Wa azo ti sala kusala na Bible

YE SO e ye ayeke ti gboto lê ti zo oko oko na mbage ti Tënë ti Nzapa, Bible. Buku ti nzoni-kue so ayeke gunda ti tokua so e yeke fa na azo, na e ye si ala hinga so ye so e yeke tene alondo na e mveni pëpe, me alondo na Nzapa. A lingbi azo amanda ti zia bê ti ala na ndo Bible.

Na fango tënë. Tongana mo yeke leke tele teti fango tënë, soro lakue versê oko wala ahon so ti fa ni na azo so aye ti mä tënë ni. Atâa tongana mo ye ti fa gi ndulu tongaso mbeni mbeti ti e, mingi ni a yeke nzoni ti diko mbeni versê so alingbi na ni. Bible ayeke na ngangu mingi ti fa lege na azo so ayeke tongana angasangbaga ahon ye kue so e mveni e lingbi ti tene. Tongana lege ayeke dä pëpe ti diko tâ gi Bible ni, mo lingbi ti soro ti fa peko ti atënë ti yâ ni. Na ngoi ti Jésus na abazengele ti lo, a yeke wara pëpe ambeti ti Nzapa na ndo kue. Ye oko, Jésus na abazengele ti lo ayeke fa peko ti atënë ti Mbeti ti Nzapa mingi. A lingbi e nga kue e sala ngangu ti bata aversê na li ti e ti tene e fa gi atënë ti yâ ni tongana lege ayeke dä pëpe ti diko ni. Na yâ ti ambeni ye, e lingbi gi ti fa atënë ti yâ ni.

Tongana mo wara lege ti diko Bible ni, gbu ni na mbeni lege so asala si zo ni alingbi ti bâ ye so mo yeke diko. Tongana lo yeke mû pekoni na yâ ti Bible ti lo mveni, lo yeke sala ande peut-être ye nzoni mingi.

Ye oko, a lingbi mo hinga so ambeni zo so akiri na peko ti Bible na ayanga ti kodoro nde asala ye ti bê ti ala na Tënë ti Nzapa. Akiringo na peko ti atënë ti ala alingbi peut-être lakue pëpe na atënë ti ayanga ti kodoro so a sû na Bible. A-Bible mingi ti laso azi iri ti Nzapa mveni, ala fa nzoni pëpe aversê so na Hébreu wala na Grec asala tënë na ndo dutingo ti akuâ, na ala honde ye so Bible atënë na ndo ye so Nzapa aleke teti sese. Ti fa na mbeni zo ye so a sala, a lingbi peut-être mo haka akota versê na yâ ti aBible nde nde wala na yâ ti angbele Bible ti oko yanga ti kodoro ni. Na ndo ti atënë mingi, buku Comment raisonner à partir des Écritures ahaka lege so aBible nde nde akiri na peko ti akota tënë na yâ ti aversê so azo ayeke sala na kusala mingi. Zo kue so aye tâ tënë ayeke kiri ande singila ndali ti so lo hinga aye so.

Na ngoi ti abungbi ti kongregation. A lingbi a wa azo kue ti sala kusala na Bible ti ala na ngoi ti abungbi ti kongregation. Na yâ aye mingi, ye so ayeke sala nzoni. A yeke mû maboko na azo ni ti ngbâ ti zia lê ti ala na ndo ye so a yeke sala tënë na ndo ni. Na ndo ti so ala yeke mä ye so wamungo diskur ni ayeke tene, ala yeke kiri ti bâ ni na lê ti ala. Nga, ye so afa atene Bible biani si ayeke na gunda ti atënë ti mabe ti e ayeke ngbâ na yâ ti li ti afini zo ngangu.

Ti tene azo so ayeke mä mo ayeda ti mû biani peko ti dikongo aversê ti mo na yâ Bible ti ala, ye ni aluti mingi na ndo lege so mo yeke wa ala ti sala ni. Mbeni oko ti akode so ayeke nzoni ahon atanga ni kue ayeke ti tisa ala mveni ti sala tongaso.

A yeke na mo, wamungo diskur ni, ti bâ aversê wa mo ye ti gboto lê na ndo ni na tisango azo ni ti bâ ni na yâ Bible ti ala. A yeke nzoni mingi ti diko aversê so ayeke mû ande maboko na mo ti sala tënë ti angbongboro tënë ti diskur ti mo. Na pekoni, tongana ngoi ayeke dä, zia ambeni versê nde na ndo ni ti mû ngangu na tënë ti mo.

Biani, gi fango versê wala tisango azo ni ti bâ ni alingbi kue pëpe. Tongana mo diko mbeni versê oko na mo gue na mbeni nde kozo ti tene azo ni awara ngoi ti wara kozo versê ni, bê ti ala ayeke woko ande hio na ala yeke zia lege ti mû peko ti dikongo Bible ti mo. Hinga ti bâ ndo nzoni. Tongana mingi ti azo ni awara versê ni awe, diko ni.

Gbu li kozoni. Tongana mo fa versê, mû ngoi na azo ni ti wara ni kozoni si mo diko ni. Ye so ayeke hunda ande na mo ngoi mingi pëpe ti ku azo ni ti tene ala wara versê ni. Tongana mo zia ngoi na azo ni ti wara aversê, mo yeke sala ande tënë na ndo ti aye mingi pëpe, me aye ti nzoni ti pekoni ayeke lingbi ande na ni.