Avril: Ngoi ti ‘Sala Kusala Ngangu na ti Tiri’

¹ Ayenga so angoro Mémorial ayeke mbeni ngoi teti azo ti Jéhovah ti gbu li nzoni. So ayeke ngoi ti bi bê na ndo ye so kui ti Christ asala na ti gbu li na ndo beku so Nzapa amu na so aga tâ ye na lege ti mênë so Jésus asa. Tongana mo bi bê ti mo na ndo lango 19 ti nze ti avril ti ngu so ahon, ye nyen aga na li ti mo? Mo lingbi ti dabe ti mo na lê ti azo so mo ba na lakui so? pendere dutingo na lege ti yingo na ngoi ti Mémorial ni? nene ni ti lisoro so aluti na ndo ti Bible nga na asambela so a sala na bê kue? Peut-être mo leke na bê ti mo ti fa na gigi mingi ahon konongo ti bê ti kiri singila ti mo teti ndoye so Jéhovah na Jésus afa na mbage ti mo. Tongana nyen gbungo li tongaso asala ye na ndo ti mo fadeso?

² A yeke polele so azo ti Jéhovah afa bê ti kiri singila ti ala gi na tene ti yanga pepe. (aCol. 3:15, 17) Mbilimbili, na avril so ahon e wara lege ti fa bê ti kiri singila ti e teti aye so Jéhovah aleke teti salut na mungo mbage ti e mingi na yâ kusala ti Chrétien. Wungo ti apionnier auxiliaire ahon kota wungo so a wara kozoni na yâ akodoro mingi ti Do na ti Bê Afrika. Na tapande, na avril so ahon, na Togo a wara mbeni fini kota wungo ti apionnier auxiliaire 1 778. So ahon kota wungo ti kozoni na yâ kodoro so na lege ti azo 21 na ndo ti ala 100. Na Sénégal, wungo ti ala asi 196, wungo so ahon wungo ti kozoni na lege ti azo 17 na ndo ti ala 100. Angangu so azo kue so amu kusala ti pionnier asala, nga na ti tanga ti awafango tene ti Royaume kue, asala si a wara afini kota wungo ti angbonga, ti ambeti so a zia, nga na ti afini vizite. Ngia ti e akono na bango so a to nda ti afini mandango Bible ngbangbo mingi nga ti ba mbeni fini kota wungo ti azo so aga na Mémorial!

³ Biani, teti beku ti e ayeke tâ ye, a pusu e ti sala ye. A yeke legeoko tongana ti so bazengele Paul asû na mbeti: “A yeke ngbanga ni la e yeke sala kusala ngangu na e yeke tiri, teti so e zia beku ti e na mbeni Nzapa so ayeke na fini, so ayeke Sauveur ti mara ti azo nde nde kue, mingi ni ti abe-ta-zo.”​—1 Tim. 4:10, NW.

⁴ Na ngoi ti Mémorial so, tongana nyen mo lingbi ti fa na gigi mabe ti mo na yâ aye so Jéhovah aleke teti fini? Na avril so ahon, akodoro mingi awara afini kota wungo ti awafango nzo tene ti Royaume. Fade e yeke wara afini kota wungo na avril so? E lingbi ti hon wungo so na avril so? E lingbi biani ti sala ni. Ye oko, a lingbi wafango tene oko oko, so amu batême awe wala so ade ti mu ni pepe, amu mbage ti lo dä. Afini zo mingi alingbi peut-être ti mu nga mbage na ni. Tongaso, na ngoi so mo leke ti sala kusala ngangu na ti tiri na avril so, ba alege so mo lingbi ti sala si ambeni zo, so na popo ni a wara afini zo nga ala so ade ti hinga kusala ni nzoni pepe, asigigi na tele ti mo.

⁵ Mu maboko na ambeni ti kiri ti sala kusala ti ala: Tongana mo hinga ambeni zo so teti nze oko wala use asigigi ti fa tene pepe, peut-être mo lingbi ti wa ala na ti tisa ala ti sigigi ti fa tene legeoko na mo. Tongana ambeni na yâ ti kongrégation azia ti fa tene, fade a-ancien ayeke sala kue ti sala vizite na ala na ti mu maboko na ala ti kiri ti to nda ti fa tene na avril.

