Aye so kue aye ti tene nyen?

JÉSUS CHRIST atene: Fade a yeke hinga “nda ti ngoi so” wala hunzingo ti aye ti sese so na lege ti bira, boma wala kota nzara, kobela ti futi kodoro nga na yengingo ti sese.​—Matthieu 24:1-8; Luc 21:10, 11.

Ngbele ye ti londo na ngu 1914, fini ti azo abuba na lege ti abira na popo ti amara nga na popo ti akete mara; na fani mingi, a yeke ngbanga ti so amokonzi-nzapa ayôro tele ti ala na yâ aye ti poroso. Nga fadeso, na yâ ando mingi, asalango ye ti awabingo kpale so a hiri ala a-terroriste ayeke buba fini ti azo.

Atâa guengo na li ni ti azo na lege ti senda-ye, azo kutu mingi na ndo sese kue angbâ ti kui nzara ngangu. Ngu oko oko, a yeke ala kutu mingi nga si ayeke wara kuâ ndali ti kota nzara.

Kobela ti futi kodoro so amû sese kue ayeke nga mbage ti fä so Jésus amû. Kobela ti futi kodoro, so a hiri ni Grippe Espagnole na so asi na peko ti Kozo Bira so Amû Sese Kue, afâ azo kutu 21. Nde na akobela so asi giriri me so andu gi ambeni mbage ti sese awe, Grippe so andu amara na ndo sese kue, na même azoa so ayeke yongoro. Kobela ti SIDA andu azo fadeso na ndo sese kue, na akobela tongana ti kota koro, palu, kobela so a hiri ni filaire nga na kobela ti lango ake ti hon na yâ akodoro mingi so angbâ na gbe ni na lege ti mosoro.

A tene so ngu oko oko, lege mingi, sese ayeke yengi ngangu wala kete. Atâa agbakuru so azo ayeke na ni nga anzoni kode so amû lege ti hinga tënë na ndo yengingo ti sese fade fade nga na ngangu ti ala, asango angbâ lakue ti fa tënë ti kpale so mingi, so ayeke si na ando so a yeke wara azo dä gbâ ni.

Bible afa nga tënë ti mbeni ye so ayeke si ande: “A lingbi mo hinga ye so, na lâ ti nda ni, fade lâ ti ye ti ngangu aga. Teti fade azo ayeke azo ti ndoye tele ti ala mveni, azo ti ndoye nginza, azo so ayä iri ti ala mveni, azo ti kpengba-li, awazonga, azo so ake yanga ti mama na babâ ti ala, azo so amû merci pëpe, azo so ayeke nzoni pëpe, azo so andoye asongo ti ala pëpe, azo so aye ti leke songo pëpe, azo ti kunyon zo, azo so akanga nzara ti tele ti ala pëpe, azo so ahili [so asala ngangu na amba ti ala], azo so andoye nzo ye pëpe, azo so akä aita ti ala, azo so abi bê ti ala pëpe na ye so ala sala, azo so bê ti ala aga kota mingi, azo so andoye ngia, me ala ndoye Nzapa pëpe; a bâ ala tongana azo ti bata tënë ti Nzapa, me ala ke ngangu ni awe; mo vi peko ti mo na azo tongaso.”​—2 Timothée 3:1-5.

Mo yeda so e yeke na “lâ ti ye ti ngangu”?

Mo yeke bâ so, na mbeni lege so ahon ndo ni, azo ayeke ndoye gi tele ti ala, ala ndoye nginza na nga baba asi bê ti ala?

Zo wa ayeke ke ande so sese asi singo na azo so abi bê ti wara gi ye so ala ye me so akiri merci pëpe ndali ti ye so ala yeke wara, so aye ti mä tele pëpe na amba ti ala nga so ayeke be-biani pëpe?

Mo yeke bâ biani so kengo yanga ti ababâ na mama nga wungo ti azo so andoye asongo ti ala pëpe ayeke gue gi guengo na li ni?

Kite ayeke pëpe so mo bâ na lê ti mo so e yeke na yâ mbeni sese so asi na ndoye teti ngia na so ndoye teti nzoye atia azo ni. A yeke tongaso si Bible afa peko ti asalango ye ti azo na “lâ ti nda ni”.

Mbeni ye nde ti fa ni ayeke nga dä ti mû lege ti hinga ngoi so e yeke na yâ ni? Biani, Jésus afa mbeni ye nde: A yeke so gi na yâ oko ngoi ni, fade a yeke fa nzo tënë ti Royaume ti Nzapa na ndo sese kue (Matthieu 24:14). A yeke ye so a yeke sala ni?

Tour ti Ba Ndo ayeke mbeni mbeti so aluti na ndo Bible na so a sala ni ti fa nzo tënë ti Royaume ti Jéhovah. A yeke sigigi na ni lakue na ayanga ti kodoro so ahon tanga ti ambeti kue so a sala na ayanga nde.

Ngu oko oko, aTémoin ti Jéhovah ayeke mû angbonga ahon ngbundangbu oko ti fa tënë ala mveni na azo na ndo Royaume ti Nzapa.

