Yingo vulu amû ngangu na e ti luti na lê ti tara nga ti hon ndo ti bê so anze
“Fade ala yeke wara ngangu tongana yingo vulu aga na ndo ti ala.”—KUS. 1:8.
1, 2. Mungo maboko wa Jésus amû zendo ni na adisciple ti lo? Ngbanga ti nyen ala yeke na bezoin ni?
JÉSUS ahinga lani so na lege ti ngangu ti adisciple ti lo wani ala lingbi pëpe ti bata aye kue so lo mû yanga na ala ti sara. Tongana e gbu li na ndo ti kota ti kusala ti ala ti fango tënë, ngangu ti awato ti ala nga so ala yeke azo so awoko, a yeke polele so ala yeke na bezoin ti mbeni ngangu so ahon ti so zo ayeke na ni. Ni la, kete kozoni si Jésus ague na yayu, lo dë bê ti adisciple ti lo lo tene: “Fade ala yeke wara ngangu tongana yingo vulu aga na ndo ti ala, na fade ala yeke duti atémoin ti mbi na Jérusalem, na yâ ti Judée kue nga na Samarie na juska na ambage ti sese so ayeke tâ yongoro.”—Kus. 1:8.
2 Zendo so ato nda ti ga tâ tënë na Pentecôte ti ngu 33 na ngoi so yingo vulu amû ngangu na adisciple ti Jésus Christ ti sara si fango tënë ti ala amû yâ ti Jérusalem kue. Mbeni zo wala mbeni ye alingbi pëpe ti kanga lege na ni (Kus. 4:20). “Juska na lâ ni so aye ti ngoi so ayeke gue ti hunzi”, adisciple be-ta-zo ti Jésus, so e nga kue e yeke na popo ni, ayeke na bezoin mingi ti wara oko ngangu so, so alondo na Nzapa.—Mat. 28:20.
3. Ngangu so alondo na Jéhovah alingbi ti mû maboko na e ti sara nyen?
3 Jésus amû zendo na adisciple ti lo lo tene so “ala yeke wara ngangu tongana yingo vulu aga na ndo ti ala”. Ngangu so Jéhovah, Nzapa ti Ngangu Ahon Kue, amû na awakua ti lo amû ngangu na e oko oko kue ti sara ye alingbi na mungo tere ti e na lo. Nga tongana bezoin ni ayeke dä, oko ngangu so ayeke mû ngangu na e ti ke asioni nzara so ayeke sara ngangu na ndo ti e.—Diko Michée 3:8; aColossien 1:29.
4. Nyen la e yeke bâ na yâ ti article so nga ngbanga ti nyen?
4 Tongana nyen a lingbi ti bâ polele ngangu so e wara na lege ti yingo vulu? Mara ti akusala wa yingo vulu ayeke puse e ti sara? Yingo vulu ayeke pusu e ti sara ye tongana nyen na yâ ti aye nde nde? Na ngoi so e yeke gi ti sara na Nzapa na bê ti e kue, e yeke tingbi na gbâ ti akpale so alondo na Satan, dunia ti lo wala ndali ti awokongo ti e wani. A yeke kota ye ti hon ndo ti mara ti akpale so si e ngbâ ti gbu ngangu tongana aChrétien, e fa tënë lakue nga e bata nzoni songo na Jéhovah. Zia e bâ tongana nyen yingo vulu ayeke mû maboko na e ti luti na lê ti atara na ti kpengba na ngoi so e woko wala bê ti e anze.
Yingo vulu amû maboko na e ti luti na lê ti tara
5. Tongana nyen sambela alingbi ti mû ngangu na e?
5 Jésus afa na adisciple ti lo ti sambela, lo tene: “Mo gue na e na yâ ti tara pëpe, me mo zi e na maboko ti Zo ti sioni.” (Mat. 6:13). Jéhovah ayeke zia pëpe awakua be-ta-zo ti lo so ahunda mara ti ye tongaso na lo. Na mbeni ngoi, Jésus atene so “Babâ so ayeke na yayu ayeke mû yingo vulu na ala so ahunda ni na lo”. (Luc 11:13). Biani, bê ti e adë so Jéhovah amû zendo ti mû na e yingo ti lo so ayeke mû maboko na e ti sara ye so ayeke mbilimbili. Ye oko, ye so aye pëpe ti tene so Jéhovah ayeke kanga lege si tara asi na e (1 aCor. 10:13). Me na ngoi so e tingbi na tara, a yeke ngoi ti tene e sambela mingi mingi.—Mat. 26:42.
