“I ga na mbi, . . . na fade mbi mû na i lege ti hu tele”

“A lingbi e sala ye ti nzoni na azo kue”

FANGO nzo tënë ti Royaume ti Nzapa aduti kozo kusala so Jésus abi bê ti lo dä (Marc 1:14; Luc 8:1). Teti so adisciple ti Christ aye ti haka peko ti lo, ti ala, kusala ti fango tënë ti Bible na ndo Royaume ti Nzapa ayeke kusala so ala zia na kozo ndo na yâ fini ti ala (Luc 6:40). A yeke biani ye ti mungo wâ na bê ti aTémoin ti Jéhovah ti bâ tongana nyen tokua ti Royaume aga na dengo bê ti lakue lakue na azo so ayeda na ni, legeoko tongana ti so a sala ândö na ngoi so Jésus ayeke na ndo ti sese.​—Matthieu 11:28-30.

Jésus afa Tënë ti Nzapa, me lo sala nga ambeni nzo kusala, tongana savango azo nga na mungo kobe na azo so ayeke na nzara (Matthieu 14:14-21). Legeoko tongaso, nde na kusala ti fango tënë ti Bible so ala yeke sala, aTémoin ti Jéhovah ayeke mû nga maboko na azo so ayeke na yâ ti bezoin. Teti biani, Mbeti ti Nzapa amû na aChrétien aye so alingbi “teti nzo kusala kue” na awa ala ti “sala ye ti nzoni na azo kue”.​—2 Timothée 3:16, 17; aGalate 6:10.

“Aita ti e ayeke dä”

Na septembre 1999, sese ayengi ngangu na Taiwan na abuba aye. Ambeni nze kete na pekoni, angu so apika ngangu asala si gbâ ti sese alondo na ndo ti ahoto atï; a duti oko ti aye ti ngangu so asala sioni mingi na yâ mbaï ti kodoro ti Venezuela. Ade ti ninga pëpe, angu so asuku mingi abuba kodoro ti Mozambique. Na yâ aye ota so kue, aTémoin ti Jéhovah asi hio na ando ni na ala mû kobe, ngu, yorö, bongo, atente, na agbakuru ti tongo na kobe na azo ni. Aita so ahinga ti kaï kobela ayeda na bê ti ala mveni ti leke mbeni da ti kaïngo kobela na loro si ala lingbi bâ lege ti azo so awara akä, na ambeni ita aleke afini da na azo so da ti ala akungbi.

Maboko so a mû na tâ ngoi ni na azo so aye ti ngangu ni asi na ala andu bê ti ala mingi. Malyori, mbeni wali so popoto ahon na da ti lo kue na Venezuela, atene: “Na ngoi so ye ahon ndo ti e, aita ti e ayeke dä.” Na peko ti so aita ni aleke mbeni fini da na sewa ti lo, Malyori atene: “E hinga tënë so e lingbi ti tene na Jéhovah pëpe ndali ti aye kue so lo sala na e!” Na tongana azo so ngu abuba da ti ala na Mozambique awara akelele ti fini da ti ala ni, mo ye ti bâ so azo ni kue ato nda ti he bia ti Royaume “Jéhovah, ndo ti bata tele ti e.”a

Mungo maboko na azo so ayeke na yâ ti bezoin adë nga bê ti aita so amû maboko na bê ti ala mveni. Marcelo, so asala kua ti infirmier na yâ mbeni kando ti azo so akpe kodoro ti ala na Mozambique, atene: “Mbi yeke na ngia ti mû maboko na aita so abâ pasi mingi.” Huang, mbeni zo so amû maboko na bê ti lo mveni na Taiwan, atene: “So mbi mû mbage ti mbi na kangbingo kobe na atente na aita so ayeke na bezoin ni amû ngia na mbi mingi. A kpengba mabe ti mbi.”

Mbeni kapa so alë lengo

Kua so aTémoin asala na bê ti ala aga nga na dengo bê na lege ti yingo na azo ti kanga saki mingi na ndo sese mobimba. Tongana nyen? Na yâ ti angu so ahon ade ti ninga pëpe, gi na États-Unis, aTémoin ti Jéhovah amû ambeti so aluti na ndo ti Bible na azo ahon 30 000 so ayeke na ada ti kanga 4 000 tongaso. Nga, na ndo so lege azi dä, aTémoin ague na ada ti kanga ti manda Bible na azo ni na ti sala abungbi dä. Azo ti kanga ni awara ye ti nzoni na pekoni?

Ambeni ti azo ti kanga so ayeke manda Bible ato nda ti kangbi afango ye ti Tënë ti Nzapa so adë bê na amba ti ala. Ye so asala si ada ti kanga mingi na ndo sese kue ayeke fadeso na ambeni bungbi ti azo ti kanga so avoro Jéhovah legeoko. Na ngu 2001, mbeni zo ti kanga na Oregon, États-Unis ti Amerika, atene: “Bungbi ti e ayeke gue na li ni. E yeke fadeso na awafango tënë ti Royaume 7 na e yeke manda Bible na azo 38. Azo ahon 25 ayeke ga ka ti mä kota diskur nga na Mandango Tour ti Ba Ndo, na azo 39 aga na Mémorial [ti kui ti Christ]. Na yâ ngoi kete, azo ota ayeke wara batême!”

Aye ti nzoni na ngia so a wara

Akota zo ti da ti kanga ni abâ so kapa so aTémoin asala na bê ti ala mveni alë lengo. Ye so apika bê ti akota zo ti da ti kanga ni mingi ayeke ye ti nzoni so aninga, so kapa ni aga na ni. Mbeni tondo atene: “Ngbele ye so kapa ni abâ gigi a sala angu bale-oko awe, mbeni oko ti azo so a zi ala na kanga, so awara batême na yâ da ti kanga tongana Témoin ti Jéhovah, akiri na kanga pëpe. Me ti ambeni azo ti kanga ni, tongana a mû azo 100, 50 ti si na 60 akiri na kanga.” Na bango aye so asi na peko ti maboko so aTémoin amû, bê ti mbeni prêtre ti da ti kanga na Idaho apika. Lo sû mbeti na kota ndokua ti aTémoin ti Jéhovah, so na yâ ni lo tene: “Atâa so mbi yeda na atënë ti mabe ti ala pëpe, bungbi ti ala apika bê ti mbi mingi.”

Mungo maboko na azo so ayeke na da ti kanga asala nga nzoni na aita ni. Tongana lo hunzi ti sala mbeni bungbi na azo ti kanga so ahe mbeni bia ti Royaume ti fani oko ni, mbeni Témoin atene: “Ti bâ akoli 28 ahe bia na Jéhovah amû ngia na bê ti mbi mingi. Na ala he bia ni na kota go! Biani dutingo na yâ mara ti ngoi tongaso ayeke nzoni mingi!” Mbeni Témoin so ague ti bâ azo na ada ti kanga na Arizona atene: “So tâ ye ti nzoni si e wara na mungo mbage na kusala so ayeke nde!”

A-Témoin so asala ye na bê ti ala mveni na ndo sese kue ayeke ndulu ti yeda na Jésus, so atene: “Ngia ayeke na zo so amû ye, ahon ngia ti lo so akamata ye.” (Kusala 20:35). Ala fa nga so batango wango so Bible amû ti sala nzoni na azo kue adë bê biani.​—aProverbe 11:25.

[Kete Tene na Gbe Ni]

[Foto na lembeti 8]

Venezuela

[Foto na lembeti 8]

Taiwan

[Foto na lembeti 8]

Mozambique