Ala yeke sigigi na ambeti na ndo Bible na ayanga 400 tongaso, na même na ayanga so gi wungo ti azo kete so alango na ayongoro ndo si ahinga ti diko. A-Témoin ti Jéhovah afa nzo tënë na amara kue, na ala fa nga tënë na yâ azoa na aterritoire mingi so ayeke tâ kete mingi ti duti akota kodoro na ndo tënë ti poroso. Na yâ asese mingi, ala yeke leke mbeni programme ti mandango Bible so ayeke tambela lakue.

Biani, ala yeke fa nzo tënë ti Royaume ti Nzapa na ndo sese kue, pëpe ti ga na azo kue na yâ vorongo ti ala, me ti fa ni tongana tënë ti témoin. Na lege so, azo na ndo nde nde kue awara lege ti fa na gigi wala ala yeke bi bê na Lo so asala yayu na sese, nga wala ala yeke yekia andia ti lo na ala yeke fa ndoye teti amba ti ala.​—Luc 10:25-27; Apocalypse 4:11.

Na yâ ngoi kete, fade Royaume ti Nzapa ayeke sukula sese na aye ti sioni kue so ayeke na ndo ni, na ayeke sala si sese ni aga mbeni paradis.​—Luc 23:43.

[Encadré na lembeti 6]

Lâ ti nda ni ti nyen?

A yeke pëpe lâ ti azo si asi na nda ni wala ague ti hunzi, teti ala so asala ye so bê ti Nzapa aye, Bible atene so ala yeke na beku ti ngbâ na fini teti lakue lakue.​—Jean 3:16, 36; 1 Jean 2:17.

A yeke pëpe alango ti sese ni mveni si asi na nda ni wala ague ti hunzi, teti Mbeti ti Nzapa amû zendo so fade sese so e lango dä ayeke ngbâ teti lakue lakue.​—Psaume 37:29; 104:5; Esaïe 45:18.

Nde na so, a yeke lâ ti bungbi ti aye ti sioni ti sese ni so ndoye atia ni, nga ti azo so agbu ngangu asalango ye kirikiri ni si ayeke gue ti hunzi.​—aProverbe 2:21, 22.

[Encadré/Foto na lembeti 7]

Bible ayeke biani Tënë ti Nzapa?

Lege mingi na peko ti tele, aprophète so a sala tënë ti ala na yâ Bible asû na mbeti: ‘L’Eternel atene tongaso.’ (Esaïe 43:14; Jérémie 2:2). Même Jésus Christ, Molenge ti Nzapa, atene na ngangu so ‘lo yeke sala tënë ti bê ti lo mveni pëpe’. (Jean 14:10). Bible mveni atene polele so “Tënë kue ti Mbeti ti Nzapa alondo na yanga ti Nzapa”.​—2 Timothée 3:16.

A wara mbeni buku nde pëpe so a sala ni na ayanga mingi tongana ti Bible, so ndokua ti United Bible Societies afa so a sala ni na ayanga ahon 2 200. A wara nga mbeni buku pëpe so a kangbi ni mingi tongana ti Bible, so wungo ni kue ahon fadeso ngbundangbu osio. A yeke ye so e ku pëpe na mbage ti mbeni tokua so alondo na Nzapa na so ayeke teti azo kue?

Ti hinga tënë mingi ahon ti so na ndo afä so amû lege ti hinga so Bible alondo na Nzapa, bâ buku Bible: A Yeke Tene ti Nzapa Wala ti Azo?, so aTémoin ti Jéhovah asigigi na ni.

Tongana mo diko Bible na mo yeda biani so a yeke Mbeti ti Nzapa, fade mo yeke wara aye ti nzoni mingi.

[Encadré/Afoto na lembeti 8]

Royaume ti Nzapa ayeke nyen?

A yeke yanga-ti-komande ti yayu so tâ Nzapa Jéhovah, so asala yayu na sese, azia gere ni.​—Jérémie 10:10, 12.

Bible afa Jésus Christ tongana lo so Nzapa amû ngangu ti komande so na lo (Apocalypse 11:15). Tongana lo de na sese, Jésus afa na gigi so lo yeke lani awe na mbeni ngangu so adö bê na so Nzapa amû: A yeke mbeni ngangu so amû lani lege na lo ti komande na ndo aye tongana ngu na pupu, na nga ti sava amara ti akobela kue, na même ti zingo akuâ (Matthieu 9:2-8; Marc 4:37-41; Jean 11:11-44). Mbeni prophétie so a sû na yâ Bible na gbe ti yingo ti Nzapa afa so fade Jéhovah ayeke mû na lo “ngangu ti komande, na gloire na royaume, si azo kue, amara kue, na azo ti yanga nde nde kue, asala na Lo”. (Daniel 7:13, 14). A yeke na yayu kâ si Jésus Christ aduti ti komande.

[Afoto na lembeti 7]

A yeke fa nzo tënë na sese kue