“A nzere na mbi pëpe”
1 So ayeke tënë so azo mingi ayeke tene na ambeni ndo tongana e yeke fa tënë. Ye nyen ayeke mû maboko na e ti tene e nze pëpe tongana azo ti territoire ti e asara nzara ti tënë ni pëpe? Tongana nyen e lingbi ti zingo nzara ti nzo tënë na yâ ti azo?
2 Bata ngia ti mo: Ti hinga nda ni so mingi ti azo asara nzara ti tënë ni pëpe ayeke mû maboko na e ti bata ngia ti e. Azo so amanda ye na ndo tënë so atene zo abâ gigi na lege ti nyama wala azo so akono na ndo so azo amä na bê na Nzapa pëpe alingbi ti bâ nene ti Bible pëpe. Bê ti ambeni zo anze ndali ti sarango ye ti ndendia so ala bâ na yâ ti abungbi ti nzapa. Ti ambeni, kengo tënë ti ala ni ayeke fä ti vundu ti ala nga na beku so atia ala (aEph. 2:12). Ambeni ‘ahinga tënë ni pëpe’ wala ala ke ti mä tënë ni ndali ti akpale ti gigi so.—Mat. 24:37-39.
3 Atâa so ambeni zo ake ti mä tënë ti e, e lingbi ti duti na ngia na yâ kusala ti e ngbanga ti so e hinga so ngangu kue so e sara amû gonda na Jéhovah (1 Pi. 4:11). Na ndo ni, ti fa tâ tënë, même na azo so ade ti bâ nene ni pëpe, ayeke kpengba mabe ti e. Zia e gi ti bâ azo ti territoire ti e tongana ti so Jéhovah abâ na ala. Lo yeke lani na vundu ndali ti azo ti Ninive so “ahinga koti na gati ti ala pëpe”. (Jonas 4:11). Azo ti térritoire ti e ayeke na bezoin ti mä nzo tënë! Tongaso, a yeke nzoni e zia pëpe me e gi alege ti maï nzara ti ala na yâ tënë so Mbeti ti Nzapa afa.
4 Sara tënë ti aye so agbu bê ti azo ni: Peut-être mo lingbi ti fa na yâ tënë ti mo ti tongo nda ni mbeni tënë so agbu bê ti azo ti territoire ni na zo so mo wara na ti hunda zo ni ti fa tënë ti bê ti lo na ndo ni. Mä lo na ngoi so lo yeke sara tënë, na pekoni fa na lo tënë ti dengo bê so Bible ayeke na ni na ndo ye so agbu bê ti lo. Na peko ti mbeni ye ti vundu so asi na yâ ti territoire ti ala, mbeni ita-koli akangbi vundu ti lo na azo oko oko. Lo tene: “Fade fade, azo ato nda ti sara lisoro na mbi. Mbi sara anzoni lisoro na azo mingi na lango ni so ngbanga ti so mbi bi bê na ala.”
5 Gi Royaume ti Nzapa si ayeke lungula kpale kue so asi na azo ti sese. Gi ti hinga mbilimbili kpale so agi bê ti zo so mo wara lo. Peut-être lo lingbi ti zi lege na mo ti fa na lo tënë ti beku so Mbeti ti Nzapa afa. Tongana lo sara ni pëpe, lo lingbi ti ‘kiri ti mä tënë’ ni mbeni lâ.—Kus. 17:32.