Tâ kota ye so a hinga na mbeni nzoni wafango ye
1. Tâ kota ye so a hinga na mbeni nzoni wafango ye ayeke nyen?
1 Nyen la alingbi ti sara si mbeni zo aduti zo so ahinga ti fa ye nzoni na ndo ti Bible? Ye so lo manda na ekole? Aye so asi na lo na yâ ti fini ti lo? Ndara so a dü lo dungo na ni? Oko pëpe! A yeke oko sarango ye so a yeke bâ na yâ ti Ndia ti Moïse nga so a hinga na adisciple ti Jésus. Nga lo la lo yeke kota na popo ti asarango ye osio ti Jéhovah na a yeke mbeni ye so ayeke gboto zo na mbage ti Jéhovah (Jean 13:35; aGal. 5:14; 1 Jean 4:8). Ye ni so ayeke ndoye. Nzoni wafango ye ayeke fa ndoye.
2. A yeke kota ye ti ndoye azo ngbanga ti nyen?
2 Ndoye azo: Kota Wafango ye, Jésus, andoye lani azo, na ye so apusu azo ni ti mä lo (Luc 5:12, 13; Jean 13:1; 15:13). Tongana e bi bê na azo, e yeke fa tënë na alege kue so azi. Atâa azo asara ye ti ngangu na e wala ala sara nzara ti tënë ni pëpe, e yeke ngbâ lakue ti fa tënë. E yeke fa tâ bingo bê na azo so e yeke fa tënë na ala, nga e yeke leke fango tënë ti e ti lingbi na bezoin ti ala. E yeke mû ngoi gi ti sara na a-étude pëpe me nga ti leke na a-étude ni kozo ti gue ti sara ni.
3. Ti ndoye atâ tënë so ayeke na yâ ti Bible ayeke mû maboko na e na fango tënë tongana nyen?
3 Ndoye tâ tënë so ayeke na yâ ti Bible: Jésus andoye nga lani atâ tënë so ayeke na yâ ti Bible na lo bâ ni tongana mosoro (Mat. 13:52). Tongana e ndoye tâ tënë, e yeke fa ni na ngia na bê, na tënë ni ayeke nzere na azo so amä e. Mara ti ndoye tongaso ayeke mû maboko na e ti zia lê ti e gi na ndo ti nene ti tënë so e yeke fa ahon ti bâ gi akatikati ti e wani, na a yeke sara si e yeke gi bê ti e mingi pëpe na fango tënë.
4. Ti maï ndoye na yâ ti bê ti e, a hunda ti tene e sara nyen?
4 Gi ti maï ndoye na yâ ti bê ti mo: E yeke gi ti maï ndoye ti azo na yâ ti bê ti e tongana nyen? Tongana e gbu li ti e na ndo ti ndoye so Jéhovah na Molenge ti lo Jésus afa nga na ndo ti sioni dutingo so azo ti territoire ti e ayeke na yâ ni (Marc 6:34; 1 Jean 4:10, 11). Nga tongana e yeke manda ye e wani lakue lakue na e gbu li na ndo ni, ndoye so e yeke na ni teti atâ tënë so ayeke na yâ ti Bible ayeke kono. Ndoye ayeke mbeni mbage ti lengo ti yingo (aGal. 5:22). Tongaso, e lingbi ti sambela Jéhovah ti mû na e yingo vulu na ti mû maboko na e ti kono ndoye ti e (Luc 11:13; 1 Jean 5:14). Atâa e manda mbeti a yo tongana nyen, e ninga na yâ ti tâ tënë tongana nyen wala ndara so a dü e na ni ayeke so wa, e lingbi ti ga azo so ahinga ti fa ye nzoni na ndo ti Bible gi tongana e fa so e yeke na ndoye.