Maï akode ti fango tënë ti mo: Lege ti leke akozo tënë ti tongo nda ti lisoro

Ndani so a yeke kota ye: Tongana akozo tënë ti lisoro ti e andu bê ti mbeni zo pëpe, lo lingbi peut-être ti kaï lisoro ni kozo si e to nda ti fa tënë na lo. Ni la, awafango tënë mingi abâ so akozo tënë ti ala ayeke kota ye mingi na yâ ti fango tënë ti ala. Atâa so na yâ ti Kusala ti Royaume nga na yâ ti buku Comment raisonner a yeke wara akode ti fango na tënë, a yeke wara lakue pëpe na yâ ni atënë kue so zo alingbi ti sara na kua na yâ ti aye kue. Atâa kode ti fango na tënë ni ayeke tongaso, awafango tënë alingbi ti soro ti changé yâ ti atënë ni wala ti leke ni na atënë ti ala wani. Tongaso, e lingbi ti fa tënë nzoni mingi ahon ti kozo gi tongana e leke akozo tënë ti tongo nda ti lisoro ti e nzoni ahon ti tene gi atënë so aga na li ti e tongaso tongana e tingbi na mbeni zo.—aProv. 15:28.

Lege ti sara ni:

Soro li ti tënë ti mo. A lingbi aluti na ndo ti mbeti so mo yeke kangbi ni nga so alingbi ti ndu bê ti azo ti yâ ti territoire ti mo.
Leke mbeni kozo tënë oko wala use nzoni, so mo lingbi ti tene ni ande na peko ti so mo bara zo ni tongana ti so mo yeke sara ka lakue. Mo lingbi ti to nda ni na lege ti tënë so: “E ga na ala ge ngbanga ti so . . . ,” “Azo mingi ayeke gi bê ti ala na ndo ti . . . ,” “Mbi ye ti hinga tënë ti bê ti ala na ndo ti . . . ,” wala mbeni ye nde. Mingi ni, a yeke nzoni ti sara tënë nduru nga polele. Ambeni wafango tënë asoro ti bata akozo tënë ti lisoro ti ala na li.
Hunda mbeni tënë so alingbi ti pusu zo ni ti fa tënë ti bê ti lo so azi lege na ala ti sara lisoro (Mat. 17:25). Girisa pëpe so lo yeke pensé fade na ndo ti ambeni ye ti lo kozo si mo ga, tongaso a lingbi mo hunda mbeni tënë so ayeke ngangu pëpe wala so asara si lo gi bê ti lo pëpe.

Tara ti sara ye so na nze so:

Na ngoi ti vorongo Nzapa na yâ ti sewa, ala mû mbeni ngoi ti leke nga ti haka peko ti akozo tënë ti tongo nda ti lisoro.
Na ngoi ti fango tënë, fa aye so mo leke ti tene ni na aita so mo na ala ayeke sigigi (aProv. 27:17). Changé akozo tënë ti lisoro ti mo ni tongana ague oko na bezoin ti azo ape.