‘Mbi wara ngia ti mbi na yâ atënë ti dango bê ti mo’

“Tënë kue so a sara na Mbeti ti Nzapa giriri, a sara na mbeti si e manda ye.”​—AROMAIN 15:4.

JÉHOVAH ayeke mû atënë ti dango bê na azo ti lo ti mû maboko na ala ti hon ndo ti akpale ti ngangu ngoi so. E yeke wara ambeni tënë ti dango bê so na ngoi ti dikongo Bible e mveni. Ti ambeni, e yeke wara ni na yâ ti atënë so a fa ni na bungbi wala na yâ akiringo tënë ti aita. Mingi ti aye so e yeke diko wala e yeke mä na angoi ni so ayeke afini tënë pëpe. Peut-être, e mä atënë ni so kozo awe. Ye oko, teti so e ninga ti girisa ye pëpe, a hunda ti dabe ti e lakue na aye so Jéhovah aleke ti sara, andia ti lo nga na aye so lo fa na e ti sara. A yeke nzoni e bâ na nene ni atënë ti dango bê so Nzapa amû na e. Atënë ti dango so ayeke mû maboko na e ti girisa lâ oko pëpe aye so apusu e lani ti yeda ti sara ye so Nzapa aye. A yeke tongaso si wasungo psaume ahe bia na Jéhovah, lo tene: “Mbi wara ngia ti mbi na yâ tënë ti témoin [“atënë ti dango bê”, NW ] ti Mo.”​—Psaume 119:24.

² Atâa so a sû Tënë ti Nzapa a sara ngu mingi awe, a ngbâ lakue na ngangu ti sara ye (aHébreu 4:12). A yeke fa na e atâ mbaï ti azo ti giriri. Atâa so angobo na abango ndo ti azo agbian ngbene ye so a sû Bible, fani mingi gi a-oko kpale so ala wara na ngoi ni kâ si e nga e yeke wara. Mingi ti ambaï so a bata na yâ Bible teti nzoni ti e ayeke akpengba tapande ti azo so lani ala ndoye Jéhovah na ala duti be-ta-zo na lo atâa akpale so asi na ala. Ambeni agboto lê na ndo tambela so Nzapa ake. Jéhovah asara si a zia ambaï so kue (anzoni ni na asioni ni) na yâ ti Bible ti duti tongana atënë ti dango bê ndali ti e. A gue oko na tënë ti bazengele Paul so lo tene: “Tënë kue so a sara na Mbeti ti Nzapa giriri, a sara na mbeti si e manda ye, si na lege ti bê so azia pëpe, na ti tënë ti Mbeti ti Nzapa so alungula vundu, e lingbi duti na beku.”​—aRomain 15:4.

³ Zia e kiri e bâ ambaï ota so ayeke na yâ ti Mbeti ti Nzapa: mbaï ti sarango ye ti David na mbage ti Saül, ti Ananias na Saphira nga ti sarango ye ti Joseph na mbage ti wali ti Potiphar. E yeke manda mbeni kpengba ye na yâ ti ambaï so oko oko kue.

Duti be-ta-zo na aye so Nzapa azia na sese

⁴ Gbia Saül aduti lani be-ta-zo na Jéhovah pëpe na lo lingbi mbeni pëpe ti komande azo ti Jéhovah. Tongaso, Nzapa ake lo na Lo mû yanga na Prophète Samuel ti sa mafuta na li ti David ti ga ande fini gbia ti Israël. Na ngoi so David afa so lo yeke na akode mingi ti tiri bira na azo ti Israël agonda lo ngbanga ni, Saül ato nda ti bâ lo tongana wato. Fani mingi Saül agi ti fâ lo. Na angoi so oko oko kue, ye oko asara David pëpe ngbanga ti so Jéhovah ayeke na lo.​—1 Samuel 18:6-12, 25; 19:10, 11.