⁶ A lingbi e kue e ngbâ ti hunda lakue yingo ti Jéhovah ti kpengba e na yâ kusala ti lo. (Luc 11:13) A lingbi e sala nyen ti wara yingo so? A lingbi e diko Tene ti Nzapa so asû na gbe ti yingo. (2 Tim. 3:16, 17) Nga a lingbi e “mä ye so Yingo atene na a-Église [“akongrégation,” NW]” na gango na abungbi oku kue ti yenga ni. (Apoc. 3:6) Fadeso a yeke ngoi so azi ti mu maboko na ala so afa tene nze na nze pepe nga na ala so azia ti fa tene ti maï kode ti mandango ye ti ala na ti ga lakue na abungbi. (Ps. 50:23) E yeke sala ni na ngoi so e yeke sala hange ti bata nzoni duti ti e mveni na lege ti yingo. Ye oko, a hunda ti sala mbeni ye nde.

⁷ Bazengele Pierre afa so Nzapa amu yingo ti lo ti nzoni-kue “na ala so amä Lo.” (Kus. 5:32) Mango yanga tongaso ahunda nga ti bata komandema “ti fa tene na azo, na ti sala tene ti témoin.” (Kus. 1:8; 10:42) Ni la, atä a yeke tâ tene so a lingbi e wara yingo ti Nzapa ti mu ngangu na e ti fa tene, a yeke nga tâ tene so na ngoi so e to nda ti fa na gigi nzala ti e ti nzere na Jéhovah, lo yeke mu maboko na e mingi ahon. Zia e ba lâ oko pepe tongana senge ye nene ti mu li ni ti mä yanga na bê kue!

⁸ Mu maboko na amolenge: Ababâ na mama, i ba awe so amolenge ti e ayeke na nzala ti fa tâ tene na zo? Ala yeke sigigi ti fa tene legeoko na i? Tambela ti ala ayeke nzoni biani? Tongana a yeke tongaso, ngbanga ti nyen ti ku? I ga ndulu na mbeni oko ti azo ti Komité ti Kusala ti Kongrégation, na ba wala molenge ti i alingbi awe ti ga mbeni wafango tene na nze ti avril so. (Ba buku Notre Ministère, alembeti 99-100.) Hinga so amolenge ti i alingbi ti mu mbage ti ala mingi na sepelango Jéhovah na kongo na ngoi ti Mémorial so.​—Mat. 21:15, 16.

⁹ Mbeni mama so ayeke Chrétien awa lakue kete molenge ti lo ti wali ti sala tene na azo na ndo Jéhovah. Na ngu so ahon, na ngoi so molenge-wali ni amu tele ti lo na yâ fango tene na mama ti lo, lo zia na tïtî mbeni koli brochure Ahunda nga na ndulu tene lo fa nda ti ali ti tene ni. Koli ni ahunda na lo: “Mo yeke na ngu oke?” Lo tene: “Mbasambala.” Bê ti koli ni adö ti ba lo na fango nda ti ye nzoni tongaso. Na pekoni ala mä so koli ni ahinga aTémoin na ngoi so lo de pendere, me lo ba lâ oko pepe nene ni ti duti na fini alingbi na ni. Ngoi kete na pekoni, a yeke manda Bible na koli ni, na wali ti lo nga na molenge ti lo ti wali.

¹⁰ Apendere mingi aga awafango tene awe, na e yeke na ngia ti duti ndulu na ala na ngoi so ala yeke sala kusala legeoko na e na yâ fango tene. Apendere so alingbi ti pusu na ti mu wâ na ambeni pendere so ayeke na ngu ti ala. Me avril ayeke nga mbeni ngoi so alingbi teti azo ti sewa ti kpengba asongo na popo ti ala nga ti leke dutingo ti ala na lege ti yingo na salango kusala maboko na maboko na yâ kusala ti nzoni-kue. A lingbi abeli ti sewa amu li ni na yâ ye so.​—aProv. 24:27.

¹¹ Mu maboko na afini zo: Ti afini zo so mo yeke manda Bible na ala a yeke tongana nyen? Peut-être ala lingbi ti mu mbage ti ala na yâ kota kusala ni na avril so? Peut-être ala fa na gigi nzala ti fa na ambeni zo ye so ala yeke manda na ngoi so i yeke gi nda ti chapitre 2, paragraphe 22, wala chapitre 11, paragraphe 14 ti buku Hingango Ye. Tongana mo ga ndulu ti hunzi buku ni, leke tele ti mo ti sala lisoro na ndo tene ni polele na ngoi so i yeke gi nda ti chapitre 18, paragraphe 8, so atene: “Biani mo yeke na nzala ti sala tene ti aye so mo yeke manda na asongo ti mo, akamarade ti mo, nga na ambeni zo. Tâ tene, peut-être mo to nda ti sala ni awe, legeoko tongana Jésus afa giriri nzo tene na amba ti lo na ndo nde nde. (Luc 10:38, 39; Jean 4:6-15) Fadeso peut-être mo ye ti sala ye mingi ahon so.” A yeke biani tongaso teti azo so mo yeke manda Bible na ala?