6. Akiringo tënë ti Jésus na atara ti Satan aluti na ndo ti nyen?
6 Tongana Zabolo atara Jésus, lo kiri tënë na fango ambeni tënë ti yâ ti Mbeti ti Nzapa. Jésus ahinga lani Mbeti ti Nzapa nzoni mingi na li ti lo tongana lo kiri tënë lo tene: “A sû na Mbeti ti Nzapa a tene . . . A sû nga na Mbeti ti Nzapa a tene . . . ” Jésus akiri nga tënë lo tene: “Hon kâ, Satan! Teti a sû na Mbeti ti Nzapa a tene: ‘A yeke gi Jéhovah Nzapa ti mo si a lingbi mo voro lo, na a yeke gi lo oko si a lingbi mo sara kusala so ayeke nzoni-kue na lo.’” Ndoye so Jésus ayeke na ni teti Jéhovah nga ndali ti tënë ti lo apusu lo ti ke apendere ye so Wahanda azia na gbele lo (Mat. 4:1-10). Na pekoni so Jésus adö sese fani mingi na atara ti Satan, Satan azia lo ahon.
7. Tongana nyen Bible ayeke mû maboko na e ti luti na lê ti tara?
7 Tongana Jésus azia bê ti lo na ndo ti Mbeti ti Nzapa ti luti na atara ti Zabolo, a lingbi e nga kue e sara tongaso pëpe? Biani, ti wara lege ti luti na Zabolo nga na azo ti lo, a lingbi e gi kozoni kue ti hinga aye so Nzapa afa na e sara ye alingbi tâ gi na ni. Afango ye ti Bible apusu azo mingi ti changé dutingo ti ala na ngoi so ala manda Mbeti ti Nzapa nga ala gbu nda ti ndara ti Nzapa na mbilimbili ti lo na ala bâ ni na nene ni. Biani, “tënë ti Nzapa” ayeke na ngangu ti hinga nda ti “abibe ti bê ti zo nga na aye so bê ti zo ni aye ti sara.” (aHéb. 4:12). Tongana mbeni zo ayeke diko Mbeti ti Nzapa mingi na lo gbu li na ndo ni, lo yeke ‘hinga tene-biani ti Jéhovah’ mingi (Dan. 9:13). Tongaso, a yeke nzoni e gbu li ti e na ndo ti aversê so andu mbilimbili awokongo ti e.
8. E lingbi ti wara yingo vulu na lege ti aye wa?
8 Jésus awara lege ti luti na lê ti atara ndali ti so lo hinga Mbeti ti Nzapa nga lo ‘si singo na yingo vulu’. (Luc 4:1). Ti wara mara ti ngangu so a lingbi e ga nduru na Jéhovah na gingo ti bâ nzoni na lege ti aye kue so lo leke ti mû lege na e ti wara yingo ti lo (Jacq. 4:7, 8). Na popo ti aye so, a yeke wara mandango Bible, sambela nga na guengo lakue na abungbi. Aita mingi abâ nga nene ti duti lakue na mbeni nzoni kapa ti aye ti yingo so ayeke mû maboko na ala ti zia si li ti ala angbâ gi na ndo ti abibe so ayeke kpengba zo na lege ti yingo.
9, 10. (a) Atara wa ayeke mingi na ndo so mo yeke dä? (b) Tongana nyen gbungo li nga na sambela alingbi ti mû ngangu na mo ti luti na lê ti tara même na ngoi so mo woko?
