E fa na azo beku ti e na ndo ti Royaume
1 Na lâ ti nda ni ti aye ti ngangu so, azo mingi na ndo sese ayeke na beku pëpe (aEph. 2:12). Ambeni, na ndara pëpe, azia bê ti ala na mosoro, azo ti komande, senda-ye nga na ambeni ye nde. So kota ngia si e yeke na ni ti duti na beku ti kekereke, mbeni beku so ayeke tongana “ndondo ti âme so agbu ngangu, a yengi pëpe”!—aHéb. 6:19.
2 Na gbe ti Royaume ti Nzapa, fade sese kue ayeke ga paradis. Azo so e ndoye ala ayeke londo na popo ti akuâ (Kus. 24:15). Nzinga, aye ti kirikiri, kobela, mbakoro nga na kui ayeke duti dä mbeni pëpe (Ps. 9:19; Mat. 12:20, 21; Apoc. 21:3, 4). So ayeke ambeni zendo ti Jéhovah so ayeke nduru ti ga tâ tënë la. Zendo wa mo yeke ku ti mo ni kungo?
3 Fa nzo tënë: A lingbi e bata beku ti Royaume gi teti e pëpe. Ndoye ti Nzapa na ti amba ti e apusu e ti mû tapande ti Jésus na ti “fa Tene-nzoni na awanzinga. . . ti fa tënë ti liberté na angbâa, ti tene na awaziba fade ala bâ ndo, ti zi ala so ayeke na tïtî azo so asara ngangu na ala”. (Luc 4:18, 19). Bazengele Paul afa nzo tënë na gara nga na ndo kue so azo ayeke dä. Lo bi tere ti lo kue na yâ ti kusala ni (Kus. 18:5). Ti mû tapande ti lo na fango tënë na ngangu ti e kue ayeke sara si ‘kusala ti leke ye ti sese so, na handa ti mosoro’ awoko beku ti e pëpe.—Marc 4:19.
4 Beku ti e na ndo ti Royaume ayeke woko pëpe tongana e tingbi na azo so asara nzara ti mä tënë ti Royaume ni pëpe wala azo so akanga lege na e polele. E “gbu tënë ti beku ti [e] ngangu si a yengi pëpe”. (aHéb. 10:23). ‘Kamene ti Tene-nzoni’ asara e pëpe (aRom. 1:16). Mungo bê ti e kue na kua ni nga na gbungo ngangu ti e alingbi ti pusu ambeni zo na nda ni ti mä e.
5 Atâ so e yeke gboto lê ti azo na ndo ti dutingo ti sese so ayeke gue gi na futingo so alingbi na tënë ti prophétie ti Mbeti ti Nzapa, e yeke pëpe aprophète so ayeke fa gi tënë ti vundu. Nde na so, kusala ti e agboto lê na ndo ti beku ti Royaume: nzo tënë ti Royaume ti Nzapa. Zia e fa nzo tënë so na bê ti e kue nga na ngangu ti e kue ‘si e hinga tënë kue ti beku ti e juska na nda ni.’—aHéb. 6:11.