¹² Wamandango ye ti mo amä na bê na Tene ti Nzapa? Lo yeke sala ye alingbi na akpengba-ndia ti Bible? Lo sala si fini ti lo aduti alingbi na aye so Nzapa ahunda? Lo yeke gue na abungbi ti kongrégation? Lo yeke na nzala ti sala na Jéhovah Nzapa? Tongaso, ngbanga ti nyen pepe ti wa lo ti sala tene na a-ancien si ala lingbi ba wala lo lingbi awe ti ga mbeni wafango tene so ade ti mu batême pepe na ti fa tene legeoko na mo na avril? (Ba buku Notre Ministère, alembeti 97-9.) Na lege so, lo lingbi ti to nda ti ba na lê ti lo mveni tongana nyen bungbi ti Jéhovah ayeke mu maboko na lo na yâ ngangu ti lo ti sala na Jéhovah.

¹³ Biani, ambeni wamandango ye ague na li ni hio ahon ambeni. Tongaso, ti lingbi na fango ye so ayeke na yâ Kusala ti Royaume ti décembre 2000, lembeti 4 (lembeti 8 teti Togo na Cameroun), aparagraphe 5-6, mingi ti awafango tene ayeke manda mbeni use buku na azo so afa na gigi nzala ti tene ni kozoni me so a hunda ti tene a mu maboko na ala mbeni ti londo ti mu mbage ti ala na kusala ni biani. E glisa lâ oko pepe beku so azo ti bê ti mbilimbili so ayeke ga ande atâ disciple ti Christ, ‘na yâ ngoi kete wala na yâ ngoi mingi.’ (Kus. 26:29) Ye oko, tongana wungo ti anze so mo yeke manda ye na azo tongaso ayeke mbilimbili ‘ngoi mingi,’ peut-être ngoi ti Mémorial so ayeke duti mbeni nzoni lege so azi na wamandango ye ti mo ti to nda ti fa na gigi kota bê ti kiri singila ti lo teti kota ngele ti Christ?

¹⁴ Lege ti mu maboko na ala ti mu mbage na ni: E manda aye mingi na ndo lege ti mu maboko na azo so a ba so ala lingbi kue ti to nda ti fa tene na bango tongana nyen Jésus afa lege na azo. Lo wara gi pepe gbâ ti azo na lo tene na abazengele ti lo ti to nda ti sala tene na ala. Kozoni kue, lo luti mingi na ndo nene ti kusala ti fango tene, lo wa ala ti sambela mingi, nga na pekoni lo mu aye ota so ayeke na gunda ni: mbeni fon wakua, mbeni territoire, na mbeni tokua. (Mat. 9:35-38; 10:5-7; Marc 6:7; Luc 9:2, 6) Mo lingbi ti sala nga tongaso. Atä mo yeke mu ande maboko na molenge ti mo mveni, na mbeni fini wamandango ye, wala na mbeni zo so abi pepe rapport ti kusala ti lo teti mbeni ngoi, a yeke duti ande nzoni ti sala ngangu ti zia na gbele mo aye so ge.

¹⁵ Gboto lê na ndo bezoin ni: Sala si zo ni ahinga nene ti kusala ti fango tene. Duti na nzoni bango ndo na kusala ni. Sala tene ti ambeni ye so asi so afa ye so kongrégation ayeke sala na yâ kusala ni. Fa na gigi bibe so Jésus afa na Matthieu 9:36-38. Wâ zo so ayeke ga ande mbeni wafango tene wala ita so azia ti fa tene ti sambela na ndo mungo mbage ti lo mveni na yâ kusala ni nga teti maïngo ti kusala ni na ndo sese kue.

¹⁶ Sala si zo ni agbu li na ndo alege mingi so azi ti fa na tene: Fa lege so ayeke dä ti tingbi na bungbi ti mandango buku teti fango tene da na da. Sala tene ti lisoro so lo lingbi ti sala na asongo ti lo nga na afon lo wala ti sala tene na akamarade ti lo ti ndo ti kusala wala ti ekole na ngoi ti hungo tele. Tongana mbeni zo amu mbeni kutukutu ti yongo azo, fani mingi lo lingbi ti to nda ti mbeni lisoro gi na bingo bê na azo so ayeke na yâ ti kutukutu ni. Tongana e mu li ni, mingi ni a zi lege na mbeni nzoni fango tene. Biani, alege ayeke mingi ti kangbi beku ti e na azo “lâ na lâ.”​—Ps. 96:2, 3, NW.

