“Ala bi bê ti ala oko pëpe”

TI KE tâ na mbana ti dengi mê na agbotongo mê alingbi ti ga na zo kota kpale.

Azo ti gbata ti Darwin, na Australie, ayeke leke lani tele ti ala ti sala mbeni matanga na ngu 1974 tongana ala to nda ti mä totongo ti ye so afa so mbeni kota pupu ti ngangu ayeke pusu ndulu. Ye oko, a sala ndulu na ngu 30 awe si mara ti pupu tongaso atï na ndo Darwin pëpe. Ngbanga ti nyen ti gi bê fadeso? Mingi ti azo ti gbata ni abâ lani kpale ni tongana tâ kota ye pëpe juska na ngoi so apupu ti ngangu ato nda ti zi amur na ali ti ada so azo ni apete tele dä. A si na ndade ni na ndapelele, gbata ni aga gi yangbato.

Na kodoro ti Colombie na nze ti novembre 1985, mbeni li ti hoto asungba na atokua na nduzu alê ti wâ. Neige na glace so abungbi tele ti ala adü gbâ ti potopoto so atuku na ndo wungo ti azo ahon 20 000 ti gbata ti Armero, na alu ala kue. A gboto mê ti azo ni lani pëpe kozo si ye so asi? Biani, ala wara gbotongo mê kozo, teti hoto ni ayengi lani teti anze mingi. Ye oko, teti so a ninga awe si ala yeke lango na tele ti hoto so, mingi ti azo ti Armero agi bê ti ala pëpe na ye so ayeke si. Akota zo ni awara lani gbotongo mê so atene so mbeni kota kpale ayeke ndulu ti si. Me a bâ so ala sala ye mingi pëpe ti gboto mê ti azo ti gbata ni. A sala même atokua na radio ti dë bê ti azo ni so ye ayeke dä pëpe. A sala kusala na haut-parleur ti église ni ti wa azo ti duti kpô. A si na lakui, a mä angangu totongo ti sungbango ye use. Tongana fade mo yeke dä, mo yeke dö aye ti mo ti zia ni na ti kpe? Gi kete wungo ti azo si asala tongaso juska na ngoi so mbeni ye nde ti salango ni ayeke dä pëpe.

Tongana awandara so ayeke bâ tënë ti tambelango ti aye na gbe ti sese ayeke fa ando so sese ayeke yengi dä, fani mingi aye ni ayeke si tongana ti so ala fa. Ye oko, a yeke ngangu na ala mingi ti fa mbilimbili lawa si sese ni ayeke yengi na ndo ni so. Na ngu 1999, na ando kue so sese ayengi dä, a yeke azo 20 000 si awara kuâ. Mingi ti azo so akui lani abâ ti ala atene kpale tongaso ayeke si ande na ala lâ oko pëpe.

Mo yeke sala nyen na gbele agbotongo mê so alondo na Nzapa mveni?

Bible afa polele teti angu mingi kozoni awe aye so ayeke si na lâ ti nda ni. Tongana lo yeke fa aye so, lo wa e nga ti gbu li na ndo “lâ ti Noé”. “Na lâ ni [so] kozoni si moa aga,” atâa so azo ni ayeke gi bê ti ala lani mingi na ndo guengo na li ni ti salango ngangu na azo, ala mû ngoi ti ala mingi ti sala ambeni kusala so zo ayeke sala ka lakue na yâ fini. Âdu ti gbotongo mê so Nzapa amû na lege ti wakua ti lo Noé, “ala hinga tënë ni pëpe [“ala bi bê ti ala oko pëpe na tënë ni”, NW ] juska moa aga akamata ala kue”. (Matthieu 24:37-39). Tongana mo yeke lani dä, mo yeke dengi mê fade na gbotongo mê so? A yeke ye so mo yeke sala fadeso?

Ka tongana fade mo yeke lani dä na Sodome so ayeke ndulu na Ngu-ingo Mingi (mer Morte), na ngoi ti Lot molenge ti ita ti Abraham, mo yeke sala ye tongana nyen? Ando so angoro gbata ni akpa lani mbeni paradis. Gbata ni amaï nzoni na lege ti mosoro. Azo ni ayeke gi bê ti ala lani oko pëpe. Na ngoi ti Lot, “ala te, ala nyon, ala vo ye, ala kä ye, ala lu le-kobe, na ala sala da”. Azo ni so ala yeke na popo ti ala ayeke sala nga pitan ahon ndo ni. Mo yeke mä lani gbotongo mê so Lot ayeke mû tongana lo yeke tene polele so lo ke asioni salango ye so? Mo yeke mä fade lo tongana lo tene na mo so Nzapa aleke awe ti futi gbata ti Sodome? Wala mo yeke he tënë ti lo ni na ngia tongana ti so akoli so aye lani ti mû amolenge-wali ti Lot asala? Mo yeke londo ti kpe ti hon me na pekoni mo yeke bâ ndo na peko tongana wali ti Lot? Atâa so ambeni zo abâ gbotongo mê ni na nene ni pëpe, a si na lâ ni so Lot asigigi na yâ Sodome, “wâ na soufre ti yayu atï afâ ala kue.”—Luc 17:28, 29.

Mingi ti azo ti ngoi ti e ayeke bi bê ti ala oko pëpe na agbotongo mê. Me tongana a bata atapande so na yâ Mbeti ti Nzapa, a yeke ti gboto mê ti e, ti wa e ngangu ti LANGO PËPE!

[Encadré/Foto na lembeti 22]

Mbeni Kota Moa asi lani biani?

Awandara mingi atene so Kota Moa asi ti lo lâ oko pëpe. Me Bible atene ti lo so a si lani biani.

Même Jésus Christ mveni asala tënë ni, na lo yeke lani dä tongana ye so asi, teti lo bâ ni na ngoi so lo de na yayu.

[Encadré/Foto na lembeti 23]

Sodome na Gomorrhe awara lani futingo biani?

Senda-mbeso ayeda so ye so asi lani.

Mbaï ti azo asala tënë ni.

Jésus Christ ayeda nga so ye so asi lani, na a sala tënë ni na yâ abuku 14 ti Mbeti ti Nzapa.