Mo yeke gi na bê ti mo kue Jéhovah?

MBENI Chrétien aye lani mingi ti fa nzo tënë so alondo na Bible na ambeni zo so ayeke oko na lo na yâ train (Marc 13:10). Ye oko, mbito agbu lo ngangu si lo lingbi même pëpe ti zi yanga ti fa tënë. Lo zia lege ni? Oko pëpe. Lo sambela ngangu ngbanga ni, na lo gi ti manda lege ti to nda ti mbeni lisoro. Jéhovah Nzapa amä sambela ti koli so lani, na lo mû ngangu na lo ti fa tënë.

Salango ye na bê kue tongaso ayeke kota ye mingi tongana e yeke gi Jéhovah nga ti wara nzobe ti lo. Bazengele Paul atene: “Zo so aga na Nzapa, a yeke ngbanga ti lo ti mä na bê so Nzapa ayeke, na Lo yeke Zo ti futa ye na ala so agi Lo [“ala so agi lo na bê ti ala kue”, NW ].” (aHébreu 11:6). Gingo Jéhovah senge alingbi pëpe. Tënë ti yanga ti Grec so a sû pekoni na ‘gi na bê kue’ andu nga ngangu so zo ni ayeke mû kue na ndo mbeni ye oko. A ndu bê ti zo ni kue, bibe ti lo kue, âme ti lo kue na ngangu ti lo kue. Tongana e yeke gi Jéhovah na bê ti e kue, e yeke sala ni pëpe gi tongaso, na mungo ngangu ti e kue pëpe ti sala ni, wala na lege ti goigoi. Nde na so, e yeke fa tâ wâ ti e na gingo lo.​—Kusala 15:17.

Ala so ayeke gi Jéhovah na bê ti ala kue

Mbeti ti Nzapa asi singo na atapande ti ala so amû ngangu ti ala kue ti gi na Jéhovah. Mbeni oko ti ala ayeke Jacob so atiri ngangu ti gbu mbeni ange ti Nzapa so amû tele ti zo, na lo sala ni juska na yanga ti ndapelele. Ye ti pekoni ayeke so a mû na Jacob iri ti Israël (Zo ti tiri na Nzapa) ngbanga ti so lo “tiri” na Nzapa, wala lo ngbâ lakue na tele ti lo, lo hule na tele ti lo. Ange ni ahiri deba nzoni na ndo lo teti angangu so lo sala na bê ti lo kue.​—Genèse 32:24-30.

Na pekoni, e yeke na mbeni wali ti Galilée so a fa iri ti lo pëpe, na so teti angu 12 ayeke na mbeni kobela ti mênë so asala si “lo hu pono mingi”. Ndali ti kobela so, a hunda lo ti ndu azo pëpe. Ye oko, lo kanga bê ti lo tongana wali, lo sigigi ti gue ti wara Jésus. Lo zia ti tene pëpe: “Tongana mbi lingbi ndu gi bongo ti Lo, fade kobela ti mbi awe.” Bi bê ti mo na ndo lo na ngoi so lo yeke sala kue ti wara lege kete ti hon na popo ti ‘azo mingi mingi so ayeke gue na peko ti [Jésus] na so asi singo na tele ti Lo.’ Tongana lo ndu bongo ti Jésus, lo bâ so “mênë so ayuru na tele ti lo akaï”; biani, a sava ngangu kobela ti lo ni! Tongana Jésus ahunda zo wa si andu bongo ti lo, mbito agbu wali ni. Me Jésus adë bê ti lo, lo tene: “Molenge-wali, mabe ti mo asala si mo ga nzoni awe; mo gue na siriri, kobela ti mo awe.” Biani, lo wara ye ti nzoni na peko ti angangu so lo sala.​—Marc 5:24-34; Lévitique 15:25-27.

Ti mbeni, a yeke mbeni wali ti Phénicie si atoto na bê ti lo kue na Jésus ti sava molenge ti lo ti wali. Jésus akiri tënë, lo tene so a yeke na lege ni pëpe ti mû kobe ti amolenge na akete mbo. Lo ye ti tene so lo lingbi pëpe ti dö aJuif ti zia na ti sala gi na ala so ayeke aJuif pëpe. Tongana lo gbu nda ti tapande ti lo ni, wali ni atene nga: “Biani, Seigneur, me même akete mbo ate akete ndulu mapa so atï na gbe ti atable ti amveni ti ala.” Kpengba mabe so lo yeke na ni, nga bibe ti lo ti sala ye gi na lege ni apusu Jésus ti tene: “Wali, mabe ti mo ayeke kota; A sala na mo legeoko tongana mo ye.”​—Matthieu 15:22-28.

