Ambeni tënë ti bâ na ndö ni

Mbeni tënë ndali ti ababâ na amama so ayeke aChrétien:

So mo yeke babâ wala mama, mo yeke na nzara ti mû maboko na amolenge ti mo ti ye Jéhovah nga ti mû terê ti ala na lo. Me nyen la mo lingbi ti sara ti leke ala ndali ti batême? Na ngoi wa la ala lingbi ti duti prêt ti wara batême?

Jésus atene lani na adisciple ti lo, lo tene: “Ala sara si azo na popo ti amara kue aga adisciple. Ala batize ala.” (Mat. 28:19). Ti gue oko na tënë so, kota ye so a hunda ti tene mbeni zo asara kozoni si lo wara batême ayeke ti tene lo ga disciple, so ti tene lo mä yâ ti afango ye ti Christ nzoni, lo mä na bê na afango ye ni nga lo sara kue ti sara ye alingbi na ni. A yeke mbeni ye so même amaseka nga kue apeut ti sara ni.

Gi ti duti mbeni nzoni tapande ndali ti amolenge ti mo nga yôro afango ye ti Jéhovah na yâ ti bê ti ala (Deut. 6:6-9). Ti sara ni, a lingbi mo sara kua na buku Bible alingbi ti fa nyen na e? nga na buku Lege ti ngbâ na yâ ti ndoye ti Nzapa ti fa na ala atâ tënë ti Bible nga ti leke ala ti hinga ti kiri tënë na lege ti mama-ndia ti Bible nga ti sara ye alingbi na ni. Mû maboko na amolenge ti mo ti hinga ti fa atënë ti mabe ti ala na lege ti atënë ti ala wani (1 Pi. 3:15). Aye so mo fa na ala, atënë so mo tene ti kpengba ala, mandango ye ala wani, vorongo Nzapa na yâ ti sewa, guengo na abungbi ti congrégation nga na sorongo anzoni kamarade ayeke mû ande maboko na ala ti gue na li ni juska na batême nga même na peko ni. Mû maboko na ala ti zia aye ti yingo na gbele ala.

A-Proverbe 20:11 atene: “Même mbeni molenge, a yeke hinga lo na lege ti sarango ye ti lo, wala sarango ye ti lo ayeke nzoni nga na lege ni.” Ambeni ye wa la ayeke fa so mbeni molenge, ti koli wala ti wali, aga disciple ti Jésus Christ awe na lo lingbi awe ti wara batême?

A yeke nzoni molenge so ayeke gue na li ni ti wara batême aduti molenge so ayeke mä yanga ti babâ na mama ti lo (Kus. 5:29; aCol. 3:20). Lani na ngoi so Jésus ayeke na ngu 12, Bible atene: “Lo ngbâ ti woko terê ti lo na gbe ti [babâ na mama ti lo].” (Luc 2:51). Tâ tënë, mo yeke ku pëpe ti tene molenge ti mo aga mbilimbili-kue. Me molenge so ayeke na nzara ti wara batême adoit ti gi ti sara ye tongana ti Jésus, na a lingbi azo ahinga lo tongana molenge so ayeke woko ka terê na gbe ti babâ na mama ti lo.

A lingbi lo fa nga so lo yeke na nzara ti manda atâ tënë so ayeke na yâ ti Bible (Luc 2:46). Eskê molenge ti mo ni aye ka ti gue na abungbi nga ti mû mbage dä? (Ps. 122:1). A nzere ka na lo ti diko Bible lakue nga ti manda ye lo wani?—Mat. 4:4.

Molenge so ayeke gue na li ni ti wara batême ayeke sara kue ti zia aye ti Royaume na kozo ndo (Mat. 6:33). Lo hinga so lo yeke na kua ti fa tënë ti mabe ti lo na azo. Lo yeke mû mbage na alege nde nde ti fango tënë, nga lo yeke na kamene pëpe ti fa na aprofesseur ti lo nga na amba ti lo ti ekole so lo yeke Témoin ti Jéhovah. Tongana a mû na lo devoir ti sara ni na ngoi ti bungbi ti Kusala ti e nga na gigi ti e, lo yeke bâ ni tongana kete ye ape.

