Atënë so azo ahunda

Bazengele Jean asû na mbeti so “ndoye so alingbi kue atomba mbito.” Lo ye ti tene nyen tongana lo sala tënë ti “ndoye so alingbi kue”, nga “mbito” wa a yeke tomba ni?

Bazengele Jean asû na mbeti: “Mbito ayeke na yâ ndoye pëpe, me ndoye so alingbi kue atomba mbito. Mbito asala si ye ti sana aga; lo so ayeke na mbito, ndoye alingbi kue na yâ lo pëpe.”​—1 Jean 4:18.

Atënë so angoro ni afa so Jean ayeke sala lani tënë na ndo salango tënë na bê kue wala na mbito pëpe; lo yeke sala tënë mbilimbili na ndo kamba so ayeke na popo ti ndoye so zo ayeke na ni na mbage ti Nzapa nga dutingo na mbito pëpe ti sala tënë na lo. E lingbi ti bâ ni na lege ti atënë so ayeke na versê 17: “Ndoye alingbi kue na yâ e, tongaso e yeke na mbito pëpe [“ti sala tënë”, NW ] na lâ ti fango ngbanga.” Lege so mbeni Chrétien aye na Nzapa nga lo yeke bâ na ndoye ti Nzapa na mbage ti lo ayeke sala ngangu biani na ndo lege so lo yeke sala tënë na Nzapa na mbito wala pëpe na ngoi ti sambela.

Tënë “ndoye so alingbi kue” aye ti tene ye mingi. Tongana ti so a sala kua na ni na yâ ti Bible, tënë “lingbi kue” andu gi pëpe ye so ayeke mbilimbili-kue wala so sioni oko ayeke dä pëpe. Fani mingi, a ye ti tene ye so ayeke mbilimbili-kue, me na yâ ye kue pëpe. Na tapande, na yâ Fango ye ti lo na ndo ti Hoto, Jésus atene: “A lingbi i ga azo so alingbi kue, legeoko tongana Babâ ti i na yayu alingbi kue.” Jésus atene lani na adisciple ti lo so tongana ala ye gi azo so aye ala, ndoye ti ala ni alingbi kue pëpe wala ambeni ye amanke dä. Ala lingbi ti sala si ndoye ti ala ni alingbi kue na yengo même awato ti ala. Legeoko nga, tongana Jean asû mbeti na ndo “ndoye so alingbi kue”, lo yeke sala tënë ti ndoye ti Nzapa so mbeni zo ayeke fa ni na bê ti lo kue, na alege kue, nga a ndu ambage kue ti fini ti lo.​—Matthieu 5:46-48; 19:20, 21.

Tongana lo yeke sala tënë na Nzapa na yâ sambela, mbeni Chrétien ahinga biani so lo yeke wasiokpari nga lo yeke mbilimbili-kue pëpe. Ye oko, tongana ndoye ti lo na mbage ti Nzapa nga bibe so lo yeke na ni na ndo ndoye ti Nzapa na mbage ti lo akono, lo yeke pëpe na mbito so a yeke fâ ngbanga na li ti lo wala a yeke ke lo. Nde na so, lo yeke na ngia ti sala tënë ti aye so ayeke na bê ti lo na mbito pëpe, nga ti hunda ti wara pardon ti Nzapa na lege ti kota ngele ti sandaga ti Jésus Christ. Bê ti lo ayeke dë ti hinga so Nzapa ayeke ndulu ti mä aye so lo hunda ni na bê ti lo kue.

Na lege wa ndoye ti mbeni zo alingbi ti duti “ndoye [so] alingbi kue” nga asala si lo ‘tomba mbito’ wala lo yeke pëpe na mbito so a yeke fâ ngbanga na li ti lo wala a yeke ke lo? Bazengele Jean atene: “Zo so abata tënë ti [Nzapa], ndoye ti Nzapa alingbi kue na yâ zo so biani.” (1 Jean 2:5). Bâ kete: Tongana Nzapa andoye e na ngoi so e de awasiokpari, lo yeke ndoye e mingi ahon ti kozo pëpe tongana e gbian bê ti e biani nga e “bata tënë ti Lo” na bê ti e kue? (aRomain 5:8; 1 Jean 4:10). Biani, tongana e ngbâ be-ta-zo, e lingbi ti duti na oko beku so bazengele Paul ayeke na ni lani tongana lo sala tënë so na ndo Nzapa: “Lo so agbanzi Molenge ti Lo pëpe, me Lo mû Lo teti e kue, fade Lo ke ti mû na e ye kue legeoko na Lo?”​—aRomain 8:32.