene so? Tongaso, tongana i baa Molenge ti zo ama na nduzu na ndo so lo yeke kozoni, fade i sala nyen? (...) Tene so mbi tene na i ayeke yingo na ayeke fini. Me ambeni zo ayeke na popo ti i so ama na be pepee.”
Na pekoni Jésus atene: “A yeke teti tene so si mbi tene na i giriri: mbeni zo alingbi ti ga na mbi pepee, gi tongana Baba azia na be ti lo ti ga.” Teti tene so, adisciple ti lo mingi akiri, na ala tambela na lo mbeni pepee. Tongaso, Jésus atene na abazengele bale oko na ndoni use: “I nga, i ye ti zia mbi?”
Pierre akiri tene: “Seigneur, fade e gue na zo nyen? Mo yeke na tene so amu fini ti lakue lakue. E ma na be awe, na e hinga mo yeke Lo ti Nzoni-Kue ti Nzapa.” Pierre na ambeni bazengele afa so ala duti be-taa-zo biani, kamême so ala gbu nda ti tene so Jésus afa na ala mbilimbili pepee!
Tene ti Pierre andu be ti Jésus, me lo tene na ala: “Mbi hiri i bale oko na ndoni use pepee? na oko na popo ti i ayeke zo so azonga ndo.” Lo sala tene ti Judas Iscariote. Peut-être lo baa awe so Judas atonda ti tambela na lege so ayeke nzoni pepee.
A ninga kete Jésus amu vundu na be ti azo na la ni so ala tara ti sala lo gbia na lo ke, tongaso peut-être na be ti ala ala tene: ‘Na lege wa si koli so alingbi ti ga Messie tongana lo ke ti sala kusala ti Messie?’ Tene so kue ayeke mbeni tene so angba na bibe ti azo na la ni ka. Jean 6:51-71; 3:16.
▪ Jésus amu mitele ti lo teti azo wa? Na lege wa si ala ‘te mitele ti lo’?
▪ Tene wa ti Jésus na pekoni asala si be ti azo aso? Me lo ye ti fa na gigi tene wa mbilimbili?
▪ Na la ni so azo mingi azia ti tambela na Jésus, Pierre atene nyen?