¹⁷ Ye oko, peut-être a lingbi ti duti nzoni ahon teti mo na fini wafango tene ni ti fa tene legeoko da na da hio tongana lege azi. Tongana mo zia na gbele mo ti kono yâ ti kusala ti mo na avril so, hunda ita so aba lege ti aterritoire ti mu na mo mbeni oko so ayeke ndulu na mo tongana a yeke dä. Tongana a yeke tongaso, fade ye so ayeke zi lege na mo ti sala kusala na yâ ni nzoni. Na tapande, tongana mo hunzi ti fa tene, wala mo yeke gue na abungbi wala na ambeni ndo nde, mo lingbi ti ba so mbeni zo ayeke na yanga-da na ndo so kozoni mo wara zo oko dä pepe wala na ndo so mbeni zo asala nzala ti tene ni. Tongana lege ayeke dä, sala mbeni ndulu vizite tongana mo ba so a lingbi ti lë lengo nzoni ahon. Na mbage, fade ye so ayeke sala ye mingi na ndo nda ti salango kusala ni nga ngia so e wara na yâ ni.

¹⁸ Leke mbeni tokua so anzere: Ti tene mbeni zo asala nzala ti kangbi tokua ti Royaume na azo ayeke biani nde na ti tene lo ba na nzoni lê kode ti lo ti fango tene, mbilimbili tongana lo yeke fini wafango tene wala lo fa tene pepe a ninga awe. Ti mu maboko na afini zo wala na aita so azia ti fa tene ti leke tele ti ala ayeke ngoi so a sala kusala na ni nzoni. Abungbi ti Kusala na abungbi teti fango tene alingbi ti mu anzoni bibe, me mbeni ye nde ti mu place ti lekengo tele ti zo ni mveni ayeke pepe.

¹⁹ Tongana nyen mo lingbi ti mu maboko na afini zo ti leke tele teti kusala ni? To nda ni na lekengo mbeni kode ti fango périodique na zo, na bata si a kpengba pepe na a duti ndulu! Hunda ala ti bi bê na ndo aye so asi na yâ ti asango ti kodoro so alingbi ti ndu azo ti territoire ni, na pekoni gi mbeni tene na yâ ti oko ti apériodique so asigigi aninga pepe so asala tene na ndo ni. I manda peko ti fango ye ni legeoko, na i gi lege ti sala kusala na ni hio na yâ fango tene.

²⁰ E maï beku ti e teti guengo na li ni na yâ ngoi so ayeke ga: Na ngu so ahon, wungo ti azo so aga na Mémorial na ndo sese kue ahon kutu 14,8. Wungo ti azo so abi arapport tongana awafango tene aduti la ni gi kutu omene. So aye ti tene azo ndulu na kutu 8,8 asala la ni nzala ti tene ni si ala londo ala ga na bungbi so ayeke nde, na ndo so ala mä fango nda ti mbeni oko ti akota fango ye ti Bible. Ala wara lege ti hinga ambeni na popo ti e, so peut-être asala ye ti nzoni na ndo ti ala. Mingi ti ala asala anzoni tene ti e, amu ye teti kusala so e sala na ndo sese kue, na agbu koko ti e na gbele azo. Kota wungo ti azo so ayeke mbeni beku teti guengo na li ni na yâ ngoi so ayeke ga. Ye nyen e lingbi ti sala ti mu maboko na ala ti gue na li ni mingi ahon?

²¹ Mingi ti afini zo ayeke ga na Mémorial ndali ti so mbeni oko na popo ti e atisa ala. Mingi ni, so aye ti tene ala hinga kamême mbeni zo na popo ti ala so aga. Tongana mbeni zo ayeda na tisango ndo ti e, a yeke ngbanga ti e ti yamba lo na ti mu maboko na lo ti wara ye ti nzoni mingi na lege ti programme ni. Teti so yâ ti salle ni ayeke si ande, mu maboko na lo ti wara mbeni ndo ti duti. Mu na lo mbeni Bible, na tisa lo ti he bia legeoko na mo na yâ mbeti ti bia ti mo. Kiri tene na ahundango tene kue so lo lingbi ti hunda. Bingo bê ti mo na zo ni na wâ alingbi ti duti kota ye so ayeke kono nzala ti lo. Biani, e kue e yeke na kungba so: tongana e ba mbeni zo so e hinga lê ti lo pepe, zia e yamba lo na wâ na e sala lisoro kete ti hinga lo.

