“Lo yeke Nzapa . . . ti azo so ayeke na fini”

Kuâ ayeke ngangu ahon Nzapa? Oko pëpe! Kuâ, wala mbeni “wato” nde, alingbi ti duti ngangu ahon “Nzapa Ti Ngangu Ahon Kue” oko pëpe (1 aCorinthien 15:26; Exode 6:3). Nzapa alingbi ti zingo azo na kuâ, na a yeke ye so lo tene ni yeke sara ande na yâ ti fini dunia.a Tënë ni so ayeke si biani? Jésus, Molenge ti Nzapa, afa ni na e na lege ti atënë so lo tene, so adë bê ti e mingi.​—Diko Matthieu 22:31, 32.

Na aSadducéen so amä na bê na zingongo ti akuâ pëpe, Jésus atene: “Na ndo ti tënë ti zingongo ti akuâ, ala diko pëpe ye so Nzapa atene ândö na ala? Lo tene: ‘Mbi yeke Nzapa ti Abraham, Nzapa ti Isaac na Nzapa ti Jacob.’ Lo yeke Nzapa ti akuâ pëpe, me ti azo so ayeke na fini.” Jésus agboto lê ge na ndo ti mbeni lisoro so Jéhovah asara lani na Moïse na tere ti kete keke so wâ agbi na yâ ni a sara angu 3500 tongaso awe (Exode 3:1-6). Ti Jésus, tënë so Jéhovah atene na Moïse so ni yeke “Nzapa ti Abraham, Nzapa ti Isaac na Nzapa ti Jacob”, aye ti fa so, tâ tënë, Nzapa ayeke zingo azo na kuâ ande. Lo yeke sara ni tongana nyen?

Lani so Jéhovah atene tënë so na Moïse, andâ Abraham, Isaac na Jacob akui ti ala a sara angu mingi awe. Abraham akui a sara ngu 329 awe, Isaac akui a sara ngu 224 awe, nga ti Jacob, lo kui a sara ngu 197 awe. Me Jéhovah atene “Mbi yeke” Nzapa ti ala, me pëpe “Mbi yeke lani” Nzapa ti ala. Jéhovah asara tënë ti ala mo bâ mo tene ala ngbâ na fini. Ndani ayeke nyen?

Jésus afa ndani, lo tene so Jéhovah ayeke “Nzapa ti akuâ pëpe, me ti azo so ayeke na fini.” Bâ nda ti tënë so nzoni. Tongana zingongo ti akuâ ayeke dä ape, andâ kuâ agbu Abraham, Isaac nga na Jacob na yâ ti tïtî lo na lo yeke zi ala lâ oko ape. Tongana a yeke tongaso, ka Jéhovah ayeke duti Nzapa ti akuâ. So aye ti tene so kuâ ayeke ngangu ahon Jéhovah, mo bâ mo tene a kara Jéhovah ti zi awakua be-ta-zo ti lo na tïtî kuâ.

Tongaso, tënë ti nyen la e lingbi ti tene na ndo ti Abraham, Isaac, Jacob nga na awakua be-ta-zo kue ti Jéhovah so akui awe so? Jésus atene kpengba tënë so, lo tene: “Na lê ti lo ala kue ayeke na fini.” (Luc 20 :38). Biani, zendo so Jéhovah amû ti zingo awakua be-ta-zo ti lo so akui awe ayeke tâ ye biani, ni la lo sara tënë ti ala mo bâ mo tene ala yeke na fini (aRomain 4:16, 17). Jéhovah, lo so li ti lo ayeke girisa ye oko pëpe, ayeke dabe ti lo ande na azo so kue na ngoi so lo soro ti zingo ala.

A nzere na mo ti kiri ti bâ ande mbeni zo so mo ye lo si akui awe so? Tongaso, girisa pëpe so Jéhovah ayeke tâ ngangu ahon kuâ. Ye oko alingbi ti kanga lege na lo pëpe ti zingo akuâ tongana ti so lo mû zendo ni. E tisa mo ti manda ye mingi na ndo ti tënë so nga na ndo ti Nzapa so ayeke sara ande ye so, na fade mo yeke ga nduru mingi na Jéhovah, “Nzapa . . . ti azo so ayeke na fini.”