Sala kusala nzoni na Bible
1. Ye wa mo lingbi ti sala tongana mo yeke leke tele ti gue na fango tënë?
1 Atâa mbeti so e leke ti fa na azo na fango tënë, a yeke nzoni ti soro mbeni versê so alingbi ti pusu zo ti gbu li ti tene e diko ni na ala so ayeke mä ande e (aHéb. 4:12). Ti soro mbeni versê so ayeke na yâ ti mbeti so mo yeke fa ayeke mû lege ti tingbi ni nzoni na mbeti ni. Na ambeni ndo, awafango tënë abâ so a yeke nzoni ti gbu Bible na maboko ti ala na ngoi so ala yeke ga ndulu na mbeni zo wala na ngoi ti fango tënë da na da.
2. (a) Tongana nyen e lingbi ti to nda ti atënë ti e na mbeni versê? (b) Atënë wa so aluti na ndo aversê ayeke nzere ka na azo na yâ territoire?
2 To nda ni na mbeni versê: Ambeni wafango tënë ayeke to nda ti atënë ti ala na hundango na zo ni mbeni tënë na ndo mbeni versê so na pekoni ala diko ni. So ayeke ti gboto lê hio na ndo Tënë ti Nzapa. Ambeni ti akozo tënë so ayeke na gbe ni ge alingbi ti sala kua nzoni na yâ territoire ti mo?
◼ “Tongana fade mo yeke na ngangu ti sala ni, mo lingbi ti ga na agbiango ye na ndo aye so?” Diko Apocalypse 21:4.
◼ “Ngbanga ti nyen angoi so e yeke dä ayeke ngangu?” Diko 2 Timothée 3:1-5.
◼ “Mo pensé so kodoro ti e ayeke duti nzoni tongana azo kue asala ye alingbi na wango so?” Diko Matthieu 7:12.
◼ “Mo pensé so fade amolenge ti mo alingbi ti wara ngia na yâ ye so a fa pekoni ge?” Diko Psaume 37:10, 11.
◼ “Mo bâ ti mo so mbeni ngoi ayeke ga ande so fade atënë so ayeke ga tâ tënë?” Diko Esaïe 33:24.
◼ “Mo hinga nzoni tënë ti fini ngorogbia so asala tënë ni ge?” Diko Daniel 2:44.
◼ “Mo ye lâ oko pëpe ti hunda Nzapa na tënë so?” Diko Job 21:7.
◼ “E lingbi ti kiri ti bâ ande asewa ti e so akui awe?” Diko Jean 5:28, 29.
◼ “Zo so akui awe ahinga ye so zo so angbâ na fini ayeke sala?” Diko Zo-ti-fa-tene 9:5.
3. Tongana nyen e lingbi ti mû maboko na azo ti gbu nda ti aversê ti Bible so e yeke diko?
3 Fa nda ni, mû tapande na fa ye ti sala na ni: Tongana mbeni zo ayeda ti sala lisoro, sala ye na loro pëpe. Mû ngoi ti fa nda ti versê ni, ti mû tapande na ndo ni na ti fa ye ti sala na versê so mo diko ti tene zo ni agbu nda ni (Néh. 8:8). Na ngoi so azo ahinga afango ye ti Tënë ti Nzapa na ala yeda na ni, a lingbi ti sala si ala ga na anzoni gbiango ye na yâ fini ti ala.—1 aThes. 2:13.
4. Tongana nyen e lingbi ti sala kusala nzoni na Bible na ngoi ti afini vizite?
4 Ngbâ ti sala kusala nzoni na Bible ti lë nzara ni na yâ ti azo. Mo lingbi ti mû peko ti oko kode so na ngoi ti salango afini vizite: (1) Soro mbeni versê so alingbi. (2) Sigigi na mbeni hundango tënë so akpengba pëpe na ndo versê ni, na pekoni diko ni. (3) Fa nda ni, mû tapande dä na fa ye so alingbi ti sala na ni. Sala kue ti mû na zo ni hingango ye ti Tënë ti Nzapa na ngoi kue so mo yeke sala vizite. Mo lingbi ti sala mbeni étude ti Bible hio.