²² Gango na Mémorial alingbi ti sala biani ye na ndo bibe ti mbeni zo. So lo ga na bungbi ni aye peut-être ti fa so lo wara pepe ye so lo yeke gi na mbeni ndo nde na so e mu mbeni ye so lo ba a lingbi lo gi nda ni nzoni. Fango nda ti pendere kota ngele so a mu alingbi ti duti mbeni kota ye so azi lê ti zo so ahinga ye oko pepe na ndo ndoye ti Jéhovah so ayeke na katikati pepe. Lo lingbi ti ba hio so e yeke nde; azo so ayeke sala ye na tâ bê ti ala kue, azo so ayeke na nzobe, na ndoye, nga so ayekia azo. Salle ti e akpa oko pepe ye so peut-être lo ba na yâ ti a-église so afa a-image na angobo ti salango ye so nda ni ayeke dä pepe. Afini zo ayeke ba biani so azo so aga alondo na yâ amara ti dutingo na fini nde nde, na so a bi dîme pepe. Bango ye so alingbi ti duti mbeni ngangu ye teti ala ti kiri ti ga.

²³ Na peko ti Mémorial, a lingbi mbeni zo aduti ndulu ti ba peko ti afini zo kue so aga. Tongana mo tisa afini zo, mo yeke na kota kungba. Kozoni si ala hon, sala kue ti tene ala hinga ye na ndo ti tanga ti abungbi ni na Da ti Royaume. Fa li ti tene ti kota diskur ti peko. Fa na ala ndo nga na ngbonga ti Bungbi ti Mandango Buku ti Kongrégation so ayeke ndulu na da ti ala. Na pekoni, mu na ala buku Tâ Ngia ti Sewa, na fa na ala so lisoro so ala yeke sala ande na ndo ni na yenga ti 30 avril ayeke “I Bata Sewa ti I na Gbe ti Angangu so Afuti Ye.” Fa ngbanga ti nyen kongrégation kue ayeke leke tele ti gue na kota bungbi so ayeke ndulu na ala na so a leke ti sala ni na yâ ngoi so ayeke ga.

²⁴ Leke ti sala mbeni kete vizite na da ti ala. Sala kue ti tene ala wara brochure Ahunda na buku Hingango Ye, so ayeke mu lege na ala ti hinga angbongboro fango ye ti Bible. Tongana ade ala to nda ti manda ye pepe, hunda ti manda Bible na ala. Wa ala ti diko brochure A-Témoin ti Jéhovah (tongana a yeke dä pepe, a lingbi ti sala kusala na brochure Unis pour faire la volonté de Dieu), so afa polele tongana nyen bungbi ti e ayeke tambela. Tisa ala ti ba kasete vidéo ti e, tongana Bungbi ti aita ti e kue (Angl.) (wala, tongana a yeke dä pepe, kasete vidéo Unis grâce à l’enseignement divin). Leke ti tene ala tingbi na ambeni ita na yâ ti kongrégation. Na yâ ti anze so ayeke ga, ngbâ ti ba afini zo so; tisa ala ti ga na abungbi tongana surveillant ti circonscription asala vizite wala tongana mo yeke na Kota Bungbi ti Circonscription wala Kota Bungbi ti Lango Oko. Mu na ala lege kue ti fa so ala ‘lingbi na ye so ahunda teti fini ti lakue lakue’!​—Kus. 13:48, NW.

²⁵ Ye so a-ancien alingbi ti sala: Nzoni maïngo ti angangu so a yeke sala mingi na yâ kusala ni na nze ti avril so ayeke luti ande mingi na ndo ti a-ancien. Tongana mo mu li ni na yâ mandango buku, leke molongo ti aye so mo lingbi ti sala ti mu maboko na zo oko oko na yâ bungbi ti mandango buku ti mo ti mu mbage na yâ kusala so ayeke nde. Ambeni zo na yâ ti bungbi ti mo ayeke dä so ayeke apendere, afini zo, azo so afa tene nze na nze pepe, wala so azia ti fa tene? Ba nzoni wala ababâ na mama, apionnier, wala ambeni wafango tene amu li ni awe ti mu maboko na ala. Sala ye kue so mo lingbi sala ti mu maboko. Mbeni ita-wali so teti ngu use afa tene nze na nze pepe na yâ kusala ti yaka afa tene ahon angbonga 50 na yâ kusala ni na avril so ahon. Ye nyen asala si lo sala tongaso? Lo tene so a yeke avizite pastorale so akpengba zo so a-ancien asala na lo.

