“E mû peko ti Christ!” Kota Bungbi ti District ti aTémoin ti Jéhovah 2007
1, 2. (a) Tongana nyen Moïse awa azo ti Israël ti wara ye ti nzoni na bungbingo oko? (b) Aye wa a lingbi e to nda ni ti leke ni fadeso?
1 Moïse afa na mara ti Israël nga na awande ti tene lakue na ngu mbasambala ala bungbi oko ti tene a diko na ala andia ti Jéhovah. Ngbanga ti nyen? A yeke ti tene ‘ala mä tënë so, ala manda’. (Deut. 31:10-12). Jéhovah abâ nene ti bungbi azo ti lo mingi mingi. Na yâ kete ngoi, awakua ti Jéhovah ayeke kiri ti bungbi teti akota bungbi ti district ti lango ota “E mû peko ti Christ!”
2 Mo komanse ti leke tere ti mo awe? A lingbi mo hunda na patron ti mo mbeni congé? Mo lingbi ti mû maboko na azo so mo yeke manda Bible na ala wala azo ti dä ti mo so ayeke aTémoin pëpe ti gue na kota bungbi ni na mo? Ambeni zo na kongregation ti mo ayeke dä so ayeke na bezoin ti tene a mû maboko na ala ti gue? Mo leke ti gue na mbeni kota bungbi nde na ti so a tisa kongregation ti mo dä? Mo ye mbeni ndo ti lango? Asango so na gbe ni ge ayeke mû ande maboko na mo ti leke tere ti mo.
3. (a) Tongana nyen tënë ti Esaïe 25:6 ayeke ga tâ tënë laso? (b) Ye wa e yeke bâ ka na kozo lango ti kota bungbi? Ye wa ayeke nzoni zo oko oko asara?
3 Gue na alango ota ni kue: Jéhovah amû kobe ti yingo mingi mingi na azo ti lo (Es. 25:6). Kobe ti yingo so andu nga kota matanga ti yingo so a sara na akota bungbi ti e ti ngu oko oko. A bâ so azo ayeke lakue mingi pëpe na kozo lango ti kota bungbi ni ahon atanga ti lango ni. Zia na bê ti mo ti duti dä na apendere lango ti kota bungbi so kue, so bungbi ti Jéhovah aleke teti e! Tongana mo yeke na bezoin ti wara congé na place ti kua ti mo ndali ni, zia tënë ni na yâ sambela. Fadeso, duti na “mbeto pëpe” ti sara tënë ni na patron ti mo hio gi na pekoni so a fa lango ti kota bungbi ti mo (1 aThes. 2:2; Néh. 2:4, 5). A lingbi ti duti nzoni mingi ti fa na lo so akota bungbi ti mo ti ngu oko oko ayeke mbage ti sambelango Nzapa ti mo. Tongana mo sara ni ngoi mingi kozoni, a yeke yapu ye na kota zo ti ndokua ti mo ti yeda na ye so mo hunda.
4. Tongana nyen e lingbi ti leke awamandango Bible nga na asewa ti e so ayeke Témoin ti Jéhovah pëpe teti kota bungbi ni?
4 Azo so mo manda Bible na ala nga sewa ti mo: A nzere mingi ti bâ azo so mo yeke manda Bible na ala aduti na tere ti mo na kota bungbi, ti tene ala bâ na lê ti ala kota ndoye so ayeke na popo ti e aChrétien “na yâ kota bungbi”! (Ps. 22:26). Sara tënë ni na ala ngoi mingi kozoni, tongaso ala lingbi ti wara ngoi ti gue. Fa na ala nda ni so mo mveni mo ye mingi ti gue na akota bungbi. Mo lingbi ti leke awamandango Bible ni ti hinga ye so ayeke ku ala na fango na ala avidéo ti e na ndo akota bungbi so ahon, mbilimbili vidéo Unis grâce à l’enseignement divin. Fa nga tënë ti aye so mo leke teti kota bungbi ni na azo ti sewa ti mo so ayeke Témoin ti Jéhovah pëpe. Peut-être ala lingbi ti leke ti ga ti bâ drame wala ti ga kamême na lango oko ti kota bungbi ni na tere ti mo.
5, 6. (a) Tongana nyen e lingbi ti fa bibe ti mungo ye mingi so a sara tënë ni na 1 Timothée 6:18? (b) Ye wa a zia na sese ti mû maboko na ala so aye ti wara ndo ti lango?