Lo yeke sara nga kue ti kpe asioni kamarade, tongaso si lo bata andia ti Jéhovah na ndö ti nzoni sarango ye (aProv. 13:20; 1 aCor. 15:33). A yeke bâ ni na yâ ti abia so lo yeke soro ti mä, afilm nga na aye so lo yeke bâ na télé, ajeu vidéo so lo yeke sara nga na fason so lo yeke sara na kua na Internet.

Amolenge mingi ayeda na mungo maboko ti ababâ na amama ti ala, ala ye tâ tënë na bê ti ala wani nga ala sara aye so afa atene ala lingbi ti wara batême, atâa so ala ngbâ maseka. Zia si Jéhovah airi tënë nzoni na ndö ti aye kue so mo yeke sara ti mû maboko na amolenge ti mo ti si na batême, mbeni kota ye na yâ ti songo ti ala na Jéhovah.

Mbeni tënë ndali ti awafango tënë so ade ti wara batême ape:

A yeke mbeni kota pasa ti duti mbeni wafango tënë so ade ti wara batême ape na yâ ti congrégation. E gonda mo ndali ti so mo yeke gue na li ni na lege ti yingo. Mo wara tâ hingango ye na ndö ti Nzapa na lege ti mandango Bible, na hingango ye so apusu mo ti fa na gigi mabe so mo yeke na ni na azendo ti lo.—Jean 17:3; aHéb. 11:6.

Peut-être kozoni si aTémoin ti Jéhovah ato nda ti manda Bible na mo, mo yeke na yâ ti mbeni bungbi ti nzapa nde wala mo yeke gue nga na mbeni bungbi ti nzapa oko ape. Peut-être mo yeke sara lani mbeni kua so ague nde na amama-ndia ti Bible. Me ti fadeso, mo fa so mo yeke na mabe na lege so mo changé bê ti mo, so ti tene mo regretté asioni ye so mo sara kozo. Mo fa nga na pekoni so mo yeke na mabe na changengo lege ti mo, so ti tene mo ke angbene sioni sarango ye ti mo, na mo leke na bê ti mo fadeso ti gi ti sara ye so anzere na lê ti Nzapa.—Kus. 3:19.

Na mbage, peut-être mo hinga atënë ti Bible “ngbene ye so mo de foroto,” ni la asara si mo tï pëpe na yâ ti asioni sarango ye so ague nde na asarango ye ti atâ Chrétien (2 Tim. 3:15). Mo manda ti ke aye so akamarade ti mo ayeke sara ti pusu mo ti sara ye so ayeke na lege ni ape, na mo ke nga ambeni tara nde so aye ti pusu mo ti sara ye so ayeke sioni na lê ti Jéhovah. Mo fa so mo yeke na mabe na lege so mo mû mbage ti tâ bungbi ti vorongo Nzapa nga mo fa atënë ti mabe ti mo na azo. A fa na mo tongana nyen ti fa tënë, so ayeke kua ti aChrétien. Fadeso, mo mû desizion na bê ti mo wani ti sara na Jéhovah tongana wafango tënë so ade ti wara batême ape.

Atâa mo kono awe la mo hinga Jéhovah wala mo hinga alege ti Jéhovah na ngoi so mo de kete, peut-être mo yeke pensé na akota ye use so angbâ na mo ti sara ti gue na li ni na lege ti yingo: mungo terê na Jéhovah nga na batême. Mo yeke mû terê ti mo na Jéhovah na lege so mo yeke ga nduru na lo na yâ ti sambela ti fa na lo desizion so mo mû ti sara gï na lo oko teti lakue lakue (Mat. 16:24). Ti fa na gbele azo kue so mo mû terê ti mo na Nzapa awe, mo yeke wara batême na lege so a yeke yôro mo kue na yâ ti ngu (Mat. 28:19, 20). Tongana mo mû terê ti mo na Nzapa nga mo wara batême awe, mo yeke ga mbeni wakua ti Jéhovah Nzapa. Mbeni pasa ti hon so ayeke dä ape.