²⁶ A lingbi a-ancien na aserviteur ti mungo maboko asala kusala maboko na maboko ti ba biani so ala yeke na territoire, apériodique, nga na ambeti so alingbi teti nze so ayeke ga. A lingbi ti leke ambeni fini bungbi ti fango tene? Tongana a yeke tongaso, sala si aita ahinga aye so a leke so ayeke nde. Ahon ye kue, na yâ ti sambela so mo sala gi mo oko wala na gbele azo, hunda deba nzoni ti Jéhovah na ndo nze ti kota kusala ti e teti Royaume.​—aRom. 15:30, 31; 2 aThes. 3:1.

²⁷ Na avril so ahon, na yâ ti mbeni kongrégation, a-ancien awa biani aita ti sala kusala mingi ahon na yâ fango tene. Na ngoi ti abungbi yenga oko oko, ala tisa awafango tene ti ba na yâ sambela wala ala lingbi ti mu kusala ti pionnier auxiliaire. Na ngoi kue so azi, a-ancien na aserviteur ti mungo maboko kue asala tene na wâ na ndo salango si avril ni aduti mbeni nze so ayeke nzoni ahon. Tongana ye ti pekoni, tongana amu azo 100, awafango tene 58, so awara na popo ti ala a-ancien kue nga na serviteur ti mungo maboko kue, amu kusala ti pionnier na nze ni so!

²⁸ Ngia so aga na peko ti mungo mbage kue: Adeba nzoni ti ‘salango kusala ngangu na ti tiri’ na yâ kusala ti fango tene ayeke so wa? (1 Tim. 4:10, NW) Na ndo kusala so kongrégation ti ala asala na wâ na avril so ahon, a-ancien so asala tene ti ala na nduzu ge asû na mbeti: “Fani mingi aita-koli na aita-wali ayeke sala tene na ndo lege so ndoye so ala yeke na ni na popo ti mba nga na gango ndulu na mba akiri akono mingi ahon ngbele ye na ngoi so ala to nda ti sala kusala mingi ahon na yâ fango tene.”

²⁹ Mbeni ita-koli so ade pendere na so tele ti lo azin ayeke la ni na kota nzala ti mu mbage ti lo na yâ kota kusala ni na nze ti avril so ahon. Na lege ti nzoni lekengo tele nga na maboko so mama ti lo nga na aita-koli na aita-wali ti yingo amu, lo yeke na ngia ti mu tele ti lo tongana mbeni pionnier auxiliaire na yâ nze so alë mingi. Bibe ti lo na ndo ye so lo sala ayeke tongana nyen? Lo tene: “Teti kozo ngoi na yâ fini ti mbi, mbi ba tele ti mbi tongana mbeni ngangu koli.”

³⁰ Kite ayeke pepe so Jéhovah adeba nzoni mingi azo so aba na nene ni mingi matabisi ti ala ti sala tene ti dutingo ti lo tongana gbia. (Ps. 145:11, 12) Na ngoi so e yeke da bê ti e na kui ti Seigneur ti e, e hinga so adeba nzoni so aga ndali ti dutingo ndulu na Nzapa ayeke duti ande mingi ahon na yâ ngoi ti kekereke. Bazengele Paul asala la ni nzala mingi ti wara futa ti fini ti lakue lakue. Ye oko, lo hinga so a yeke pepe mbeni ye so lo lingbi ti duti gi senge na ti ku ti wara ni. Lo sû na mbeti: “Teti so si, mbi sala kusala so nga, mbi tiri na lege ti ngangu ti Lo, ngangu so asala kusala mingi na yâ mbi.” (aCol. 1:29) Jéhovah, na lege ti Jésus, amu ngangu na Paul ti sala kusala so asö fini, na Lo lingbi ti sala tongaso nga teti e laso. Fade a yeke duti ye so mo yeke sala na nze ti avril so?

[Encadré na lembeti 3]

Mo Lingbi ti Mu Maboko na Zo Wa ti Fa Tene na Avril?

Molenge ti mo?

Mbeni wamandango Bible?

Mbeni zo so azia ti fa tene?