9 Atara wa a lingbi mo luti na lê ni? Bê ti mo ayeke pusu mo ti gi ti zia nzara ti mo na yâ ti mbeni zo so ayeke koli wala wali ti mo pëpe? Tongana ade mo sara mariage pëpe, bê ti mo ayeke pusu mo ti sara mariage na mbeni zo so ayeke wakua ti Jéhovah pëpe? Na ngoi so aChrétien ayeke bâ télé wala ala yeke gi ye na ndo ti Internet, ala lingbi ti tingbi gi gbagburu tongaso na mbeni tara so apusu ala ti bâ ye ti sioni. Ye tongaso asi na mo awe? Tongana asi na mo awe, mo sara ye lani tongana nyen? A yeke lege ti ndara ti gbu li ti bâ tongana nyen faute oko alingbi ti gue na zo ti sara mbeni faute na ndo ni nga na nda ni ti sara mbeni kota siokpari (Jacq. 1:14, 15). Gbu li na ndo ti vundu so mo yeke zia na bê ti Jéhovah, congrégation nga na azo ti sewa ti mo tongana mo sara mbeni kota siokpari. Nde na so, zo ayeke duti na nzoni yingo-ti-hinga tongana lo sara ye alingbi na ye so Nzapa ahunda. (Diko Psaume 119:37; aProverbe 22:3.) Na angoi kue so mo tingbi na mara ti atara tongaso, gi ti sambela ti wara ngangu ti luti na lê ni.
10 Mbeni ye nde ayeke nga dä so a lingbi e dabe ti e na ni na ndo ti atara so Zabolo atara na Jésus. Satan aga lani nduru na Jésus na peko ti so Jésus ate kobe pëpe teti lango 40 na yando. Kite ayeke pëpe so Zabolo apensé lani so a yeke mbilimbili “ngoi so alingbi” ti tara ti bâ wala Jésus ayeke be-ta-zo (Luc 4:13). Satan ayeke gi ngoi so alingbi ti tara e nga kue ti bâ wala e yeke be-ta-zo. Ni la, a yeke kota ye ti tene e ngbâ ti kpengba na lege ti yingo. Mingi ni Satan ayeke ga ti tara mbeni zo na ngoi so lo bâ so zo ni awoko mingi na mbeni place. Tongaso, na ngoi kue so e bâ so e woko wala bê ti e anze, a yeke nzoni e sambela Jéhovah mingi ahon ti kozo ti tene lo bata e nga ti wara yingo vulu ti lo.—2 aCor. 12:8-10.
Yingo vulu amû ngangu na e na ngoi so e woko nga bê ti e anze
11, 12. (a) Ngbanga ti nyen laso bê ti azo mingi anze? (b) Nyen la alingbi ti mû ngangu na e ti hon ndo ti bê so anze?
11 Teti so e yeke azo so alingbi kue pëpe, ngoi na ngoi bê ti e ayeke nze. Ti laso a yeke ngangu mingi ndali ti so e yeke na yâ ti mbeni ngoi so asara si li ti azo ayeke kpô pëpe. E yeke na yâ ti ngoi so ayeke ngangu mingi so peut-être mara ni adë ti si lâ oko pëpe na yâ ti mbaï ti azo (2 Tim. 3:1-5). Na ngoi so Harmaguédon ayeke pusu nduru nduru, kpale ti nginza, aye so ayeke sara si bê ti zo ayeke gi na nduzu nga na ambeni kpale ayeke gue gi guengo na li ni. A yeke ye ti dongo bê pëpe tongana ambeni zo abâ so a yeke ngangu mingi na ala ti bâ lege ti sewa ti ala nga ti mû na ala aye so ala yeke na bezoin ni na lege ti mitele. Ala bâ so ala nze, ala woko kue nga ngangu ahunzi na ala. Tongana ye tongaso asi na mo, mo lingbi ti sara nyen ti luti na lê ti kpale ni?
12 Girisa pëpe so Jésus adë bê ti adisciple ti lo so lo yeke mû na ala mbeni wamungo maboko: Yingo vulu ti Nzapa. (Diko Jean 14:16, 17.) A yeke mbeni ngangu so ahon tanga ti angangu kue na yâ ti dunia. Na lege ni, Jéhovah alingbi ti “sara ye mingi” ti mû na e ngangu so e yeke na bezoin ni si e gbu ngangu na yâ ti atara kue (aÉph. 3:20). Bazengele Paul atene so tongana e zia bê ti e na ndo ni, e yeke wara “ngangu so ahon ti so zo ayeke na ni” atâa a pete “e mbage na mbage kue”. (2 aCor. 4:7, 8). Jéhovah amû pëpe zendo ti zi akpale ti e, me lo dë bê ti e so na lege ti yingo ti lo, lo yeke mû na e ngangu ti luti na lê ni.—aPhil. 4:13.
