Sala nzoni na mo mû ye na azo
1 Dorcas “asi na nzo kusala, na lo mû matabisi na azo.” (Kus. 9:36, 39). Bibe ti mungo ye so lo yeke na ni lani asala si Jéhovah Nzapa nga na azo so ahinga lo aye tënë ti lo mingi. A-Hébreu 13:16 atene: “I girisa pëpe ti sala nzoni na ti mû ye na azo, teti sacrifice tongaso ayeke nzoni na lê ti Nzapa.” Tongana nyen e lingbi ti sala nzoni na ti mû ye na azo laso?
2 Mbeni lege so e lingbi ti sala nzoni na azo ayeke ti mû na ala aye ti e ti “ngele ngangu”. (aProv. 3:9, NW ). Anginza so e yeke mû teti kusala ti fango tënë na ndo sese kue amû lege ti leke na aDa ti Royaume, aDa ti assemblée nga na aDa ti afiliale na ndo sese mobimba. Bibe ti mungo ye so e yeke na ni amû lege na azo kutu mingi ti wara nzoni na lege ti fango ye so Jéhovah ayeke mû na e na lege ti bungbi ti lo nga ti kpengba songo ti akamarade ti yingo.
3 Mû dengo bê na azo: Tongana ye ti ngangu asi, azo ti Jéhovah ayeke ndulu ti “sala ye ti nzoni” na aita ti ala awamabe legeoko nga na ambeni zo nde (aGal. 6:10). Na peko ti mbeni ye so asungba na yâ ti mbeni ndokua ti lekengo gaz na kodoro ti France, mbeni koli na wali so alango ndulu na tele ti ndo ni atene: “Aita ti e Chrétien aga hio ti mû maboko na e. Ala sukula yâ ti da ti e nga na ti ambeni zo so ayeke na yâ ti étage ni. Bê ti azo so alango ndulu na tele ti da ti e adö ti bâ so azo mingi aga ti mû maboko na e.” Mbeni ita-wali ni atene: “A-ancien aga ti mû maboko na e, ala mû awango ti kpengba e. Biani, a yeke ye so e yeke na bezoin ni ahon mungo maboko na lege ti mitele.”
4 Atâa so alege ayeke mingi so e lingbi ti sala nzoni na amba ti e, tâ nzoni lege ti mû maboko na ala ayeke ti fa na ala tâ tënë so ayeke ye ti ngele ngangu, so andu “beku ti fini ti lakue lakue” so Jéhovah mveni amû zendo ni na e (Tite 1:1, 2). Tâ tënë ti Bible aga na tâ dengo bê na ala so ayeke bima ndali ti aye so ayeke si na yâ sese so na nga ndali ti dutingo ti ala ti siokpari (Mat. 5:4). Tongana e yeke na ngangu ti sala ni, zia e sala nzoni na e mû ye na azo.—aProv. 3:27.