Ye nyen alingbi fade ti si na azo so tongana ala ngbâ ti gbu ngangu pëpe? Ala lingbi fade ti wara aye ti nzoni so tongana ala kiri na peko gi na tongo nda ni so ala wara kpale wala so a ke ti mä ala? Oko pëpe! Atapande so afa tâ nzoni mingi ye so Jésus afa, so ti tene so tongana e yeke gi Jéhovah, a yeke nzoni na même a yeke kota ye mingi ti “zia ti hunda pëpe”.​—Luc 11:5-13.

Na lege ti ye so lo ye

Na yâ atondo so e bâ na nduzu ge ti ala so a sava ala na lege ti miracle, oko ye so a hunda na ala ti sala ti wara sava ayeke gi ti sala ye na bê kue? Oko pëpe. A lingbi ye so ala hunda na yâ sambela ague oko na ye so bê ti Nzapa aye. A mû na Jésus ngangu ti salango amiracle ti fa na gigi polele so lo yeke Molenge ti Nzapa, Messie ti zendo ni (Jean 6:14; 9:33; Kusala 2:22). Na ndo ni, amiracle so Jésus asala aduti tongana tapande ti akota ye ti nzoni mingi so Jéhovah ayeke ga na ni na sese na ndo azo na ngoi ti Komandema ti Ngu Saki oko ti Christ.​—Apocalypse 21:4; 22:2.

Ti fadeso, a yeke ye ti bê ti Nzapa pëpe ti tene ala so ayeke na yâ tâ vorongo aduti na ngangu ti salango amiracle, na tapande ti sava azo na ti sala tënë na ayanga ti kodoro nde nde (1 aCorinthien 13:8, 13). Ye ti bê ti lo teti ngoi ti e ayeke ti tene a fa nzo tënë ti Royaume na ndo sese kue si “azo kue awara salut, na ahinga tene-biani mbilimbili.” (1 Timothée 2:4; Matthieu 24:14; 28:19, 20). Awakua ti Nzapa alingbi ti ku tâ na lege ni ti tene Jéhovah amä sambela so ala yeke tene ni na bê kue tongana angangu so ala yeke sala ague oko na ye so bê ti Nzapa aye.

Me ambeni alingbi ti tene: ‘Atâa aye ni ayeke tongana nyen, ye so Nzapa aleke ti sala ayeke ga tâ tënë na nda ni; tongaso, ngbanga ti nyen ti sala angangu so kue?’ Biani, a yeke tâ tënë so Jéhovah ayeke sala ande si aye so lo leke aga tâ tënë, atâa angangu so azo asala ayeke tongana nyen; ye oko, a nzere na lo mingi ti bâ azo na mungo tele ti ala ti sala ye so lo ye. A lingbi ti haka Jéhovah na mbeni zo so ayeke leke mbeni da. Zo ti lekengo da ni ayeke na plan ti da ni kue; me lo yeke soro aye ti lekengo na da ni na popo ti aye so lo lingbi ti wara na ndo ni so. Legeoko nga, Jéhovah ayeke na mbeni plan ti kusala ti sala ni laso, na lo yeke na ngia mingi ti sala kusala na awakua ti lo so ayeda ti mû tele ti ala kue na lo.​—Psaume 110:3; 1 aCorinthien 9:16, 17.

Bâ gi ye so asi na mbeni maseka so iri ti lo ayeke Toshio. Tongana lo gue na kota da-mbeti, lo ye lani ti fa tënë na azo mingi mingi ti ekole ni so lo bâ tongana territoire ti lo. Lo yeke lakue na Bible ndulu na tele ti lo, na lo sala ngangu kue ti duti mbeni Chrétien so ayeke nzoni tapande. Na hunzingo ti kozo ngu ti lo na kota da-mbeti ni, lege azi na lo ti mû mbeni diskur na azo ti klase ni. Toshio asambela Jéhovah ti mû maboko na lo, na bê ti lo anzere ti bâ so azo ti klase ti lo ni adengi mê nzoni na diskur ti lo so li ti tënë ni ayeke: “Mbi ye ti sala si kua ti pionnier aga tongana kusala ti mbi ti lakue.” Lo tene so lo ye ti ga mbeni wakua ti ngoi kue ti aTémoin ti Jéhovah. Mbeni oko ti akamarade ti lo ti ekole ayeda ti tene lo manda Bible na lo, na kamarade ti lo so ague na li ni juska lo wara batême. Angangu so Toshio asala na bê ti lo kue na so ague oko na asambela ti lo aga na lo aye ti nzoni mingi.

E yeke sala ye na bê ti e kue?