13. (a) Tongana nyen mbeni maseka awara ngangu ti luti na gbele mbeni kpale so asi na lo? (b) Mo hinga mbeni tapande tongaso?
13 Bâ tapande ti Stephanie, mbeni maseka-wali so ayeke na ngu 19 na so ayeke pionnier permanent. Na ngu 12, kobela ti tension abi lo nga a bâ so lo yeke na cancer ti mongoli. Ngbene ye na ngoi ni so, a opéré lo fani use awe, a mû na lo angangu yorö ti cancer nga tension akiri abi lo fani use. A sara si maboko na gere ti lo ti wali asara kua nzoni pëpe nga lo yeke na kpale ti bango ndo. A lingbi Stephanie abata ngangu ti lo ndali ti aye so na lê ti lo ayeke kota ye, aye tongana guengo na abungbi nga fango tënë. Ye oko, lo bâ so yingo ti Jéhovah amû maboko na lo ti gbu ngangu na alege mingi. Aye so asi na ambeni ita na so lo diko ni na yâ ti ambeti ti e amû ngangu na lo na ngoi so bê ti lo anze. Aita akpengba lo na lege ti alettre wala na lege ti atënë so akpengba zo so ala yeke tene na lo kozoni na abungbi wala na pekoni. Azo so asara nzara ti tâ tënë nga kue afa so ala kiri singila ndali ti aye so Stephanie afa na ala na lege so ala yeke gue na ndo ti lo ti tene lo manda Bible na ala. Stephanie akiri singila mingi na Jéhovah ndali ti aye so kue. Versê ti lo so lo ye ni mingi ayeke Psaume 41:4. Lo yeke na kite oko pëpe so versê so aga tâ tënë na ndo ti lo.
14. Ye wa a lingbi e kpe ni na ngoi so bê ti e anze? Ngbanga ti nyen?
14 Na ngoi so e woko wala e yeke na yâ ti aye ti ngangu, a lingbi e tene lâ oko pëpe so lege ti sigigi na yâ ni ayeke ti kiri na peko na yâ ti akusala ti yingo. A yeke duti sioni mingi ti sara tongaso. Ngbanga ti nyen? Ngbanga ti so aye tongana mandango Bible zo wani nga na sewa, fango tënë, nga na guengo na abungbi ayeke aye so ayeke mû lege na e ti wara yingo vulu. Kusala ti aChrétien ayeke lakue ye so ayeke mû ngangu na zo. (Diko Matthieu 11:28, 29.) Mingi ni aita so anze kue si aga na bungbi, na ngoi so ala londo ti kiri na yanga-da, ala kiri awara ngangu na lege ti yingo.
15. (a) Jéhovah amû zendo ti sara si gigi akpengba pëpe na mbeni Chrétien? Fa ndani na lege ti Bible. (b) Ye wa Nzapa amû zendo ni na e? Ye so aga na hundango tënë wa?
15 Biani, ye so aye pëpe ti tene so dutingo Chrétien ayeke mbeni ye so ayeke ngangu pëpe. A lingbi mbeni Chrétien asara ngangu si lo ngbâ be-ta-zo (Mat. 16:24-26; Luc 13:24). Ye oko, na lege ti yingo vulu, Jéhovah alingbi ti mû ngangu na zo so awoko. Prophète Ésaïe atene: “Azo so aku L’Éternel, fade ala kiri ala wara ngangu; fade ala ma na nduzu na kpangbi tongana angualo; fade ala kpe, me ala nze pëpe; fade ala tambela, me ngangu ti ala awe pëpe.” (És. 40:29-31). Tongana a yeke tongaso, a yeke nzoni e hunda tere ti e: Nyen la asara biani si e woko na lege ti yingo?