Me tongana ti so mo manda na yâ ti Bible, mo yeke tingbi ande na mara ti atara nde nde. Girisa ape so kete na peko ti so Jésus awara batême, ‘yingo ague na lo na yâ ti benyama si Zabolo atara lo.’ (Mat. 4:1). Na peko ti so mo wara batême na mo ga disciple ti Christ awe, mo lingbi ti tingbi na atara (Jean 15:20). Atara ni alingbi ti ga na alege nde nde. Peut-être azo ti sewa ti mo alingbi ti kanga lege na mo (Mat. 10:36). Akamarade ti mo ti ekole, ti place ti kua wala azo so mo na ala asara kamarade kozo alingbi ti he mo. Me dabe ti mo lakue na atënë ti Jésus so ayeke na Marc 10:29, 30, so atene: “Ti tâ tënë ni, mbi tene na ala: Zo kue so azia da ti lo, aita ti lo ti koli, aita ti lo ti wali, mama ti lo, babâ ti lo, amolenge ti lo na ayaka ti lo ngbanga ti mbi nga ngbanga ti nzoni tënë, lo yeke wara na yâ ti ngoi ti fadeso ada, aita ti koli, aita ti wali, amama, amolenge na ayaka. Aye so kue lo yeke wara ni fani 100, nga a yeke sara aye ti ngangu na lo na ndö ni. Me na yâ ti aye ti ngoi so ayeke ga, lo yeke wara ande fini ti lakue lakue.” Tongaso, sara kue ti ngbâ lakue nduru na Jéhovah nga ti sara ye alingbi na andia ti lo.

Tongana mo ye ti wara batême, sara tënë ni na coordinateur ti bungbi ti a-ancien ti congrégation ti mo. Ahundango tënë so aga na peko ti tënë so ge ayeke ahundango tënë so a-ancien ayeke sara lisoro na mo na ndö ni ti bâ wala mo lingbi biani ti wara batême. Mo lingbi ti to nda ti bâ ahundango tënë so na yâ ti programme ti mandango ye ti mo wani so mo yeke sara lakue.

Ti leke terê ti mo ti ku na alisoro so, mû ngoi ti diko nga ti gbu li na ndö ti aversê so a fa atënë ti yâ ni. Mo peut ti mû anote na yâ ti buku ni wala na ndö ti mbeni ye nde. Na ngoi ti lisoro ti mo na a-ancien, mo lingbi ti kiri tënë na lege ti atënë so mo sû so nga ti zia buku ti mo ni na zingo ni. Tongana mo mä yâ ti ambeni hundango tënë ni pëpe, gi bê ti mo ape, hunda na ita so ayeke manda Bible na mo wala na a-ancien ti mû maboko na mo.

Na yâ ti lisoro so a-ancien ayeke sara na mo, pensé pëpe so a lingbi mo mû gï akiringo tënë so ayo wala so ayeke ngangu. Ti kiri tënë polele na hundango tënë ni nga ti tene ni na lege ti atënë ti mo wani ayeke nzoni mingi. Ti mingi ti ahundango tënë ni, a yeke nga nzoni ti tene mo sara kua na versê oko wala use tongaso ti fa so kiringo tënë ti mo ni alondo na yâ ti Bible.

Tongana hingango ye ti mo na ndö ti akozo fango ye ti Bible ni ade ti lingbi na ni ape, a-ancien ayeke leke ti tene a mû maboko na mo, tongaso si mo lingbi ande ti fa na lege ti atënë ti mo wani tongana nyen la mo mä yâ ti atënë ti Bible nzoni, na mo lingbi ti wara batême mbeni lâ.

[Kete tënë ndali ti a-ancien ti congrégation: Na lembeti 208-212 ti buku so, a yeke wara awango so afa tongana nyen ti sara lisoro na ala so aye ti wara batême.]