⁵ Teti angu mingi, a lingbi David akpe ague na ando nde nde ti bata tere ti lo. Na angoi so lege azi na lo ti fâ Saül, azo ti David awa lo ti fâ lo biani. Ala tene Jéhovah si azia wato ti lo so na maboko ti lo. Me David ake. Ye so apusu David ti sara tongaso ayeke so lo yeke be-ta-zo na Jéhovah nga lo mû nengo mingi na dutingo ti Saül tongana gbia so Jéhovah asa mafuta na li ti lo. Zo wa la asara si Saül aga gbia ti Israël? A yeke Jéhovah pëpe? Tongaso, a yeke Jéhovah si ayeke zi lo na ngoi so lo bâ a yeke nzoni ti sara ni. David abâ ti lo so lo yeke na droit ti sara ye oko pëpe. Na peko ti so lo sara kue ti tene ngonzo ti Saül adë na tere ti lo, David atene: “Fade L’Eternel mveni afâ lo, wala fade lâ ti kui ti lo asi, wala fade lo gue na bira si lo kui dä. A lingbi L’Eternel agbanzi mbi si mbi zia maboko ti mbi pëpe na ndo zo so L’Eternel asa mafuta na li ti lo.”​—1 Samuel 24:4-16; 26:7-20.

⁶ Mbeni kpengba ye ti manda ayeke na yâ ti mbaï so. A si na mo awe ti hunda tere ti mo na ndo nda ni so ambeni tënë ayeke londo na yâ ti kongregation? A lingbi ti si so sarango ye ti mbeni ita ayeke na lege ni kue pëpe. Peut-être sarango ye ti lo ni ayeke mbeni kota siokpari pëpe, me a sara si mo duti nzoni pëpe. A yeke nzoni mo sara tongana nyen? Teti mo ye ti fa so mo bi bê na ita ni nga mo ye ti ngbâ be-ta-zo na Jéhovah, peut-être mo yeke sara tënë na ita ni na nzobe ti kiri na lo na nzoni lege. Ka tongana mo sara tënë na lo me mo bâ so kpale ni angbâ? Na peko ti so mo sara aye kue so mo bâ a yeke nzoni ti sara, peut-être mo ye ande ti zia tënë ni na maboko ti Jéhovah. So ayeke ye so David asara lani.

⁷ Wala peut-être kpale ti mo ayeke so amba ti mo ake mo wala asara ye ti kirikiri na mo ndali ti sewa so mo yeke dä, mara ti mo wala ndali ti nzapa so mo yeke sara. Peut-être ti ndembe so mo lingbi ti sara ye mingi pëpe wala ye oko pëpe ndali ni. A lingbi ti duti ngangu mingi ti kanga bê dä, me sarango ye ti David na gbele ye ti kirikiri so a sara na lo afa na e mbeni ye. Apsaume so David asû na so andu bê ayeke gi pëpe asambela so lo tene ni na Nzapa na bê ti lo kue ti tene a bata lo si Saül agbu lo pëpe, me ala fa nga so lo duti be-ta-zo na Jéhovah nga lo bi bê ti lo ti sara si iri ti Nzapa awara gonda (Psaume 18:2-7, 26-28, 31-33, 49-51; 57:2-12). David angbâ lani be-ta-zo na Jéhovah atâa so Saül asara ye ti kirikiri na lo teti angu mingi. A yeke nzoni e nga e ngbâ be-ta-zo na Jéhovah nga na bungbi ti lo atâa ye ti kirikiri so a sara na e nga atâa ye so ambeni zo ayeke sara. A lingbi e duti biani na mabe so Jéhovah ahinga ye ni nzoni​—Psaume 86:2.

⁸ A-Témoin ti Jéhovah ti Mozambique ayeke tapande ti ambeni zo ti ngoi ti e so aduti be-ta-zo na Jéhovah na ngoi ti tara. Na ngu 1984, mbeni bungbi ti aturugu so ayeke awabingo kpale aga fani mingi na yâ ti akete kodoro ti ala, na ala nzi ye, ala zö ada nga ala fâ azo. So ye ni ayeke lani tongaso, aita alingbi pëpe ti sara mbeni ye ti bata tere ti ala. Aturugu ni ayeke gbu lani azo ti akete kodoro so na ngangu ti lï na yâ ti bungbi ti ala ni wala ti sara ambeni ye ti mû maboko na ni. A-Témoin ti Jéhovah abâ so ti sara aye tongaso ague nde na dutingo ti ala ti Chrétien. So ala ke, ngonzo agbu azo so ngangu mingi. Na yâ ti ngoi ti ngangu so, a fâ aTémoin ti Jéhovah 30 tongaso. Me, atâa so a tene na ala so a yeke fâ ala, ala ngbâ be-ta-zo na Jéhovah.a Legeoko tongana David, ala gbu ngangu na gbele ye ti kirikiri, me na nda ni ala sö benda.

