Mo lingbi ti to nda ti mbeni étude na nze ti octobre?
1. Mbeti wa e yeke sara na kua na nze ti octobre?
1 Na nze ti octobre, e yeke sara kua na Tour ti Ba Ndo nga na Réveillez-vous! Ti kiri ti bâ azo so asara nzara ti tënë ni, a wa e ti sara nga kua na tract Mo ye ti hinga tâ tënë? na ti sara kue ti to nda ti mbeni étude. E lingbi ti sara ni tongana nyen ?
2. Tongana nyen e lingbi ti sara kua na tract Mo ye ti hinga tâ tënë? ti to nda ti mbeni étude na ngoi so e kiri ti bâ mbeni zo so amû apériodique?
2 Lege ti sara kua na tract ni: E lingbi ti tene: “Apériodique so mbi mû na ala awa azo kue ti manda Bible, atâa bungbi ti vorongo Nzapa ti ala ayeke so wa. [Mû na zo ni tract Mo ye ti hinga tâ tënë?, na fa na lo ahundango tënë so ayeke na ndo ni.] Bâ ambeni hundango tënë so azo agi li ti ala na ni gbä na so Bible amû anzoni kiringo tënë na ni. Mo hunda mara ti atënë ni so awe?” Na peko ti so lo kiri tënë awe, mo na lo kue abâ na yâ ti tract ni kiringo tënë na mbeni hundango tënë so lo soro, nga ala diko mbeni versê oko so a fa tënë ti yâ ni pëpe. Fa na lo so so ayeke gi mbeni tapande ti aye so Bible afa, na mû na lo buku Bible afa. Na pekoni e lingbi ti sara lisoro na ndo ti akozo paragraphe ti mbeni chapitre so lo soro na yâ ti buku ni. Wala e lingbi ti gue na yâ ti mbeni chapitre so amû asango mingi na ndo ti ye so e sara lisoro na ndo ni na yâ ti tract ni fade. Bâ ambeni tënë so e lingbi ti sara na kua:
● Nzapa ayeke pensé nga na e la? (l. 10-11 par. 6-10)
● Bira na pasi ayeke hunzi mbeni lâ? (l. 12 par. 12-13)
● Nyen la ayeke si na zo na peko ti kuâ nyen? (l. 59-60 par. 7-8)
● Beku ayeke dä ndali ti azo so akui awe? (l. 71 par. 13-15)
● A lingbi mbi sambela tongana nyen si Nzapa amä mbi? (l. 166-167 par. 5-8)
● Mbi lingbi ti sara nyen ti duti na ngia na yâ ti fini ti mbi? (l. 9 par. 4-5)
3. Tongana dutingo ti zo ni amû lege na e pëpe ti to nda ti mbeni étude, e lingbi ti sara nyen?
3 Biani, tongana dutingo ti zo ni amû lege na e pëpe ti to nda ti mbeni étude na yâ ti buku Bible afa na kozo kiringo ti e ti bâ lo, e lingbi lakue ti mä tere na lo ti kiri ti ngbâ ti sara lisoro. Tongana e bâ so zo ni ade asara nzara ti tënë ni nzoni pëpe, e lingbi ti soro ti kiri fani mingi ti sara lisoro na ndo ti ambeni hundango tënë nde so ayeke na ndo ti tract ni kozo ti fa na lo buku ni. Zia e sara kua nzoni na tract so na nze ti octobre ti to nda ti mbeni étude na ti mû maboko na azo ti nzoni bê ti ‘hinga tâ tënë’.—Jean 8:31, 32.