Mo lingbi ti fa na yâ alege nde nde so mo yeke gi na bê ti mo kue Jéhovah na adeba nzoni ti lo. Kozoni kue, ambeni ye ayeke dä mbilimbili so mo lingbi ti sala, na tapande ti leke tele ti mo nzoni teti abungbi ti aChrétien. Na lege ti akiringo tënë so mo leke nzoni na mo mû, wala adiskur so mo mû ni na wâ, nga na adémonstration so mo sala ni nzoni, mo yeke fa kota ti ngangu so mo yeke gi na Jéhovah. Mo lingbi nga ti fa na gigi so mo yeke sala ye na bê ti mo kue tongana mo gi ti sala si kusala ti mo ti fango tënë akiri aga nzoni ahon ti kozo. Na nga, mo lingbi ti sala ye na nzobe mingi ahon ti kozo na yanga-da ti azo, nga ti sala kusala na anzoni tënë so alingbi na territoire so mo yeke dä ti to nda ti lisoro (aColossien 3:23). Tongana mbeni ita-koli Chrétien amû bê ti lo kue na kusala ti lo, lo lingbi ti wara lege ti yô ambeni kungba na yâ kongregation, na tapande ti duti serviteur ti mungo maboko wala ancien (1 Timothée 3:1, 2, 12, 13). Tongana mo yeke ndulu ti sala kusala, mo lingbi ti wara ngia ti zo so ayeke mû ye. Mo lingbi ti hunda ti sala kusala na yâ mbeni pialo ti lekengo mbeni filiale wala ti sala kusala na yâ mbeni filiale ti aTémoin ti Jéhovah. Tongana mo yeke mbeni ita-koli kumbamba so ayeke na alengo so a hunda ni, mo ye peut-être ti sala Ekole ti Formation Ministérielle so ayeke leke akoli so ayeke na alengo ti yingo ti duti anzoni berger. Tongana mo yeke zo so asala mariage awe, peut-être kusala ti missionnaire alingbi ti duti mbeni lege teti mo ti fa na bê ti mo kue so mo ye ti sala na Jéhovah mingi. Guengo na ndo so a hunda ti wara awafango tënë dä mingi alingbi ti duti mbeni lege so azi na mo.​—1 aCorinthien 16:9.

Ye so ayeke kota mingi ayeke bibe so mo yeke sala na mbeni kusala. Atâa kungba so a mû na mo, sala ni na bê ti mo kue, na ngangu ti mo kue, nga na ‘nzoni bê’. (Kusala 2:46, Fini Mbuki, 2001; aRomain 12:8). Mo yeke sala nzoni ti bâ kusala oko oko so a mû ni na mo tongana mbeni lege so a zi na mo ti fa wâ ti mo ti mû gonda na Jéhovah. Sambela lakue ti wara mungo maboko ti Jéhovah, na sala ye ti nzoni kue so mo lingbi ti sala. Fade mo yeke ko aye ti nzoni mingi na pekoni.

Aye ti nzoni so aga na pekoni

Mo dabe mo na ita Chrétien so asambela ti hon ndo ti mbito ti lo ti wara lege ti fa tënë na azo so ayeke oko na lo na yâ train? Jéhovah ahiri deba nzoni na ndo nzara ti lo ti sala ye na bê kue. Ita ni agi kue ti wara mbeni lege ti to nda ti lisoro nzoni na azo na sorongo atënë ti sala lisoro dä. Lo wara lege ti sala kusala nzoni na Bible ti fa tënë na mbeni koli so agi bê ti lo na ndo akpale ti mango tele pëpe so ayeke si na popo ti azo. Lo sala vizite na koli so lege mingi na yâ train ni. Na nda ni, koli ni ato nda ti manda Bible. Biani, Jéhovah ahiri deba nzoni na ndo lo teti angangu so lo mû na bê ti lo kue ti fa na tënë.

Mo lingbi ti wara aye ti nzoni tongaso tongana mo ngbâ ti gi Jéhovah na bê ti mo kue. Tongana mo ngbâ ti gbu ngangu na tâ be-ti-molenge, na mo zia bê ti mo kue ti sala akusala so kue a yeke mû na mo na yâ bungbi ti Jéhovah, fade Jéhovah ayeke sala kusala na mo alingbi na aye so lo leke ti sala, na lo yeke tuku gbâ ti adeba nzoni na ndo mo.

[Foto na lembeti 26]

Ye nyen alingbi fade ti si tongana wali so agbu ngangu pëpe?

[Foto na lembeti 27]

Mo ngbâ ti hunda na Jéhovah ti hiri deba nzoni na ndo mo?

[Afoto na lembeti 28]

Mo lingbi ti fa tongana nyen so mo yeke gi Jéhovah na bê ti mo kue?