5 Mû maboko na aita ti mo ti yingo: Bazengele Paul awa aChrétien so alingbi ti mû maboko na lege ti mitele na amba ti ala ti “sara nzoni, a lingbi nzo kusala ti ala awu; ala mû ye mingi na azo na ala kangbi ye na azo.” (1 Tim. 6:17, 18). E lingbi ti fa bibe ti mungo ye mingi so Paul asara tënë ni tongana e bi bê na dutingo ti ambakoro na awazin, apionnier, ababâ wala amama so abata sewa ti ala gi ala mveni, nga peut-être ambeni zo so na yâ kongregation ayeke na bezoin ti tene a mû maboko na ala ti gue na kota bungbi ni. Mungo maboko na azo tongaso ayeke kozoni kusala ti afami ti ala so ayeke na yâ ti tâ tënë, me a-ancien na tanga ti aita alingbi ti sara ye na ndara, na ti mû maboko tongana a yeke tongaso.—aGal. 6:10; 1 Tim. 5:4.
6 Aita mingi awara lege ti gi ala mveni ndo ti lango ti ala na ngoi ti akota bungbi. Ye oko, ambeni zo na kongregation ayeke na bezoin ti tene a gi na ala ndo ti lango. A lingbi ala sû mbeti ti fa tënë ni na Komite ti kusala ti kongregation ti ala, so fade ayeke sû tënë ni na lê ti mbeti Demande de chambre pour cas particuliers, so Ndokua ti ndo ti lango ti kota bungbi so a tisa kongregation ti mo dä ayeke mû ni ande. Ndokua ti ndo ti lango ti kota bungbi oko oko ayeke tokua na akongregation kue mbeti Demande de chambre pour cas particuliers mingi, me nga lo yeke fa adresse ti lo. A lingbi a sara ni ngoi mingi kozoni, tongaso si a lingbi ti tokua mbeti kue na mbilimbili ndo ni na ngoi ni. A lingbi a tokua ambeti ti hundango ndo ti lango na biröo ti filiale pëpe, me gi na Ndokua ti ndo ti lango ti kota bungbi ni.
7. (a) Asango wa fade Ndokua ti ndo ti lango ayeke tokua na akongregation ndali ti kota bungbi ti ala? (b) Ti ala so aye ti lango na hôtel, ye wa a sara ti mû maboko na ala?
7 Tongana lo bâ so lege ayeke dä nga alingbi biani, fade Ndokua ti ndo ti lango ayeke tokua na akongregation ti fa na ala ndo so hôtel wala ada ti lango ayeke dä, nga adresse ti azo ni, tongaso ala zia ni na tableau ti ala. A lingbi nga ti zia na yâ ti asango ni mara ti ndo ti lango so ayeke dä, ngere ni, nga wungo ti azo so alingbi ti lango na yâ da oko. Ye so a leke so alingbi biani ti mû maboko na ala so aye ti lango na hôtel, atâa so a yeke ala mveni si ayeke futa ye na nginza ti ala mveni. Aye so asi kozo afa so Ndokua ti ndo ti lango alingbi mingi ni ti wara ando ti lango so ngere ni ayeke mingi pëpe, nduru na ndo ti kota bungbi.
8. Ngbanga ti nyen a hunda pëpe ti tene e gue na mbeni kota bungbi nde na ti so a tisa kongregation ti e dä?
8 Guengo na mbeni kota bungbi nde: Ti tene a sara si aye ti duti, ambeti, ando ti lango na ambeni ye ayeke lingbi azo kue, e wa mo ti gue na kota bungbi so a tisa kongregation ti mo dä. Ye oko, ambeni aye tongana congé wala ambeni kusala alingbi ti sara si mo gue na mbeni kota bungbi nde.