Tënë ti dango bê so ayeke nga gbotongo mê

⁹ Ambeni zo so Bible asara tënë ti ala ayeke atapande ti gbotongo mê so adabe e na asioni ye so a lingbi e sara ni pëpe. Biani, na yâ ti Bible, a yeke wara ambaï ti azo mingi, même na popo ti awakua ti Nzapa, so asara sioni na ala wara vundu na pekoni (1 aCorinthien 10:11). Mbeni mbaï ni oko ayeke ti Ananias na Saphira, mbeni koli na wali so ala yeke lani amembre ti kongregation ti akozo Chrétien na Jérusalem.

¹⁰ Na peko ti lâ ti Pentecôte ti ngu 33, a hunda lani ti mû aye ti mitele na afini wamabe so angbâ na tere ti abazengele na Jérusalem ti mä tënë so ala yeke fa. Ambeni membre ti kongregation ni akä sese ti ala na ala ga na nginza ni ti kangbi na popo ti ala si ye amanke zo oko na popo ti ala pëpe (Kusala 2:41-45). Ananias na Saphira akä mbeni yaka na ala ga gi na mbage ti nginza ni na abazengele; ala tene matabisi so ala mû ayeke nginza kue ti ye so ala kä. Tâ tënë, Ananias na Saphira ayeke lani na droit ti mû ye tongana ti so bê ti ala aye, me a yeke pëpe nzoni bê si apusu ala ti mû ye nga ala sara ye na handa. Ala ye si aita abâ so ala yeke anzoni zo nga so ala mû ye ahon ti so ala mû ni biani. Yingo vulu apusu bazengele Pierre ti fa na gigi sarango ye ti ala na handa nga na ndendia, na Jéhovah asara si ala kui.​—Kusala 5:1-10.

¹¹ Tongana bê ti e apusu e ti ba yâ ti tâ tënë si azo abâ e na nzoni lê, zia e dabe ti e na mbaï ti Ananias na Saphira so agboto mê ti e ngangu. E lingbi ti handa amba ti e azo, me e lingbi ti handa Jéhovah pëpe (aHébreu 4:13). Fani mingi, Mbeti ti Nzapa ayeke wa e ti tene tâ tënë na popo ti e, teti so azo ti mvene ayeke duti ande pëpe na ndo ti sese so a zi ye ti kirikiri kue dä (aProverbe 14:2; Apocalypse 21:8; 22:15). A yeke ngangu pëpe ti hinga nda ni so a yeke nzoni e tene tâ tënë: Zo so ayeke pusu azo ti tene mvene ayeke gi Satan Zabolo.​—Jean 8:44.

¹² Sarango ye na handa pëpe ayeke ga na e aye ti nzoni mingi. Ambeni ayeke so e yeke duti na nzo yingo-ti-hinga nga e yeke na ngia so azo amû bê ti ala na e. A-Chrétien mingi awara kua ti nginza wala ala ngbâ dä ngbanga ti so ala sara ye na handa pëpe. Ye oko, ye ti nzoni so ahon atanga ni kue ayeke so sarango ye na handa pëpe asara si e ga ndeko ti Nzapa ti Ngangu Ahon Kue.​—Psaume 15:1, 2.

Ngbâ ti bata tere ti mo

¹³ A kä Joseph, molenge ti Jacob, na ngbâa tongana lo yeke na ngu 17. Na nda ni, lo sara kua na da ti Potiphar, mbeni kota zo na yangbo ti gbia ti Egypte, ndo so wali ti patron ti lo asara nzara ti lo. Teti so Joseph ayeke pendere mingi na lê ti wali ti Potiphar, lâ oko oko lo yeke tene na Joseph: “Mo bungbi na mbi.” Joseph ayo lani mingi na sewa ti lo nga zo oko ahinga lo pëpe na kodoro so lo yeke dä. Lo lingbi lani ti bungbi na wali so sân ti tene mbeni zo ahinga tënë ni. Ye oko, tongana wali ti Potiphar agbu lo na ngangu ti bungbi na lo, Joseph akpe.​—Genèse 37:2, 18-28; 39:1-12.

