Mo yeke duti ande dä?
1 Mbeni lâ, mbeni ita so awara batême aninga awe atene: “Tongana mo manke kozo lango ti assemblée, biani, mo manke aye mingi!” Ngbanga ti nyen lo tene tongaso? Ngbanga ti so kozo lango ni ayeke tongo nda ti mbeni kota matanga ti kobe ti yingo so bungbi ti Jéhovah aleke ndali ti e (Es. 25:6). Ti duti dä na tongo nda ni afa so e kangbi abibe ti wasungo psaume so: “Mbi yeke na ngia tongana ala tene na mbi, Zia e gue na da ti L’Eternel.”—Ps. 122:1.
2 Na yâ ti angu so ahon, wungo ti azo so aga na kota bungbi ti district na lango ti vendredi ayeke na gbe ni mingi ahon lango ti samedi na dimanche. So ti tene mingi ti aita ti e amä pëpe angangu tënë so a fa na ndo tënë ti prophétie. Nga, ala girisa nzoni ye so ayeke ti sala songo na aita ti ala aChrétien.
3 Zi lege pëpe na akusala ti lâ oko oko: Tënë ti kua alingbi ti kanga lege na ambeni ti gue na assemblée na lango ti vendredi. Ye oko, mingi ti aTémoin abâ so apatron ti ala ayeke yeda ti mû maboko na ala na ndo tënë so tongana ala hunda mbeni ngoi ti hungo tele ndali ni kozoni. Bê ti mbeni patron apika mingi na bango ngangu desizion ti mbeni ita-wali pionnier ti gue na abungbi ti kongregation kue nga na a-assemblée, tongaso lo patron ni amû lango oko kue ti gue na assemblée!
4 A lingbi mo tene kozoni pëpe so patron ti mo ayeke ke ande ti mû na mo alango ti hungo tele; tene nga pëpe so ti manke lango oko ti assemblée ayeke sala ye pëpe. Na bê kue, leke na lege ti aversê nga na kode ti fa na patron ti mo ngbanga ti nyen guengo na akota bungbi ayeke kota mbage ti vorongo ti mo (aHéb. 10:24, 25). Na pekoni, zia bê ti mo kue na azendo ti Jéhovah, na hingango so ye kue ti mitele so mo yeke na bezoin ni fade lo yeke mû ni na mo tongana mo zia aye ti yingo na kozo ndo na yâ fini ti mo.—Mat. 6:33; aHéb. 13:5, 6.
5 Kota ye ni ayeke ti mû na nene ni “ye so ayeke nzoni ahon”. (aPhil. 1:10, 11; Ps. 27:4). Ye so ayeke pusu e ti leke aye ti wara ye kue so ayeke nzoni na yâ kpengba ye so Jéhovah aleke. To nda ti leke programme ti mo biani fadeso, na leke na bê ti mo so mo yeke duti ande dä na alango ota so kue!