Mandango brochure I lango pëpe!

A to nda ni na yenga ti lango 23 ti mai ti si na 20 ti juin 2005, fade akongregation ti ndo sese mobimba ayeke manda na Bungbi ti Mandango Buku brochure I lango pëpe! Sala kusala na ahundango tënë so ge tongana mo yeke leke tele ti mo teti bungbi ni nga na ngoi so mo yeke mû li ni. Na ngoi ti mandango ye ni, diko aparagraphe ni na tongana ngoi ni ayeke dä, diko aversê so ayeke na yâ ni.

Yenga ti 23 mai

◼ Lembeti 3-4: Na popo ti aye so a zia ni ge, aso wa andu fini ti mo? Ye wa afa na mo so aye so asi ge abâ gi pëpe mbeni kodoro oko?

◼ Lembeti 5: Aye wa aga na mo ti yeda so Nzapa ayeke bi bê ti lo biani na e? Aye wa alingbi ti fa so e yeke bi bê ti e mingi na Nzapa nga na aye so lo yeke sala?

◼ Lembeti 6-8: Ye wa Matthieu 24:1-8, 14 afa na ndo nda ti aye so ayeke si na yâ sese ti laso? Tongana ti so a fa ni na 2 Timothée 3:1-5, e yeke laso na ngoi wa? A yeke lâ ti nda ni ti aye wa? Ye wa aga na mo ti hinga so Bible ayeke biani Tënë ti Nzapa? Royaume so e yeke fa tënë ni ayeke nyen?

◼ Lembeti 9-10: Ngbanga ti nyen a lingbi e bâ mbilimbili adesizion so e yeke mû na yâ ti lango oko oko, nga na aye so e yeke zia ni na kozo ndo na yâ fini ti e? (aRom. 2:6; aGal. 6:7). Tongana mo kiri mo bâ ahundango tënë so ayeke na lembeti 10, aversê wa, so a lingbi a sala ngangu na ndo ye so mo yeke sala, ayeke ga na li ti mo?

Yenga ti 30 mai

◼ Lembeti 11: Ngbanga ti nyen a lingbi e oko oko kue e bâ ahundango tënë so ayeke na ndo lembeti so? (1 aCor. 10:12; aEph. 6:10-18). Akiringo tënë ti e afa so e mû na nene ni mingi awango ti Jésus so ayeke na Matthieu 24:44?

◼ Lembeti 12-14: ‘L’heure ti fango ngbanga’ wa a sala tënë ni na Apocalypse 14:6, 7? ‘Ti kpe mbito ti Nzapa na ti mû gloire na lo’ aye ti tënë nyen? Babylone ti Kota ayeke nyen, na ye wa ayeke si ande na lo? Ye wa a lingbi e sala ni laso na mbage ti Babylone ti Kota? L’heure ti fango ngbanga so a sala tënë ni kozoni andu nga nyen? Teti so e hinga “lâ ni wala l’heure” ti fango ngbanga ti Nzapa pëpe, ngangu wa ayeke sala na ndo ti e? (Mat. 25:13).

◼ Lembeti 15: Tënë so andu kota yanga-ti-komande ti Nzapa ayeke nyen? Na tongana nyen a bâ e oko oko kue?

◼ Lembeti 16-19: “Ayayu ti fini” na “sese ti fini” ayeke nyen? (2 Pi. 3:13). Zo wa amû azendo ni? Agbiango ye wa ayayu ti fini na sese ti fini ayeke ga na ni ande? Fade e oko oko kue e yeke bâ nzoni na lege ni?

Yenga ti 6 juin

◼ Lembeti 20-21: Na ndo tënë ti kpengo ni, gbotongo mê wa Jésus amû lani na adisciple ti lo ti ngoi ni kâ? (Luc 21:20, 21). Lawa si ala lingbi ti kpe? Ngbanga ti nyen a yeke lani kota ye ti kpe hio? (Mat. 24:16-18, 21). Ngbanga ti nyen azo mingi ayeke kanga mê ti ala na ndo agbotongo mê? Tongana nyen azo saki mingi na Chine nga na Philippines abâ lani nzoni na lege ti dengingo mê na agbotongo mê so alondo na azo so a lingbi ti zia bê na tënë ti ala? Ngbanga ti nyen na ndo tënë ti hunzingo ti aye ti ngoi ti laso a yeke nga kota ye ti dengi mê na agbotongo mê so alondo na Bible? Na bango nene ti salango ye hio, e yeke na kungba wa? (aProv. 24:11, 12).

◼ Lembeti 22-23: Ngbanga ti nyen na ngu 1974 na Australie nga na ngu 1985 na Colombie, azo mingi ake lani na mbana ti mä agbotongo mê na ndo aye ti ngangu so ayeke ndulu ti ga? Na ye wa asi na pekoni? Mo pensé so mo yeke sala lani nyen na gbele agbotongo mê so, na ngbanga ti nyen? Ye wa alingbi ti fa wala e yeke dengi mê lani na gbotongo mê ti ngoi ti Noé? Ngbanga ti nyen azo aye lani ti sala kodoro na Sodome ti giriri nga na akodoro so ayeke ndulu na ni? Na gbungo li ngangu na ndo ye so asi na Sodome, e lingbi ti wara ye ti nzoni tongana nyen?

Yenga ti 13 juin

◼ Lembeti 24-27: Sala kusala na “Ahundango tënë ti manda na ye” so ayeke na lembeti 27.

Yenga ti  20 juin

◼ Lembeti 28-31: Sala kusala na “Ahundango tënë ti manda na ye” so ayeke na lembeti 31.

Gingo nda ti brochure ni ayeke mû ande maboko na e ti ‘lango pëpe’ na ti fa so e yeke duti ndulu. Zia kusala ti e ti fango tënë afa lakue na gigi so tokua ti ange ni ahunda ti sala ye hio: “I kpe mbito ti Nzapa, i mû gloire na Lo, teti l’heure ti Lo ti fâ ngbanga asi awe.”​—Mat. 24:42, 44, Fini Mbuki, 2001; Apoc. 14:7.