¹⁴ Joseph akono lani na yâ ti mbeni sewa so ayeke voro Nzapa, na lo hinga nzoni so ti bungbi na zo so ayeke koli wala wali ti mo pëpe ayeke sioni. Ni la, lo hunda: “Mbi lingbi sara kota sioye so na siokpari ti ke Nzapa tongana nyen?” E lingbi ti tene so ye so afa lege na Joseph ayeke so lo hinga ye so Nzapa afa na yaka ti Eden: koli ayeke duti gi na wali oko na wali nga asara tongaso (Genèse 2:24). E lingbi ti wara nzoni tongana e gbu li na ndo ye so Joseph asara lani. Na ambeni kodoro, a bâ pitan tongana ye so zo alingbi ti sara ni senge na tongaso amaseka so ake ti ala ti sara ni, amba ti ala ayeke he ala mingi. Bungbingo koli na wali na gigi ti mariage amû ndo na popo ti akota zo. Ni la, a yeke kota ye mingi ti dabe ti e na mbaï ti Joseph laso. Pitan na lango-sioni ayeke lakue siokpari na lê ti Nzapa (aHébreu 13:4). Mingi ti azo so atï na yâ ti pitan awe abâ biani so ambeni ye ayeke dä so ndali ni a yeke nzoni zo asara pitan pëpe. Ambeni ye ti sioni so zo ayeke wara na pekoni alingbi ti duti kamene, yingo-ti-hinga so ayeke kpô pëpe, mbanda, ngo na kobela ti koli na wali. Aye ni ayeke gi tongana ti so Mbeti ti Nzapa adabe ti e dä: Zo so asara pitan “asara sioni na tere ti lo mveni.”​—1 aCorinthien 5:9-12; 6:18; aProverbe 6:23-29, 32.

¹⁵ Jennyb ayeke mbeni Témoin ti Jéhovah so ayeke kumbamba. Ndali ti mbeni ye so asi na lo, lo yeke bâ na nene ni atënë ti dango bê ti Nzapa. Na place ti kua, mbeni koli so azo abâ lo yeke pendere afa na Jenny so lo sara nzara ti lo. Me Jenny ake; koli ni angbâ lakue ti gi ti woko bê ti lo na anzoni tënë. Jenny afa tâ ye so ayeke na bê ti lo lani: “Mbi bâ so a yeke lani ngangu mingi na mbi ti bata tere ti mbi ndali ti so ti bâ so mbeni koli asara nzara ti mbi anzere na mbi.” Ye oko, lo hinga so koli so aye gi ti zia lo na popo ti gbâ ti awali so lo bungbi na ala awe. Ni la, tongana lo bâ so lo ye ti woko, lo hunda mingi na Jéhovah ti mû maboko na lo ti ngbâ be-ta-zo na Lo. Jenny agi aye na yâ ti Bible nga na yâ ti ambeti ti e na lo tene so aye so ni manda ayeke tongana atënë ti dango bê so amû na ni ngangu si lê ti ni angbâ ti kpengba. Mbeni ye so lo dabe ti lo na ni ayeke mbaï ti Joseph na wali ti Potiphar. Lo hunzi tënë ti lo tongaso: “Tongana mbi ngbâ lakue ti dabe ti mbi so mbi ye Jéhovah mingi, mbi lingbi ande pëpe ti sara mbeto so mbi yeke sara kota sioye nga na siokpari ti ke lo.”

Mä atënë ti dango bê ti Nzapa!

¹⁶ E kue e lingbi ti kiri ti bâ andia ti Jéhovah na nene ni mingi ahon ti kozo tongana e sara ngangu ti hinga nda ni so lo sara si a bata ambeni mbaï na yâ Bible ndali ti e. Ambaï so afa nyen na e? Asarango ye wa ti azo ti yâ ti ambaï so a yeke nzoni e mû pekoni? Nga aso wa la a yeke nzoni e kpe ni? Mbeti ti Nzapa afa mbaï ti azo ngbangbo mingi. A yeke nzoni azo kue so aye si Nzapa afa ye na ala agi ti duti na nzara ti wara ndara so abata zo na fini. Mbeni ye so ayeke mû ndara so na zo ayeke aye so e lingbi ti manda na yâ ti atapande so Jéhovah abata ni nzoni teti e. Fani mingi, Tour ti Ba Ndo ayeke fa ambaï ti azo so e lingbi ti manda ye na lege ti ye so asi na ala. Ngbanga ti nyen mo kiri mo bâ ambaï so pëpe?