9. A hunda ti sara nyen tongana lege ayeke pëpe ti tene e sara kota bungbi so a tisa kongregation ti e dä?
9 Tour ti Ba Ndo ti lango 1 ti mars 2007 (ti Français) ayeke na molongo ti ando kue so a yeke sara kota bungbi dä na yanga ti Français. Tongana mo ye ti bâ nzoni na lege ti aye so a leke teti ndo ti lango wala mo ye ti wara asango na ndo mbeni kota bungbi nde na ti so a tisa kongregation ti mo dä, mo lingbi ti tokua mbeti na komite ti kota bungbi so. Fade secrétaire ti kongregation ti mo alingbi ti bâ Komite ti Kota Bungbi ti District so a tisa kongregation ti mo dä ti wara adresse ni. Ti tene ala kiri tënë na mo nzoni, zia na tere ti mbeti ti mo mbeni enveloppe so iri ti mo ayeke na ndo ni nga na iri ti kongregation ti mo. Tongana a yeke sara kota bungbi mingi na yâ ti kodoro ni, fa lango nga na ndo ti kota bungbi so mo ye ti gue dä (na tapande Bangui, Sango 1, 14-16 décembre 2007).
10, 11. (a) Tongana e ye ti hunda ti bata ndo ti lango na hôtel, ye ti sara ayeke so wa? (Bâ encadré “Lege ti hunda ti bata ndo ti lango na hôtel.”) (b) Ambeni ye wa peut-être a leke teti ndo ti lango?
10 Hundango ti bata ndo ti lango na hôtel: Tongana ahôtel ayeke na ndo so mo yeke dä, fade a yeke zia na tableau ti kongregation iri ti ahôtel ni ngoi mingi kozoni na kota bungbi ni. Bâ wango ti encadré “Lege ti hunda ti bata ndo ti lango na hôtel.” Tongana mo pika singa na ahôtel ni kue si mo wara ndo ti lango pëpe, wala mo wara kpale na mbeni hôtel, sara tënë ni na secrétaire ti kongregation ti mo. Fade lo yeke sara tënë ni na Ndokua ti ndo ti lango ti kota bungbi ni na sarango kusala na asango so a zia na ndo ti li ti mbeti ni. Pika singa na biröo ti filiale pëpe.
11 Âdu ti ambeni ye so a leke teti ndo ti lango na ndo so ala ayeke dä tongana da ti azo, akota da na ada so a loué, a lingbi zo kue amû peko ti awango ti Ndokua ti ndo ti lango ti kota bungbi ti ala.
12, 13. (a) Ye wa a sara teti e kozo si e si na ndo ti kota bungbi? (b) Tongana nyen e lingbi ti fa singila ti bê ti e teti kusala kue so a sara ndali ti e? (Diko aHébreu 13:17.)
12 Yeda na aye so a leke: Tongana e si na ndo ti kota bungbi ni, e lingbi ti bâ so a sara kusala mingi ti ku na singo ti e. Na ndoye, aita-koli ayamba e nzoni, amû na e mbeti-kapa, na ala mû na e ndo ti duti. Aita asukula ndo ni na aleke estrade pendere. A sara nga kota kusala, so e bâ ni pëpe, ti leke ambage nde nde ti kapa ni, ti pika patara na ahôtel, na ti bâ lege ti ambeni tënë mingi.
13 Ndali ti kota bungbi oko oko, azo mingi asara kua teti anze mingi ti leke aye so a hunda, na asewa ti ala amû nga maboko na zingo lege na ala ti bâ tënë ti akota kusala so. Akusala kue so ala sara ndali ti e anzere na e pëpe? E lingbi ti fa singila ti bê ti e na sarango ye alingbi na awango ti article so nga na wango kue so e lingbi ti wara kozo na kota bungbi ni (aHéb. 13:17). Ti tene zo oko oko aduti nduru ti mû maboko ayeke mû lege si ‘a sara ye kue mbilimbili na lege ni.’—1 aCor. 14:40.
14. (a) Na lege wa Jésus azia nzoni tapande na bingo bê na bezoin ti azo? (b) Zo wa alingbi ti mû tapande ti lo, na tongana nyen?
14 A hunda azo ti kua: Jésus azia tapande ti nzoni-kue na lege so, na tâ be-ti-molenge, lo bi bê na bezoin ti azo (Luc 9:12-17; Jean 13:5, 14-16). Ala so ayeda na bê ti ala ti sara kua na akota bungbi afa oko bibe so. Ti mû ye so atia andokua nde nde ti kota bungbi, na yâ ti kete ngoi fade akomite ti akota bungbi ayeke iri ambeni zo ti sara kua na tere ti ala. Mbilimbili a yeke na bezoin ti a-ancien ti yeda na ti sara kua. Bibe ti ala ti duti nduru ayeke nzoni tapande teti azo kue na yâ ti kongregation.—1 Pi. 5:2, 3.
