Ngbanga ti nyen la asioni ye nga na pasi ayeke dä?

Tongana mbeni ye ti ngangu asi, a yeke na lege ni ti tene mbeni zo ahunda terê ti lo: “Ngbanga ti nyen la ye ni asi?” A nzere na e mingi so Bible akiri tënë polele na hunda so.

1. Satan aga na asioni ye na yâ ti dunia tongana nyen?

Satan Zabolo asara lani kpengbango-li na Nzapa. Satan aye lani ti komande azo, tongaso lo pusu kozo koli na kozo wali, Adam na Ève, ti mû peko ti lo na yâ ti kpengbango-li so lo sara. Lo sara ni na lege ti mvene so lo tene na Ève (Genèse 3:1-5). Lo sara si Ève apensé so Jéhovah agbanzi mbeni nzoni ye na lo. Lo fa so azo ayeke duti na ngia mingi tongana ala ke yanga ti Nzapa. Satan atene kozo mvene tongana lo tene na Ève so lo yeke kui ape. Ndani la, Bible airi Satan “zo ti mvene na babâ ti mvene.”​—Jean 8:44.

2. Nyen la Adam na Ève asoro lani ti sara?

Jéhovah amû lani ye mingi na Adam na Ève. Lo tene lani so ala lingbi ti te lê ti akeke kue so ayeke na yaka ti Éden, gï oko la ala doit ti te lê ni ape (Genèse 2:15-17). Me ala soro ti te lê ti keke so lo ke na ala ti te so. Ève ‘ako ni, lo te’. Na pekoni, Adam nga “ate ni.” (Genèse 3:6). Ala use kue ake yanga ti Nzapa. So Adam na Ève ayeke lani mbilimbili-kue, a yeke ngangu na ala ape ti sara ye na lege ni. Me so ala ke yanga ti Nzapa na mbana, ala sara siokpari nga ala ke komandema ti lo. Desizion so asara si ala bâ pasi ngangu.​—Genèse 3:16-19.

3. Desizion so Adam na Ève amû aga na nyen na ndö ti e?

So Adam na Ève aga awasiokpari, ala mû siokpari na amolenge ti ala kue. Bible atene na ndö ti Adam, atene: “Na lege ti zo oko siokpari alï na yâ ti dunia so, na lege ti siokpari kuâ aga, tongaso kuâ amû azo kue.”​—aRomain 5:12.

E yeke bâ pasi ndali ti araison nde nde. Na ambeni ngoi, e bâ pasi ndali ti so e mû asioni desizion. Na ambeni ngoi, e bâ pasi ndali ti so azo amû asioni desizion. Ti ambeni, e bâ pasi ndali ti so aye so e ku terê na ni ape asi.​—Diko Zo-ti-fa-tene 9:11.

GI TI HINGA AYE MINGI

4. Zo so ayeke na gunda ti apasi ti e

Azo mingi apensé so Nzapa la akomande dunia kue. Eskê a yeke vrai? Zia VIDÉO ni.

VIDÉO: Zo wa la akomande dunia? (1:24)

Diko Jacques 1:13 nga na 1 Jean 5:19, na pekoni kiri tënë na hunda so:

• Eskê Nzapa la ayeke na gunda ti pasi nga na asioni ye?

5. Bâ aye ti peko ti komandema ti Satan

VIDÉO: Ngbanga ti nyen la Nzapa azia si azo abâ pasi?—Mbage ni (3:07)

Diko Genèse 3:1-6, na pekoni kiri tënë na ahunda so:

• Mvene wa la Satan atene?​—Bâ versê 4 na 5.

• Tongana nyen la Satan afa so Jéhovah agbanzi mbeni nzoni ye na azo?

• Ti Satan, eskê azo abezoin ti tene Jéhovah aduti Gbia ti ala si ala duti na ngia?

Diko Zo-ti-fa-tene 8:9, na pekoni kiri tënë na hunda so:

• Na ngoi so Jéhovah la akomande dunia ape, nyen la apassé?

1. Adam na Ève ayeke lani mbilimbili-kue nga ala vivre na yâ ti Paradis. Me ala mä yanga ti Satan nga ala sara kpengbango-li na Jéhovah

2. Na peko ti so a ke yanga ti Jéhovah, dunia asi singo na siokpari, pasi nga na kuâ

3. Jéhovah ayeke zi ande siokpari, pasi nga na kuâ. Azo ayeke kiri ti ga mbilimbili-kue nga ala yeke vivre na yâ ti Paradis

6. Jéhovah ayeke pensé na e na yâ ti apasi ti e

Eskê apasi ti e asara ye oko na Nzapa ape? Bâ atënë so Gbia David nga na bazengele Pierre atene. Diko Psaume 31:7 nga na 1 Pierre 5:7, na pekoni kiri tënë na hunda so:

• So mo hinga so Jéhovah ahinga apasi ti e nga lo yeke pensé na e na yâ ni, a sara mo tongana nyen?

NA NDURU TËNË

Satan Zabolo nga na kozo koli na kozo wali la ayeke na gunda ti pasi so ayeke na yâ ti dunia. Jéhovah apensé mingi na e na yâ ti pasi ti e, nga fafadeso lo yeke zi ni.

Dango bê

• Mvene wa la Satan Zabolo atene na Ève?

• Kpengbango-li ti Adam na Ève aga na nyen na ndö ti e?

• E hinga tongana nyen so Jéhovah ayeke pensé na e na yâ ti apasi ti e?

GI NDA TI YE

Gi ti hinga Bible atene siokpari ayeke nyen?

“Siokpari ayeke nyen?” (Article na ndö ti site)

Gi ti hinga ambeni ye na ndö ti tënë so Satan Zabolo asigi na ni na yaka ti Éden.

“Nzapa azia si azo ayeke bâ pasi ngbanga ti nyen?” (Tour ti Ba Ndo ti lango 1 ti janvier 2014)

Bâ akiringo tënë na mbeni kpengba hunda. Akiringo tënë ni adë bê ti zo.

“Ngbanga ti nyen la a fâ lani gbâ ti aJuif na Allemagne? Nzapa akanga lani lege na ni ape ngbanga ti nyen?” (Article na ndö ti site)

Bâ aye so mbeni koli amanda na ndö ti pasi so azo ayeke bâ na ndo so lo yeke dä.

Fadeso mbi yeke na mbeni zo so ayeke bâ lege ti mbi (5:09)