¹⁷ E lingbi ti kiri singila mingi na Jéhovah teti ndoye so lo fa na mbage ti ala so ayeke sara ngangu ti nzere na lo. Legeoko tongana akoli na awali so Bible asara tënë ti ala ayeke lani mbilimbili-kue pëpe, e nga e yeke mbilimbili-kue pëpe. Ye oko, ye so Bible afa na ndo aye so ala sara ayeke mû maboko na e mingi. Tongana e mä atënë ti dango bê ti Jéhovah, e lingbi ti kpe akota siokpari, na e lingbi ti mû tapande ti ala so asara ye mbilimbili. Tongana e sara ni, e yeke tene oko tënë so wasungo psaume atene: “Ngia ayeke na ala so abata tënë ti témoin [“atënë ti dango bê”, NW ] ti [Jéhovah], ala so agi Lo na bê ti ala kue. Âme ti mbi abata tënë ti témoin ti Mo, na mbi ndoye tënë ni mingi.”—Psaume 119:2, 167.

[Akete tënë na gbe ni]

Mo yeke kiri tënë tongana nyen?

• Nyen la e lingbi ti manda na ndo sarango ye ti David na mbage ti Saül?

• Mbaï ti Ananias na Saphira afa nyen na e?

• Ngbanga ti nyen mbaï ti Joseph ayeke kota ye mingi na e laso?

[Ahundango tënë ti manda na ye]

 1. Tongana nyen Jéhovah ayeke mû na e atënë ti dango bê? Ngbanga ti nyen a hunda ti dabe ti e na aye?

2, 3. (a) Ngbanga ti nyen Jéhovah abata na yâ ti Bible mbaï ti ambeni zo juska laso? (b) Ambaï wa so ayeke na yâ ti Bible e yeke bâ ni na yâ ti article so?

4, 5. (a) Ye ni ayeke lani tongana nyen na popo ti Gbia Saül na David? (b) David asara ye tongana nyen na gbele kengo so Saül ake na lo?

 6. Ngbanga ti nyen a yeke nzoni e gbu li na ndo mbaï ti David na Saül?

 7. Na tapande ti David, a yeke nzoni e sara ye tongana nyen tongana a sara ye ti kirikiri na e wala a ke e?

 8. A-Témoin ti Jéhovah ti Mozambique asara tongana nyen na ngoi so a tara dutingo ti ala be-ta-zo na Jéhovah?

9, 10. (a) Tongana nyen e lingbi ti wara nzoni na lege ti atapande so ayeke na yâ ti Bible? (b) Sioni ti nyen si ayeke na yâ ti ye so Ananias na Saphira asara?

11, 12. (a) Ambeni versê wa ti Bible ayeke wa e ti sara ye na handa pëpe? (b) Sarango ye na handa pëpe aga na aye ti nzoni wa?

13. Nyen la asi na Joseph? Lo sara tongana nyen?

14, 15. (a) Ngbanga ti nyen mbaï ti Joseph ayeke nzoni mingi teti e? (b) Ngbanga ti nyen mbeni ita-wali ayeke na ngia so lo mä atënë ti dango bê ti Nzapa?

16. Tongana e kiri e bâ ambaï ti azo so Bible asara tënë ti ala nga e gbu li na ndo ni, e yeke wara nzoni dä tongana nyen?

17. Mo bâ ti mo atënë ti dango bê ti Jéhovah tongana nyen? Ngbanga ti nyen?

[Foto na lembeti 26]

Ngbanga ti nyen David ake ti yeda si a fâ Saül?

[Foto na lembeti 27]

E manda nyen na yâ mbaï ti Ananias na Saphira?

[Foto na lembeti 28]

Nyen la apusu Joseph ti ke ye ti pitan?