A lingbi e yekia ngangu ti komande ti Jéhovah
Ye nyen ayeke ga na li ti mo tongana mo mä iri ti Koré, Dathan na Abiram? Kpengba-li! Kpengba-li na nyen? Na yanga-ti-komande so Nzapa azia. Akete kete tënë ti ye ti sioni so ala sala na sioni ye so asi na ala na pekoni , a fa ni na Nombre chapitre 16, nga a fa ambeni kota kamba ti tënë ni na yâ article “Yeda na be-biani na ngangu ti komande ti Nzapa”, na yâ Tour ti Ba Ndo ti 1 août 2002. I yeke bâ ande so a yeke ye ti nzoni ti diko article so nga na pekoni ti gbu li na ndo azo ni na yâ vidéo Respectons l’autorité de Jéhovah. I yeke bâ tënë so alondo na popo ti amolenge be-ta-zo ti Koré na babâ ti ala, zo ti kpengba-li, so agi Gbia ti yayu na sese na tënë (Nom. 26:9-11). Drame ti tâ ye so asi alingbi ti mû lege na e ti kono dutingo be-ta-zo ti e na Jéhovah mingi ahon ti kozo.
Tongana mo yeke bâ vidéo ni, gi ti bâ ye so afa polele so Koré na azo so amû peko ti lo atï lani na ngoi so a tara dutingo be-ta-zo ti ala na ndo aye omene: (1) Na lege wa ala ke ngangu ti komande ti Nzapa? (2) Tongana nyen ala zia lege na baba, nzara ti wara kota ndo na mbanda ti hon ndo ti ala? (3) Na lege wa ala zia lê ti ala gi na ndo awokongo ti azo so Jéhovah ahiri ala na kusala? (4) Mara demango tele wa ala yeke na ni? (5) Ngbanga ti nyen bê ti ala anzere pëpe na amatabisi ti kusala ti ala? (6) Tongana nyen ala zia lege na akamarade nga na afami ti ala ti mû place ti dutingo be-ta-zo na Nzapa?
Bâ fadeso tongana nyen aye ti manda so ayeke na yâ drame so andu bango ndo ti e oko oko na mbage ti ngangu ti komande ti Jéhovah laso: (1) Tongana a-ancien ayeke mû desizion, a lingbi e sala ye tongana nyen, na ngbanga ti nyen? (2) Tongana nyen e lingbi ti mingo abibe ti sioni so ayeke pusu e? (3) Tongana nyen a lingbi e sala ye na gbele wokongo ti azo so a zia ala ti mû li ni? (4) Ye wa a lingbi e sala tongana bibe ti demango tele ato nda ti londo na yâ bê ti e? (5) Tongana nyen a lingbi e bâ amatabisi ti kusala kue so a mû na e? (6) A lingbi azo wa amû lâ oko pëpe place ti dutingo be-ta-zo-ti e na Nzapa, nga na ngoi wa ye so alingbi ti ga mbeni kota tara teti e?
Na peko ti lisoro ti atënë so na kongregation, ngbanga ti nyen mo kiri pëpe ti bâ vidéo so? Zia si ye so asala ngangu mingi na ndo ti mo ti bâ ngbanga ti nyen a lingbi e yekia lakue ngangu ti komande ti Jéhovah!—Ps. 18:26; 37:28.