15. Tongana nyen nzoni tambela ti ambeni Témoin na hôtel aga na gonda na ndo Jéhovah?
15 Ye so ambeni zo abâ: Mbeni wayinda na yâ mbeni hôtel atene: “Ala yeke azo so e ye ala mingi. Sarango ye ti ala ayeke nzoni mingi ahon ti ambeni zo. Azo ti kua ti e atene so ala sara ye na ala nzoni mingi, na ala wara kete matabisi na tïtî ti ala. Ti tâ tënë ni, zo kue aye ti sara kua na nda-yenga tongana ala yeke ge!” Mbeni kota zo ti mbeni hôtel ni atene: “A-Témoin ti Jéhovah ayeke azo so a yeke ngangu oko pëpe ti sara kua na ala.” Peut-être nzoni tambela ti mo asara si e mä anzoni tënë so. Tara ti bâ ngia ti Jéhovah tongana lo bâ so nzoni sarango ye ti e aga na gonda tongaso!—1 Pi. 2:12.
16. (a) Ngbanga ti nyen abungbi ti mara ti Jéhovah ayeke kota ye mingi na ngoi ti e? (b) Ye wa zo oko oko na popo ti e alingbi ti sara fadeso?
16 Teti e “bâ so lâ ni aga nduru”, akota bungbi ti mara ti Nzapa ayeke kota ye mingi (aHéb. 10:25). Na akota bungbi ti e, ngbâa be-ta-zo na ti ndara afa atënë ti mû maboko na e ti “bata na [ti] sara na lege ti tënë kue” so Jéhovah aye ti tene e bata ni (Deut. 31:12). Gi ti leke tere ti mo fadeso ti gue na alango ota kue ti kota bungbi ti district “E mû peko ti Christ!”, na ti bâ nzoni na lege ti fango ye ti yingo kue nga na songo ti aita!
[Encadré na lembeti 3]
Angbonga ni
Vendredi na samedi
7:50 - 15:05
Dimanche
7:50 - 14:10
[Encadré na lembeti 4]
Lege ti hunda ti bata ndo ti lango na hôtel:
1. Pika singa na ahôtel ni na l’heure ti kua. Bâ anumero so a zia na tere ti iri ti ahôtel so ayeke na lê ti mbeti.
2. Tene na hôtel ni so mo yeke gue ndali ti kota bungbi ti aTémoin ti Jéhovah.
3. Fa na ala mbilimbili lango ti singo ti mo nga na ti hongo ti mo.
4. Tongana place ti lango ayeke pëpe, pika singa na mbeni hôtel nde so ayeke na yâ ti mbeti ni.
5. Tongana ala fa mbeni ngere so ayeke na nduzu ahon ngere so a zia na lê ti mbeti ni, yeda pëpe.
6. Hunda ti bata na mo ndo ti lango ni, na hunda ala ti mû na mo numero ni.
Ye ti sara:
◼ Soro gi na popo ti ahôtel so a zia molongo ti ala na lê ti mbeti.
◼ Pika singa pëpe na ahôtel so a fa ni pëpe na yâ ti molongo ni so, ti hunda na ala ti bâ wala ndali ti akota bungbi so ala zia ngere ti ala na gbe ni. Pika singa GI na ala so a zia na lê ti mbeti ni.
◼ Bata ndo ti lango oko oko gi na iri ti zo so alango ande na yâ ni.
◼ Sara kusala gi na anumero ti singa so a fa ni na lê ti mbeti ni.
◼ Gi pëpe na lege ti Internet ti bata ndo ti lango tongana a hunda ni pëpe.
◼ Ti sara ye alingbi na ndia ti batango ada si wâ atï dä pëpe, zia si wungo ti akota zo aduti mingi pëpe na yâ ti chambre ni ahon ti so awa ti hôtel ni afa na yâ ti mbeti ni.
◼ Gi tongana mo pika singa na ahôtel ni KUE awe na mo wara ndo ti lango dä pëpe si mo yeke sara tënë ni na secrétaire ti kongregation ti mo.
◼ Bata kozo ndo so mo soro ti lango dä.—Mat. 5:37.
◼ Tongana a lingbi a bata na mo ndo ti lango ni mbeni pëpe, sara tënë ni hio. Hunda ti tene a mû na mo mbeni numero ti fa so a yeke bata ni na mo mbeni pëpe.