16. Nyen la e lingbi ti sara ti zia lege ti ambeni ye so alingbi ti sara si e woko wala bê ti e anze?
16 Bible awa e ti “hinga biani aye so ayeke akota ye mingi ahon atanga ni”. (aPhil. 1:10). Na hakango fini ti Chrétien na mbeni mandako ti kpengo loro so lege ni ayo, yingo vulu apusu bazengele Paul ti mû wango so. Lo tene: “Zia e zi nengo ye kue e bi ni . . . zia e gbu ngangu, e kpe loro ti mandako so a zia na gbele e.” (aHéb. 12:1). Lo ye ti tene so a lingbi e kpe ti tomba peko ti aye so ayeke asenge senge ye, aye so ane zo senge senge, so ayeke sara si zo awoko kue. Peut-être ambeni zo na popo ti e ayeke na aye mingi awe ti sarango ni, me ala yeke gi ti sara ambeni ye mingi na ndo ni. Tongaso, tongana fani mingi mo bâ so mo woko na akpale ahon ndo ti mo, a yeke peut-être nzoni ti kiri ti bâ ngangu so mo yeke mû ti sara na kua ti nginza ti mo, fani oko la mo yeke voyage gi senge senge ti wara ngia dä nga na ngangu so mo yeke mû ti sara na angia ti wanguru wala ambeni ngia. A yeke nzoni sarango ye na lege ni nga na hingango akatikati ti e apusu e kue ti hinga so e lingbi pëpe ti sara aye kue na e gi ti zia lege ti ambeni ye so ayeke akota ye pëpe.
17. Ngbanga ti nyen bê ti ambeni zo anze? Me dengo bê wa Jéhovah amû na ndo ti tënë so?
17 Bê ti ambeni na popo ti e alingbi ti nze kete ndali ti so futingo ti bungbi ti aye ti ngoi so aga hio pëpe tongana ti so e ku ni (aProv. 13:12). Ye oko, azo so ayeke na mara ti pensé so alingbi ti wara ngangu na lege ti atënë so ayeke na Habakuk 2:3. Versê ni atene: “Ye so mo bâ tongana suma, fade a si na l’heure ni so a leke awe, fade tënë ni ague juska na nda ni, na a ga mvene pëpe. Tongana tënë ni asi fade pëpe, mo ku; fade a ga biani, a manke pëpe.” Jéhovah adë bê ti e so futingo ti aye ti dunia so ayeke si tâ na ngoi ni so lo diko!
18. (a) Azendo wa amû ngangu na mo? (b) Tongana nyen article ti peko ayeke ga na e ye ti nzoni?
18 Biani, awakua be-ta-zo kue ti Jéhovah ayeke ku kungo lango so azo ayeke woko mbeni pëpe na bê ti ala ayeke nze pëpe, ngoi so azo kue so ayeke na fini ayeke kiri na “lâ ti pendere” ti ala (Job 33:25). Même laso e lingbi ti wara ngangu grâce na yingo vulu na ngoi so e yeke bi tere ti e na yâ ti akusala ti yingo so ayeke mû ngangu na zo (2 aCor. 4:16; aÉph. 3:16). Zia pëpe si fatigue akanga lege na mo ti wara aye ti nzoni so ayeke ngbâ teti lakue lakue. Akpale kue, atâa ati so aga na lege ti tara, bê so anze wala ndali ti so e woko ayeke hunzi. Même tongana a hunzi fade fadeso pëpe, na yâ ti fini dunia ti Nzapa a yeke hon. Na yâ ti article ti peko e yeke bâ tongana nyen yingo vulu amû ngangu na aChrétien ti gbu ngangu na ngoi so a sara ngangu na ala, ti dö sese na amba ti ala so ayeke pusu ala ti sara ye ti sioni nga ti gbu ngangu na yâ ti ambeni kpale nde nde.
Mo yeke kiri tënë tongana nyen?
• Na lege wa dikongo Bible ayeke mû ngangu na e?
• Tongana nyen sambela nga na gbungo li ayeke mû ngangu na e?
• Mo lingbi ti sara nyen ti zi aye so mingi ni ayeke sara si bê ti mo anze?
[Foto na lembeti 26]
Abungbi alingbi ti mû ngangu na e na lege ti yingo