Bungbi na Kusala ti Ala na ndo Sese Kue

A YEKE sala kusala na aye nde nde mingi so atingbi tele ti fa lege na kusala ti fango tene ti témoin na yâ akodoro 230 na ndo ni so kusala ni ayeke dä. Fango lege ni kue alondo na Wabatango Bungbi na kota ndokua ni na Brooklyn, New York. Wabatango Bungbi ayeke tokua azo na iri ti lo ngu na ngu na ambage nde nde ti sese kue ti ba ambeni tene na azo so asala kusala dä na iri ti afiliale. Na yâ abiröo ti afiliale ni, a yeke wara aKomite ti filiale so na yâ ni a wara azo ota ti si na mbasambala, ti bata kusala na yâ akodoro so ayeke na gbe ti ala. Ambeni na popo ti afiliale ni ayeke na ada teti petengo ambeti, na ambeni ti ala ayeke sala kusala na amasini ti petengo ambeti na loro mingi ahon. A kangbi kodoro wala ndo so filiale oko oko ayeke ba ndo dä na adistrict, na a kangbi nga yâ ti adistrict ni na acirconscription. Circonscription oko oko abungbi akongrégation ndulu na 20. Mbeni surveillant ti district ayeke sala vizite, na peko ti tele, na acirconscription so ayeke na yâ district ti lo. A yeke sala akota bungbi use na yâ ngu oko teti circonscription oko oko. A yeke wara nga mbeni surveillant ti circonscription so ayeke sala vizite na kongrégation oko oko ti yâ ti circonscription ti lo, mingi ni fani use na yâ ngu oko, na lo yeke mu maboko na aTémoin na yâ lekengo na salango kusala ti fango tene na yâ territoire so a mu na kongrégation ni.

Kongrégation ti ndo ni na Da ti Royaume ti lo ayeke libe ti fango nzo tene na azo so mo lango na popo ti ala. A kangbi yâ ti ando ti kongrégation oko oko na akete territoire. A mu aterritoire ni so na ambeni Témoin so ayeke sala ngangu ti kiri ti ba azo so ayeke na yâ ni na ti sala tene na ala. Kongrégation oko oko, so a bungbi wungo ti aTémoin kete ti si na 200, ayeke na a-ancien so a mu na ala akusala nde nde ti bata. Wafango nzo tene oko oko ayeke kota mbage ti bungbi ti aTémoin ti Jéhovah. Zo oko oko na popo ti aTémoin, atä lo yeke sala kusala na kota ndokua ni, na yâ afiliale, wala na yâ akongrégation, ayeke sala kusala ti fa tene lo mveni na azo na ndo Royaume ti Nzapa.

Na nda ni, arapport ti kusala ni ayeke gue na kota ndokua ni, na a yeke bungbi ni kue ti sigigi na ni na yâ Annuaire ti ngu oko oko. Nga, ngu oko oko, a yeke sigigi na mbeni molongo ti atondo ni na yâ Tour ti Ba Ndo ti lango oko ti nze ti janvier. Ambeti use so ayeke fa tondo kue ti ngu oko oko na ndo ye so a sala teti fango tene na ndo Jéhovah na Royaume ti lo so Christ Jésus ayeke na li ni. Na yâ angu so ahon ade ti ninga pepe, a yeke wungo ti aTémoin na azo so asala nzala ti tene ni ndulu na kutu 14 si aga na Matanga ti Dango Bê na kui ti Jésus na yâ angu oko oko. A-Témoin ti Jéhovah ayeke mu angbonga so ahon ngbundangbu oko na yâ ngu oko oko ti fa nzo tene, na wungo ti afini zo ahon saki 300 awara batême. Wungo ti ambeti so a zia ni na azo asi kutu ngbangbo mingi.