E tambela tongana azo ti ndara
1 Lani so Jésus ahunda na awagingo susu osio ti ga adisciple ti lo, ala pusu desizion ti ala na peko pëpe, me “fade fade . . . ala gue na peko ti Lo.” (Mat. 4:18-22). Lani so Saul ti Tarse achangé lege ti lo si na pekoni lê ti lo akiri azi, legeoko nga lo pusu desizion ti lo na peko pëpe, me “fade fade lo fa tënë na yâ synagogue nde nde, lo tene Jésus ayeke Molenge Ti Nzapa.” (Kus. 9:20). Ngoi ayeke gue lakue gi na devant; tongana lo hon awe, lo hon biani. Ndani la a yeke kota ye ti tene e ‘tambela tongana awandara’ tongana a ndu lege so e yeke sara ye na ngoi ti e.—aEph. 5:15, 16.
2 Pasa asi na azo kue: Lege so azi na e laso ti sara na Jéhovah alingbi ti duti dä kekereke pëpe (Jacq. 4:14). “Pasa” asi na azo kue (Zo-ti. 9:11). Na ndo ni, na yâ ti sese ti laso, e lingbi pëpe ti kpe “lâ ti sioni” tongana e yeke ga mbakoro na ye so alingbi ti zia katikati na kusala ti e na Jéhovah (Zo-ti. 12:3). Ni la, a yeke lege ti ndara pëpe ti pusu na peko desizion ti mû tere ti e na Nzapa wala ti ku ti tene aye aga nzoni awe si e sara kusala ni mingi (Luc 9:59-62). Abraham aduti na siriri na tanga ti angu ti fini ti lo, lo kui “alingbi na bê ti lo,” ngbanga ti so lo sara ye na fini ti lo na lege ti ndara, lo mû tere ti lo kue na Jéhovah.—Gen. 25:8.
3 Ngoi ade mingi pëpe: E ye ti sara kusala na ngoi ti e na lege ti ndara teti “lâ ade mingi pëpe”. (1 aCor. 7:29-31). Na yâ ti kete ngoi, fade ngbene sese so ayeke hon. Mungo mbage na kota kusala ti bungbingo azo so ayeke tongana angasangbaga na “l’heure ti fango le-kobe” so ayeke hunzi ande (Apoc. 14:15). A lingbi e sara hange si agingo bê na angia ti sese so anzi pëpe ngoi so e lingbi ti sara kusala na ni nzoni na fango tënë (Luc 21:34, 35). So tâ ngia si ayeke duti ande tongana e bâ so e mû ândö ngoi mingi na fango le-kobe so!
4 A lingbi lê ti e akpengba ngangu si e duti nduru ti mû mbage ti e na pendere kusala so e lingbi ti sara. Zia e leke na bê ti e ti sara na Jéhovah na ngangu ti e kue ‘tongana a de ti tene, Laso’. (aHéb. 3:13). Na sarango tongaso, e yeke fa biani so e sara ye na ndara, ngbanga ti so “zo so asara ye so Nzapa aye, lo duti lakue lakue.”—1 Jean 2:17.